MEDIAONETIMOR-Atu kontribui ba moris diak povu Timor-Leste (TL) iha futuru, joventude tenki preparadu ho kualidade. Nune’e Sekretariu Estadu Juventude no Traballu (SEJT ) sei fo formasaun iha area tékniku professionál tuir karakteristiku sira nian.
“SEJT sei esforsu para fokus fo formasaun tuir karakter joventude sira iha area tékniku professionál hodi preparadu iha futuru ba kualidade moris diak povu iha Nasaun TL. No SEJT sei kria kampu traballu ba joventude sira.”
Lia fuan hirak ne’e hateten hosi SEJT, Nivio Magalhaes foin lalais ne’e hodi hatán jornalista konaba signifikadu selebrasaun 12 Novembru tinan 2017 ba joventude TL iha tempu dezemvolvimentu nian.
Nia hateten, selebrasaun Masakre Santa Cruz 12 Novembru 1991 ne’ebé selebra tinan-tinan nu’udar mensajem ba joventude sira atu tenki sakrifika a’an ba rai doben TL tuir ninia tempu no ambiente idak-idak nian.
“Mensajem importante historia Masacre Santa Cruz iha 12 Novembru 1991 liuba joventude lubuk ida mak sakrifika sira nia vida atu ita nia nasaun hetan ukun a’an. Iha tinan 2017 tempu dezemvolvimentu joventude tenki sakrifika a’an ba servisu no estuda atu futuru ita nia nasaun moris diak liutan,” sujere Nivio.
Nivio hatutan, joventude sira iha obrigatoriu tenki kontinua luta Masacre Santa Cruz iha momentu ida foun. Katak, luta foun para liberta povu hosi kiak no mukit. Joventude tenki positivamente kontribui ba dezemvolvimentu nasional para iha futuru povu moris diak liutan.
Nu’udar membru governu ne’ebé tahu atensaun ba joventude sira Nivio dehan, iha obrigasaun atu kria kondisaun. SEJT sei focus ba joventude ho formasaun oin-oin hodi prepara futuru para moris diak liutan.
“Ohin loron 12 Novembru 2017 ita nu’udar joventude hatudu duni ita nia sentiment domin ba sakrifisiu vida nian hodi promote katak ita joventude agora, tenki sakrifika a’an ho badinas servisu ba moris diak liutan,” dehan Nivio hodi hatutan.
Ba oin Joventude tenki sakrifika a’an hodi kontribui ba funsionamentu ekonomiku rai doben TL liu hosi area hanesan agrikultura, pekuaria, mekaniku, badaen, emprezariu nomos ideia inovativu hodi kria servisu ba a’an rasik no ba timoroan sira seluk.(Reportájem Aderito Ximenes)
Ita nia komentariu konaba post ne'e.