Luta Ba Dezempregu, Partidu Os Verde’s Simu Tan Militante

(Reportajen Estajiada Mariquita-Nuryanti-Mario Pereira)

Dili ( Media ONE Timor ) – Hakarak responsabilidade luta ba Joventude dezempregu sira, ne’ebé loron-loron aumenta ba bei-beik iha rai laran, nune’e Partidu Politíka Os Verde’s simu tan militante sira ne’ebé maioria joventude hodi hamutuk depende moris di’ak povu Timor-Leste (TL) nian.

Lee Notísia Relevante: Fasilita Foin Sa’e, Parpol Os Verde ‘Loke Liras’ Ba Mundu

Tuir Presidente Partidu Os Verde’s Antonio Lelauno da Costa Crus ho ninia Vise Presidente Paulo Lemos Maia no Vice- Presidente Seles Ribeiro hatete, atu manan luta kontra dezempregu iha TL Os Verde’s tenki hetan partisipasaun maximu hosi Timor-oan sira hodi manan eleisaun parlamentar iha loron 21 Maiu 2023.

Esplika Presidente Partidu Os Verde’s Antonio Lelauno da Costa Crus iha ninia intervensaun bainhira fó posse ba Vise Prezidente V no VI iha Bairu BTN 3, Aldeia Terra Santa, Suku Madohi,  iha Semana dahuluk Fulan Abríl 2023 hatete, sei luta maka’as ba Joventude sira nia moris ho dignu.

“Joventude sira la-iha kualidade moris ne’ebé as. Nune’e Joventude barak maka infrenta moris defisil iha rai laran. Partidu Os Verde’s hanesan partidu politiku ida ne’ebé sei konsisten hakarak defende no luta ba Juventude dezempregu sira nia problema iha Timor-Leste”, tenik Antonio.

Katak Antonio, luta ba dezempregu iha rai laran sei bele atinji, kuandu hetan kadeira hodi ba tuur iha Parlamentu Nasionál (PN). Tanba ne’e maka sira orgullu ba Joventude sira ne’ebé maka hakarak involve an iha Partidu Os Verde’s.

Antonio dehan, programa partidu politikus Os Verde’s nian maka tenki hetan konfiansa husi povu para bele realiza objetivu hodi fó servisu ba Juventude dezempregu sira ne’ebé maka dau-daun ne’e infrenta hela.

“Nune’e liu husi serimonia posse ba Vise Presidente Juventude nasionál V to’o VI ho ninia estrutura iha Suku Madohi, katak partidu Os Verde’s fó konfiansa tomak ba Vise Presidente sira atu bele halo servisu maka’as liu tan”, Antonio haktuir hodi ezizi.

Nia dehan, servisu maka’as ne’e para bele hetan konfiansa husi povu. Liu-liu ba Juventude sira iha suku Madohi hodi bele manan iha eleisaun Parlamentar ne’ebé sei hala’o iha loron 21 Fulan Maiu Tinan 2023 ne’e.

Antonio konta, Partidu Os Verde’s ne’ebé inspira husi movimentu partidu Verde’s iha mundu ne’ebé halibur a’an iha Global Green, sai ona organizasaun politika partidariu  ho natureza permanente.

Hanesan públika tiha ona iha www.mediaonetimor.co ne’e katak, Partidu Os Verde’s hari’i iha loron 13 Marsu 2020 iha Fatumea Bei-lulik leten, Postu Administrativu Suai, Munisipiu Covalima. No rejistu ona hodi hetan konfiansa husi Tribunál Rekursu iha loron  24 April 2022.

Iha parte seluk Vice Presidente Partidu Os Verde’s, Paulo Lemos Maia ne’ebé foin maka simu posse ba Media ONE Timor deklara, hamrik hanesan Joven hodi luta ba nasaun la-tauk ba lia lo’os. Prontu mate no hamrik hodi defende joventude dezempregu sira.

“Kna’ar foun nu’udar Vise Prezidente Partidu Os Verde’s,  ida ne’e ami simu tamba hakarak responsabilidade atu luta ba Joventude dezsempregu sira ne’ebé maka dau-daun ne’e hasoru hela situasaun moris defisil iha rain laran”, tenik Paulo.

Nia hateten, hamrik hanesan Joven hodi luta ba nasaun, la tauk ba lia lo’os. Prontu mate no   hamrik hodi defende Joventude dezempregu sira. Joventude barak maka moris defisil. Susar atu moris dignu nu’udar sidadaun iha nasaun independente. Tanba osan laiha atu sustenta moris.

Lia fuan hanesan mós hato’o husi Vice Prezidente seluk, Seles Ribeiro. Nia husu ba Joventude no família dezempregu sira atu lolo liman ba malu iha forsa ida hodi fó vitoria ba Partidu Os Verde’s.

Katak Seles, Partidu Os Verdes tenki manan iha eleisaun parlamentar iha loron 21 Maiu 2023 para  lori povu  nia lian, povu nia halerik no mós hasai Joventude husi dezempregu ne’ebé dau-daun ne’e sira infrenta hela.

Kona-ba knar nu’udar Vise Prezidente ne’e katak Seles, nia substitui de’it prezidente partidu iha  impedementu temporariu no permanente.  Partidu Os Verde’s sei dezempeña funsaun politika sira ne’ebé presidente Partidu Os Verde’s attribuì ona.

Molok atu remata serimonia posse ne’e, Presidente Partidu Os Verde’s entrega sertifikadu besik 1.000 resin ba militante no simpantezante sira. Nune’e sira sei servi nafatin ba partidu  Os Verde’s iha futuru. Partidu Os Verde’s nia lema mak verde’s ba ema hotu, buras, matak no malirin.(Asesu Youtube/Facebook https://www.facebook.com/Media1Timor Media ONE Timor)