Kontinua Hamosu Konflitu, Organizasaun Arte Marsiais Sai Dezafiu

(Reportájen Asistente Editór Marcelino Tomae/Editora Suzana Cardoso)

DILI (Media ONE Timor) — Organizasaun arte mersiais iha Timor-Leste (TL) mak sei kontinua kria konflitu hela de’it liu hosi ataka malu hafoin Governu reativa fila fali sira, maka ne’e sei sai dazefiu boot ba Estadu iha futuru.

“Tanba Governu loke tiha organizasaun Arte Marsiais hirak ne’e, maibé laduun iha edukativu. Maka sira kontinua ataka malu. Ne’e hanesan dezafiu boot ida ba estadu. Tuir lolos Governu tenke haree konsekuensia, kuandu loke organizasaun boot hanesan ne’e.”

Kestaun ne’e hato’o husi Vise Bankada Kongresu Nasionál Rekonstrusaun Timorense (CNRT-Sigla Portugues), Deputadu Patrocinio Fernandes ba Jornalista iha resintu uma fukun Parlamentu Nasionál (PN), Tersa, (23/08/2022).

Hanesan públika ona katak Arte Marsiais ne’ebé mak governu deside taka iha tinan 2003 hanesan Persaudaraan Setia Hati Terate (PSHT), Ikatan Kerra Sakti (IKS) no Kmanek Oan Raik Laran (KORKK).

Maibé iha loron 2 Marsu 2022, VIII Governu Konstitusionál liu husi konsellu Ministru hasai fali rezolusaun númeru 4/2020 reativa fali fali arte marsiais tolu. Nune’e iha loron, Kinta (18/08/2022) kalan to’o Sesta (19/08/2022) madrugada organizasaun PSHT hala’o sira nia serimonia gradusaun dahuluk iha Timor-Leste hafoin ukun aan.

Hosi serimonia graduasaun ne’ebé hala’o iha CCD, GMT no Hotel Timor Lodge ne’e ikus mai rezulta ema besik na’in 5 mak hetan kanek. Na’in rua membru PNTL no na’in tolu seluk hosi joventude sira.

Lee Notísia Relevante: Joven Ataka PNTL Na’in Ruak Kanek

Deputadu Patrocinio esplika liutan, bankada CNRT nia pozisaun pólitika ba estabilidade no pas laiha rezerva. Hakarak dezenvolve rai TL la’o, presiza Timoroan hadomi malu hodi kria estabilidade ba pas. Inklui sira ne’ebé involve aan iha arte marsiais.

Partisipasaun joven iha atividade extra hanesan arte marsiais tuir Deputadu Patrocinio, hodi forma mentalidade no mós sai sidadaun ne’ebé di’ak liutan para kontribui ba prosesu dezemvolvimentu.

Nune’e Deputadu Patricinio husu ba Polisia Nasionál Timor-Leste (PNTL) atu tau antensaun maximu. Halo prevensaun hodi evita konflitu. Ba responsavel organizasaun arte mersiais, tenki eduka nia membru sira para; dixiplina, iha nasionalizmu, badinas, kuda espritu dame no pas iha sira nia fuan.

“Responsabel sira mós tenke hatene katak, bainhira atu akomoda ema barak iha organizasaun tenke iha responsavel. Tanba sira mai husi karakter oioin. Presiza ezersisiu kona-ba regra hodi dixiplina, kontriubui estabilidade no pas ba Nasaun Timor-Leste”, Deputadu Patricinio hateten.

Aliende ne’e Deputadu Patricinio mós husu ba entidade no komunidade sira atu ajuda eduka oan sira atu moris dixiplina nu’udar membru sosiedade. Tenke respeitu ema seluk ne’ebé la involve iha organizasaun arte marsiais. Sira iha direitu atu goja liberdade no moris hakmatek.

Deputadu Patricinio husu ajuda ba organizasaun arte marsiais para labele halo konflitu tuun sa’e hodi ema seluk sai vitima. Lakon diretu liberdade. Lakon materia. No pior liu tan, tenki trsite ba oan sira moras, até balun lakon oan sira nia vida.

“Ita tenke iha sentimentu hodi hanoin Inan Aman sira ne’ebé la envolve groupu arte marsiais ne’e. Dala ruma sira mak simu konsikuensia todan husi hahalok laiha moral ne’ebé Ita halo. Nune’e, Timoroan tenki lolo liman ba malu hamutuk hadomi malu hodi fortifika iha dame no pas. Labele hosik arte marsiais hafahe Ita Timoroan”, ezizi Deputadu Patrocinio. (Asesu You Tube/Facebook https://www.facebook.com/Media1Timor Media ONE Timor)