(Reportajen Marcelino Tomae/ Editor Suzana Cardoso)
DILI (Media ONE Timor) – Nu’udar instutuisaun Públiku no ensinu superior públiku ninian maka estudante iha Universidade Nasionál Timor Lorosa’e (UNTL) selu, ne’e previleiju uitoan. La hanesan ho institutu privadu sira.
“Mais selu tiha maka instituisaun públiku ka ensinu superior públiku ninian ne’e mak halo lakon tiha estudante sira nia osan ne’e problema”, membru Parlamentu Nasionál (PN) hosi Bankada Partidu Demokratiku, Deputadu António da Conceição alias Kalohan kasu lia ne’e ba Jornalista iha uma fukun PN Kinta,(09/06/2022).
Lee Notísia Relevante: Estudante Halo Manifestasaun Kontra UNTL
Hanesan públika ona iha www.mediaonetimor.co edisaun, Kuarta (08/06/2022) katak, estudante Universidade Nasional Timor-Lorosa’e (UNTL) hosi Departementu Siencia Saúde la simu manuál durante tempu orientasaun, maske sira hatama osan dollar haat. Nune’e iha loron Kuarta, (08/06/2022) sira halo minfestasaun hodi eziji atu UNTL tenke fó fila sira nia osan ne’e.
Nune’e Deputadu António da Conceição alias Kalohan konsidera manifestasaun estudante UNTL ne’e sira nia direitu atu ejiji ba sira nia osan ne’ebé laiha rezultadu. Tanba iha ne’ebé de’it estudante universitariu sira tenke livre atu espresa sira nia hanoin.
Tuir Eis Ministru Edukasaun ne’e nia esplikasaun, estudante UNTL kada trimetre selu 30 USD. Maibé iha pagamentu seluk maka laiha rezultadu maka Instituisaun UNTL tenke fó fila fali estudante sira nia osan ne’ebé la konsege produs manual ne’e.
“Orsamentu ministériu ninian ne’e, Parlamentu Nasionál aprova no promulga ona iha fulan Janeiru 2022. Signifika, iha fulan Juñu agora daudauk ne’e tama iha orsamentu Jerál estudu 2022 nian foin hahú ninia ezekusaun”, dehan Deputadu Kalohan.
Responde ba estudante UNTL hosi Fakuldade Ciensia no Saúde seidauk hetan almamater tuir Deputadu Kalohan nia haree iha tinan kotuk (2021) kompara ho tempu agora parese buat ruma la’o laloos. Nune’e estudante iha diretu atu halo manifestasaun.
Kona-ba salaun estudante la sufisiente, Deputadu Kalohan argumenta, estudante tenke hatene kondisaun iha rai laran. Tanba UNTL eskola públiku. Veteranu nia oan sira mós ezije atu tama iha ne’ebá, entaun sala ne’e konsidera sei la sufisiente.
“Ha’u hatene iha MSSI nia oin ne’e, Fakuldade medisina sira mak iha ne’ebá. Enjenaria sivil maka iha Hera. Nune’e, estudante husi fakuldade edukasaun, direitu no sira seluk mós tenke komprende. Tanba espasu mak hanesan ne’e ona. Fatin limita, estudante ho númeru ne’ebé boot”, katak Deputadu Kalohan.
Aproveita intervista ne’e, Deputadu Kalohan husu ba Institutu UNTL no Ministériu Ensinu Superior tenke iha jestaun no responsabilidade di’ak hodi hatene númeru estudante ho númeru dosente sira.
“Ba estudante UNTL, hothotu iha direitu atu husu saida mak falta iha universidade. Maibe nu’udar sidadaun presiza buka atu entende kondisaun universidade ninian. Tin-tinan governu sempre aprova orsamentu ba universidade. Fiar katak direitu Estudante sei rejolve”, katak Deputadu Kalohan hodi fó esperansa.(Asesu Youtube/Facebook Media ONE Timor)
Ita nia komentariu konaba post ne'e.