(Reportajen Jornalista Mariquita Freitas)
Maubisse (www.mediaonetimor.co) – Asegura jornalista sira nia privasidade ba asesu informasaun liu husi média sosiais maka ABC Internasionál Development koopera hamutuk ho Konsellu Imprensa Timor-Leste (KITL) realiza formasaun Jornalista prevene an iha espasu online.
Haktuir Prezidente KITL, Otelio Ote no Formadora ABC International Development, Fiona Churchman bainhira loke formasaun ne’e iha Dili no Postu Administrativu Maubessi, Munisipiu Ainaro foin lalais ne’e katak, formasaun ne’e atu fó kuñesementu ba jornalista sira kona-ba uza espasu online ho seguru.
Prezidente KITL, Otelio Ote esplika liutan, formasaun kona-ba Jornalista prevene an iha espasu online ne’e atu aumenta sira nia kuñesimentu hodi jere no públika informasaun iha média sosiál ho seguru. No moos Jornalista sira sei jere hodi prevene an iha asuntu privadu nian.
“Hanesan ita hotu hatene, ameasa husi média sosiál hahú mosu ona. Ameasa ne’e nia objetivu atu limita jornalista sira halo kobertura. Liu husi formasaun ne’e, jornalista sira bele ses an no hatene atu prevena an husi ameasa hirak ne’e”, Otelio Ote dehan.
Katak Otelio Ote, jornalista feto sira sempre hetan ameasa ne’ebé liga ho kobertura no moos sira nia produtu jornalistiku. Maka, formasaun ne’e importante hodi kapasita jornalista feto sira atu bele prevene an husi ameasa hirak ne’e.
Tanba ne’e hatutan Otelio Ote, ba média 16 ne’ebé maka delega sira nia jornalista mai partisipa iha formasaun ne’e, hein katak bele fahe tutan ba sira nia maluk jornalista seluk iha média hirak ne’ebé sira haknar an bá. Nune’e formasaun ne’e bele benefisia ba jornalista hotu-hotu iha Timor-Leste.
Média 16 ne’ebé maka tuir formasaun ne’e mak hanesan; Media ONE Timor, RTTL,E.P, GMN TV, Timor Post, Dili Post, Jornal Independent, Loluwari, Lafaek News, Sap News, Neon Metin, Media Mudansa, Media Labeh, Radio Komunidade Liquiça, Radio Komunidade Aileu, Radio Komunidade Maubisse no Radio Komunidade ema ho defisiénsia.
“Ha’u nu’udar jornalista sente kontente ho formasaun ne’e. Tanba, bele kapasita no aumenta ha’u nia kuñesimentu utiliza média online. Utilizasaun online nia pozitivu mak bele hetan informasaun barak no lalais. No hases an husi parte negativu mak, iha média sosiál dalaruma mosu informasaun falsu ka hoax”, tenik Otelio Ote.
Iha parte seluk formadora ABC Internasionál Development, Fiona Churchman hatete, formasaun ba jornalista sira ne’e foka liu ba seguransa utilizasaun média sosiál iha espasu online nian. Atu fó mos kuñesimentu ba jornalista sira iha munisípiu no postu, hodi bele prevene an iha espasu online.
“Tanba ne’e mak ABC International development kapasita jornalista sira atu asegura espasu online. Liu-liu, ba jornalista sira ne’ebé uza média sosiál hodi asesu ba informasaun atu bele kuidadu an rasik iha espasu online nian”, Fiona argumenta.
Hatete Fiona, ABC Internasionál Development halo parseria ho konsellu Impresa durante tinan rua ona. Durante tinan rua ne’e, fó ona formasaun hodi kapasita jornalista barak ho topiku diferente. Kapasitasaun ne’e hala’o ona iha munisípiu Bobonaro, Baucau no Munisipiu Ainaro.
Fiona hatutan, formasaun ne’ebé fó ona ba jornalista sira iha Timor-Leste maka hanesan; formasaun reportajen investigativu, reportajen ba eleisaun no formasaun reportajen inkluzivu. Tuir planu, sei realiza tan formasaun ba jornalista Plataforma dijitál.
“Durante ne’e ami nia kooperasaun ho Konsellu Imprensa Timor-Leste mak halo ona formasaun barak. No iha futuru ami sei nafatin fó formasaun hodi kapasita nafatin jornalista iha Timor-Leste. Liu-liu ba asuntu hirak ne’ebé nesesariu ba jornalista sira. Daun-daun ne’e, presiza liu maka formasaun plataforma digitál nian”, Fiona esklarese. (Asesu Youtube–https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.