(Reportajen Guilhermino Ramos/Editora Suzana Cardoso)
Dili (Média ONE Timor) – Hafoin formasaun besik fulan neen iha Sentru formasaun téknika no Komunikasaun (Ceftec-sigla Portugues) hosi unidade ualu nian remata, Ministru Asuntu Parlamentár no Komunikasaun Sosiál (Mapkoms) Fransisco Martins da Costa Perreira Jeronimo sertifika formandu na’in 300-resin.
Ba formandu sira ne’ebé konsege remata hodi simu sertifikadu ne’e; Mapkoms Fransisco, Koordenador Ceftec Rafael da Silva Freitas no Diretora Institutu Nasional Mão de Obra (Indimo), I.P Isabel Fernandes de Lima iha sira nia intervensaun hato’o parabéns no votus suseisu iha era dijitalizasaun, Kinta, (24/11/2022) iha salaun Delta Nova.
Tuir Mapkoms Fransisco, sakrifisiu ne’ebé formandu sira halo bele transforma sosiadade Timor-Leste (TL) ba adoptasaun sistema analog ba dijitál tuir téknolojia moderna ne’ebé mundu hasoru.
“Média barak kontinua lao ho analog. Entaun, liu hosi formasaun ne’e bele kapasita Ita adopta sistema modern téknolojia medrna global. Sistema dijitál. Nune’e Ita adopta situasaun reál ne’ebé mundu hasoru. Maka nu’udar parte ida hosi mundu ne’e, jerasaun foun presiza hanoin Kritika”, Mapkoms Jeronimo hateten.
Haktuir Mapkoms Jeronimo, Governu eziste atu serbí povu no nasaun. Iha sistema demokrátika, povu mak soberanu hodi ezerse direitu ho konfiansa ba reprezentante ida hodi forma Governu. Nune’e ukun nain tenki presta komfidelidade ba povu.
Katak Mapkoms Jeronimo, sistema demokrátika fó dalan ba liberdade imprensa. Ema seluk bele kritika Governu tuir saida mak la benifisiu ba nesesidade povu nian. Tamba ne’e formasaun ba ajenti entidade estadu nian importante tebes. Nune’e liu husi formasaun ajente sira bele aplika. Prátika iha instituisaun ida ho kualidade.
“Hau agradese ba formador hotu-hotu, ne’ebé sakrifika ona imi nia aan liu husi formasaun Ceftec. Hodi trasforma rekursu umanu 300-resin ho kualifikadu. Ita hotu hatene katak planu anuál ba tinan 2022 ita halo de’it extensaun ida husi nivel munisípiu hosi haat sa’e ba neen. Tanba esforsu ho boa vontade no responsabilidade boot”, tenik Mapkoms Jeronimo.
Antes ne’e Koordenador Ceftec Rafael iha nia intervensaun hateten, Ceftec atribui sertifikadu ba formandus sira hodi kapasita liu tan sira nia abilidade no sosiedade. Kontinua dezemvolvimentu nasionál iha seitor komunikasaun sosiál, tantu públiku no privadu.
Relata Rafael, Ceftec iha Unidade ualu hanesan; multimedia, protokolu, televizaun, radiu, hakerek lian tetun ba jornalizmu, hakerek lian portuges ba jornalizmu, hakerek imprensa no relasoens internasionas.
Ba tinan 2022 katak Rafael, Ceftec produs formandu iha nivel nasional na’in 281. No restu husi Munisipiu; Manatutu, Baukau, Lautem, Bobonaro, Dili no RAEOA. Hamutuk formandu na’in 323. Kompostu husi mane 159 no feto 166. Sira ne’e mai husi liñas ministeriais, seitor publiku no municipal. Inklui Jornalista. Iha munsipiu hetan formasaun unidade multi media, relasoes publikas no protokolu nian.
Sentru formasaun estadu nian ne’ebé hetan ona akreditasaun hosi Indimo katak Rafael, “Nafatin tau atensaun no rekezitu tomak hodi asegura formasaun ba formandus hotu. No sei kontribui direita kompetensia abilidade profisionál formandus sira nian hodi hatan ba area servisu komunikasaun sosiál iha Timor-Leste.”
Nia hatutan, Ceftec nafatin buka dalan para kanaliza didi’ak profisionál espesialidade iha seitor publiku no privadu. Nune’e abilidade ne’ebé sira hetan sei utiliza ba iha komunidade no ba sira nia instituisaun.
Relasiona ho tema atribuisaun sertifikadu hosi Ceftec 2022 nian ‘hakle’an profesionalizmu, adapta mudansa téknolojia dijitál katak Diretora Indimo Isabel, TL adere on aba ASEAN. Nune’e kompetisaun sei todan liutan. Iha era dijitalizasaun tenki forte.
“Nune’e sentru formasaun iha area hotu-hotu. Inklui formasaun iha komunikasaun sosiál, atu reuni nia esforsu koletiva hodi bele promove, prezerva, kualidade no inkluzividade tuir padraun nasionál ba to’o rejionál no internasionais,” dehan Isabel hodi hatutan.
Adeziaun TL ba ASEAN obriga mestri, formador, estudante no sira ne’ebé tuir kursu tenki kualifadu. Iha formasaun professional, koalia kona-ba kompetensia ema nian. La’os kualifikadu de’it. Maibé kompetensia atu kompete.
Nune’e katak Isabel, tama mundu merkadu servisu nian iha ASEAN tenke iha servisu na’in (mão de obra) ne’bé kualifikadu para prontu atu kontribui ba dezemvolvimentu ekonomia iha rejiaun.
“Ohin loron komunidade ASEAN moos koko ba promosaun no integrasaun abilidade verde ka green job, dijitalizasaun, inkluzasaun sosiál, emprenderizmu iha padraun ba kurikulum formasaun sira. Hodi prepara mão de obra ne’ebé kualidade. Prontu nafatin hodi kontribui ba dezemvolvimentu ekonomia iha rejiaun”, katak Isabel hodi hatutan.
Entertantu Ceftec rasik oferese formasaun hosi nivel nasionál to’o munisipiu maka hanesan; unidade formasaun Portugés jornalismu, Komunikasaun no relasaun públika protokolu, multimedia, Hakerek imprensa, Radiu, Televizaun, no unidade Komunikasaun iha situasaun krizi,. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.