(Reportajen Jornalista Mariquita Freitas)
Dili (www.mediaonetimor.co) – Hametin kooperasaun bilaterál hodi apoia Timor-Leste (TL) nia servisu iha área importante sira, maka hamutuk embaixadór naun-rezidente husi nasaun 11 aprezenta sira nia karta kredensiál ba Prezidente Repúblika.
“Área prioridade sira ne’ebé Xefe Governu no Embaixadór sira aseita atu koopera servisu, sei aprezenta ba ministéria hotu-hotu atu halo preparasaun hodi to’o tempu asina akordu formál bele apar ho programa Governu no doadores sira nian apoia.”
Lia hirak ne’e hato’o husi Primeiru Ministru (PM), Kay Rala Xanana Gusmão ba Jornalista sira, hafoin remata enkontru semenál ho Prezidente Repúblika (PR), José Ramos Horta iha Palasiu Prezidente Aitarak Laran, iha semana da-toluk Fulan Fevereiru 2024.
Katak PM Xanana, PR Ramos Horta simu ona embaixadór 11 husi rai ne’ebé foin haruka sira nia embaixadór mai TL. Embaixadór hotu-hotu iha konfiansa ba atuál situasaun TL nian. Sira oferese iha área ne’ebé de’it mak bele kontribui.
PM Xanana hateten, área lubuk ida maka embaixadór hirak ne’e aprezenta. Mak hanesan; setór agrikultura, edukasaun, saúde no balun iha indústria, no mós formasaun rekursu umanu.
“Ha’u sei haruka ba ministériu hotu-hotu iha área ne’ebé sira oferese bele kontribui ba dezenvolvimentu”, PM Xanana informa hodi hatutan, hafoin aprezenta karta krezidensiál ba PR Ramos Horta, embaxadór hirak ne’e halo moos enkontru ho PM hodi ko’alia kona-ba apoiu hirak ne’e.
Maibé hatutan PM Xanana, embaxadór hirak ne’e apresia ba demokrasia iha TL. Tuir sira, demokrasia no rekonsiliasaun no mós pás iha TL sira konsidera nu’udar nasaun ida ne’ebé fó ezemplu di’ak.
Iha parte seluk PM Xanana informa kona-ba enkontru ho PR Ramos Horta, sira moos halo deskusaun kona-ba situasaun iha mundu, rejiaun, inklui TL atu tama ba Asosiasaun Nasaun Sudeste Aziátiku (ASEAN-sigla Inglesh) no adeasaun TL hodi sai memberu Organizasaun Mundiál Komérsiu (OMK).
PM Xanana informa, TL tenke prepara-an ba dezafiu boboot sira ne’ebé dau-daun ne’e mosu. Hanesan dezenvolvimentu nasaun nian, oin sá TL bele fó konfiansa ba ASEAN hodi simu sai membru no oin sá maka OMK bele favorese ba benefisiu nasaun no povu TL.
“Sai membru OMK bele fó benefisiu ba povu, maka Governu sei buka atu tau atensaun ba produtu lokál sira hodi ita bele transforma produtu sira ne’ebé povu agrikultór kuda sai aihan no bebida. Dezenvolve aifuan sira sai bebida hodi dudu setór privadu pequena ba media indústria. Nune’e, ema esranjeiru labele mai han fali supermie”, PM Xanana dehan.
Entertantu nasaun 11 ne’ebé maka aprezenta sira nia karta krezidensiál ne’e maka hanesan;
- Repúblika Arab Ejitu.
- Canada
- Dinamarka
- Repúblika Helenika (Grece).
- Repúblika Islamista, Iran.
- Repúblika Islamista, Pakistaun.
- Reinu Kamboja.
- Repúblika Demokratika Povu Laos.
- Repúblika Demokratika Povu Algeria.
- Repúblika Afrika Sul.
- Suesia. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.