(Reportajen Jornalista Estajiada Media ONE Timor-Francisca Ximenes)
Dili (www.mediaonetimor.co) – Deziminasaun informasaun kona-ba IX Governu Konstituisionál nia programa ba públiku importante, hodi hetan partisipasaun maximu ba progresu dezemvolvimentu. Maka, Secoms (Secretário do Estado da Comunicação Social) kontratu ho média plataforma dijitál hodi halo publikasaun publisidade.
Média ho plataforma dijitál hirak ne’ebé maka sei públika públisidade ba programa Governu rona no hare rasik ne’ebé sei produs hosi Secoms mak Grupu Media Nasionál (GMN) no Televizaun Edukasaun Timor (TVET).
Enteratantu média ho plataforma dijitál 10 seluk, hanesan; Media ONE Timor, SMNews, VIP TV, Lafaek News, Lian Orluli, Gardamor TV, Media Mudansa, Tatoli,I.P, SAPNews, Hatutan.Com, sei públika públisidade liu hosi programa advertoriál.

“Governu fó fiar ba ita boot sira (média plataforma dijitál 12-Red) hanesan Governu nia matan no tilun atu hatutan informasaun ba ita nia sosiedade”, hatete Sekretáriu Estadu Secoms, Expedito Loro Dias Ximenes iha ninia deskursu hafoin remata selebra asina akordu ho média plataforma dijitál hirak ne’e, iha Palasiu Governu, Tersa, (11/03/2025).
Kontratu ne’ebé hala’o hodi hametin parseiru ho média plataforma dijitál ne’e Secoms Expedito esplika liutan katak, durante hala’o servisu média nian tuir ida-idak nian plataforma, presiza publisidadade.
Liu-liu, katak Secoms Expedito, téknolojia ne’ebé mudansa hela deit sei sai dezafiu ba média sira, iha kestaun reseitas ninian. Nune’e, Secoms haree liu ba dezempeñu no esforsu tomak atu sai média ne’ebé professional, maka Secoms fó fiar ba média Plataforma dijitál 12 ne’e hodi sai parseiru no moos ponte komunikasaun liu husi informasaun entre Governu ho komunidade no moos sosiedade sivil sira.
Ponte ida ne’e katak Secoms Expedito maka media sira, hodi halo komunikasaun ho komunidade nia perokupasaun, lamentasaun no difikuldade. Maka, média plataforma dijitál sira labele hare ba kuantidade osan ne’ebé Governu fó liu husi publikasaun públisidade ne’e.
Maibé Secoms Expedito dehan, tenki tau atensaun liu ba kooperasaun ne’ebé bele fortifika entre media ho nia parseiru estratejiku hanesan Governu, hodi bele habelar informasaun kona-ba atividade; governu, sosiedade no moos atividade komunidade nian sai efetivu no efisiensia liu tan.
“Mudansa téknolojia ho era dijitalizasaun ne’ebé ita koñese daun-daun ne’e, média plataforma dijitál maka lalais liu kompara ho média konvensionais sira. Hanesan Jornál, televizaun no radio dala barak presiza tempu”, Secoms Expedito hatete hodi hatutan tan.
Maske ezizi tenke lalais, maibé média Plataforma dijitál sira presiza produs notísia ho karakter investigativu. Informasaun sira tenki halo konfirmasaun. Tamba iha prinsipiu jerais polítiku jornalizmu nian hatur ona katak, “Tenke respeita ba sosiedade ne’ebé hakarak atu hetan informasaun ne’ebé konfiavel no dignu. Labele halo sosiedade duvida fali ho informasaun.”
Katak Secoms Expedito, média plataforma dijitál 12 ne’ebé hetan fiar ne’e labele públika informasaun hirak ne’ebé fó duvidas iha sosiedade nia leet. Média plataforma dijitál 12 ne’e tenki hala’o misaun jornalistiku ho professionál. Laos tanba apoiu publisidade ne’ebé Governu fó.
“Hein katak média plataforma dijitál hirak ne’ebé asina ona kontratu servisu hamutuk ne’e, bele hametin liutan demokrasia iha Timor-Leste”, Secoms Expedito dehan hodi hatutan tan, maske nune’e Governu nia apoiu ne’e laiha intensaun atu interven ba média nia politika editoriál.
Maibé Secoms Expedito husu ba média sira atu publika informasaun notísia sira, presiza halo investigasaun. Tenke halo konfirmasaun hodi iha balansu. Labele rona isu ka rumoris de’it halo ona notísia. Tanba, notísia tenki iha dadus no bazeia ba faktus.
Hatete Secoms Expedito, publikasaun notísia liu husi jornalista sira presiza halo investigasaun ba informasaun hirak ne’ebé hetan. Informasaun ne’e sei duvida ba jornalista nia an rasik karik, tenke investiga. Média labele lalin informasaun falsu ba komunidade nia leet.

Iha momentu ne’e, Secoms Expedito reprezenta IX Governu Konstituionál promote sei nafatin fó apoiu ba média sira. Sei nafatin halo komunikasaun di’ak to’o mandatu ne’e ninia rohan. Esforsu hotu sei halo, maske ho orsamentu ne’ebé la hanesan kada tinan.
Iha tinan 2025 katak Secoms Expedito, admisaun orsamentu ba ministériu hotu-hotu, inklui Secoms iha redusaun. Nune’e akordu publikasaun publisidade ba servisu hamutuk ne’e moos hetan admisaun ba programa Governu hare rasik, Governu Rona no publisidade advertoriál de’it.
Kona-ba Governu kontratu Governu hanesan Tatoli,I.P ne’ebé hetan ona orsamentu Estadu nian, katak Secoms Expedito, Secoms halo kontratu ho Tatoli,I.P tanba iha pajina ketak ida tan hodi halo instrumentu no habelar informasaun ba públisidade nian. Maibé, advisoes kontratu la-halo ba RTTL,E.P (Radio Televizaun Timor-Leste, Empreza Públiku) tamba hetan ona orsamentu Estadu.
Iha parte seluk lori IX Governu konstituisionál nia naran, Secoms Expedito promete sei koopera hamutuk ho Konsellu Imprensa Timor-Leste (KITL) hodi fó formasaun ho karakter investigativu ba média sira.
Tamba hatete Secoms Expedito, publikasaun notísia ho karakter investigativu ezizi jornalista sira tenki hala’o nia servisu professionál ne’ebé as. Média sira tenki iha jornalista ho kapasidade; intelektuál katak tenke analiza bainhira produs notísia. Tenki iha kapasidade profisionál no kapasidade tékniku hanesan; domina espasu dijitál ne’ebé uza iha média online nian.
Ba VIP TV Dijitál, Diretora Media ONE Timor, Suzana Cardoso apresia ho kooperasaun ne’ebé IX Governu Konstituisionál nafatin fó apoiu liu husi Secoms. Maske iha redusaun ba apoiu publikasaun publisidade nia orsamentu ki’ik liu kompara ho tinan 2024.
“Maibé iha kontiudu publikasaun públisidade nian ne’ebé foka liu ba News feature’s sei fó vantajen di’ak ba media sira. Indika katak fó vantajen ba ita (media-Red) sira atu haklean informasaun sira. No tenki iha koñesementu di’ak liu tan kona-ba halo notisia iha feature’s nian”, Jornalista señior ne’e dehan.
Katak Suzana, diferente seluk ba apoiu publikasaun publisidade tinan 2025 nian ne’e maka Secoms sei prepara publisidade advertoriál nian. Espera preparasaun ne’e bele responde ba politika redasaun husi média plataforma dijitál ida- idak nian.
Hatan kona-ba esperansa ba futuru média Plataforma dijitál nian reprezentante eleitu ba Konsellu Imprensa husi na’in ba media, Suzana hatete, promesa ne’ebé IX Governu Konstituisionál promote ona ba média sira iha Timor-Leste, espera sei nafatin halo to’o mandatu ne’e ninia rohan.
“Maibé Estadu no Governu moos tenki book an hodi hadia daun-daun ita nia ekonomia rai laran hodi fó apoiu ba sétor privadu sira, inklui Kompañia Média bele moris mesak hodi reforsa ita nia sosiedade ida moris ho edukadu ba matenek iha jestaun moris nian,” Suzana reforsa.
Aliende ne’e Suzana nia esperansa ba kooperasaun ne’ebé halo bele sai referensia ba ministériu seluk hodi promove sira nia programa annual hodi sai hanesan giau ida ba moris komunidade nian. No moos dada komunidade nia partisipasaun ho maximu ba prosesu dezemvolvimentu ne’ebé daun-daun ne’e lao hela. (Asesu Youtube–https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.