MEDIAONETIMOR-Hafoin sidadaun Indonezia hosi Provinsia Aceh, Eri Jhonsyah hetan kapturasaun hodi tama sela, tuir planu ohin Loron Segunda, (31/07/2017) sei tuir julgamentu iha Tribunal Distrital Dili.
Eri hetan kapturasaun iha Kampu Alor, Aldeia 02 Hamahon, Suku 7 de Dezembro, Dom Aleixo, Dili, Sabadu, (29/07/2017), maizu menus tuku 12.30 OTL, wainhira komunidade haré nia oin foun hó atetude hanesan atu hipnotis ema seluk.
Iha tu’ur fatin ne’e besik hó ida hosi uma nain hó idade maizu menus 60. Eri tu’ur loke a’an halolo ain no liman, hafoin hasai osan U$0,25 sosa be’e iha kios laran. Tanba oin foun maka uma nain ne’e bolu nia oan feto sai hosi uma laran.
Oan feto ne’e haruka Eri sai hosi jardim ne’e tanba hahalok fó deskonfia ba uma nain ne’ebé tauk hó nia prezensa. Eri sai ba estrada ibun hasoru malu hó joven seluk. Haré oin foun joven ne’e tenta hasai foto hó telemovel.
Haré ne’e, Eri hirus hodi duni malu hó jovem ne’e to’o amiasa hodi dehan, “Kamu jangan lari. Nanti saya tembak mati kamu. Sekarang kamu tunggu saya telefon, saya telefon intelejen.”
Hosi duni malu ne’e, komunidade nadodon mai hobur Eri. Sira dada Eri tama fali ba fatin antes ne’e hodi husu konaba ninia prezensa iha fatin ne’eba. Ba Media One Timor Eri esplika katak, nia mai TL lori investor hosi Singapur hó Indonezia atu dezemvolve nasaun ne’e.
Lakleur mosu iha fatin kapturasaun, Segundu Komandante Superitendente PNTL, Euclides Belo. Nune’e komunidade sira intrega direta ba prosesu tuir lei ne’ebé vigora iha Timor-Leste (TL).
“Sei nia iha sala hau bele kontaktu ba Kedutaan Besar Republik Indonesia (KBRI). Kaer aperta deit. Timor labele bandidu. No ema estranjeiru mós labele mai bandidu iha ita nia rain. Ita prevene para ita nia rain aman ba oin. Kaer hó liman. Labele baku ka oho tiha, maka fó hatene ba Polisia. Ida ne’e krimi,” esplika Euclides ba komunidade iha ne’eba hodi obrigadu.
Sei hosi observasaun Media One Timor iha Eskuadra PNTL Aimutin Comoro nota katak, Polisia husu pergunta ba Eri no pasa revista ba sasan hirak ne’ebé nia lori nu’udar evidensia ba kontinuasaun ba prosesu julgamentu.
Aliende ne’e Polisia bolu mós sidadaun timoroan, Sidonia de Carvalho ne’ebé nia kartaun hetan iha pasta laran. Tuir Eri nia konfesa katak, Sidonia maka fó garantia ba Eri hodi tama mai TL. No polisia mós konfirma ba numeru kontaktu hó naran Xanana Costa ne’ebé Eri uza telefone ba hodi amiasa jovem ne’e.
Maske nune’e Eri nia oin lahatudu atu tauk ka senti sala. Nia bain-bain deit no brani lo’os hó matan naklosu hateke ba Polisia sira no komunidade ne’ebé kaer nia. Eri senti bain-bain deit.(Reportájem Mario Lobo)
Ita nia komentariu konaba post ne'e.