(Reportajen Jornalista Estajiada Francisca Ximenes-Melania Dos Santos)
Dili (www.mediaonetimor.co) – Instituisaun Radio Televizaun Timor-Leste, Empreza Públiku (RTTL,E.P.) hetan finansiamentu husi Governu Timor-Leste (TL), nune’e komisaun organizador jogu CPLP (Comunidades Dos Países Da Lingua Portuguêsa) fó fiar ho orsamentu hamutuk U$50,000.00 hodi halo transmisaun direta no mos fornese out put hamutuk 20 ba media nasionál no internasionais sira.
Lee Notísia Relevante: MJDAK Sei Aloka Osan ba Transmisaun Jogu CPLP
Tuir Koordenador Jerál Jogu Desportivu CPLP, atuál Sekretariu Estadu Arte no Kultura (SEAK), Jorge Soares Cristavão no Presidente RTTL, E.P, Elizeu Isaac Fernandes iha serimonia asina akordu servisu hamutuk entre Komisaun organizadora ba jogu desportivu CPLP ho RTTL,E.P hatete, liu husi kooperasaun ne’e sei hasa’e liutan kualidade públikasaun informasaun durante jogu desportivu CPLP.
SEAK Jorge hatete, osan ho montante US$50,000.00 ne’ebé fo husi komisaun organizador jogu CPLP ne’e hodi fasilita RTTL,E.P ba sira nia fasilidade hirak ne’ebé sei menus.
Nune’e hatutan SEAK Jorge, RTTL,E.P, fasilidade ne’ebé kompletu sei reforsa liutan servisu jestaun iha media center jogu CPLP nian. Liu husi, kanaliza output ba média nasionais no internasionais sira. Tamba, RTTL,E.P iha ona esperiensia iha vizita Sua Santidade Papa Francisco mai TL iha fulan Setembru, tinan 2024 liu ba.
“Razaun hili RTTL,EP tamba RTTL,E.P hetan fiansiamentu husi Estadu. Akordu ida ne’e deskrita orsamentu oit’oan laos orsamentu boot. Transparensia valor orsamentu ne’ebé tau ba RTTL,E.P hamutuk US$50,000.00 ne’e, hodi apoiu servisu ekipa tekniku sira ne’ebé sei hahú husi loron 17 to’o 29, Fulan Jullu tinan ne’e”, SEAK Jorge deklara.
Hanesan públika tiha ona katak, jogu desportivu komunidade País Lian Portugés (CPLP) 2025 sei hala’o iha Dili, TL, iha loron 17 to’o 27 fulan Jullu. Jogu ne’e sei sai hanesan edisaun ba dala 12. Nasaun CPLP ne’ebé maka sei partisipa; Angola, Cabo Verde, Guiné-Bissau, Equate, Guiné, Portugál, Mosambiqui, Sáo Tome Príncipe, no TL. Maibé Brazil, seidauk hetan konfirmasaun.
No desportu sira ne’ebé konfirmadu ba jogu sira maka: atletizmu, atletizmu adaptadu, futeból (sub-16), basketebol, voleiból tasi-ibun, xadrez, karate, no taekwondo. Governu TL prepara hela atu sai uma-na’in ba eventu ne’e, ho orsamentu dolár amerikanu millaun 3,7 ne’ebé prevee ba komisaun organizasaun.
No fasilita média nasionais no internasionais sira seluk bele halo públikasaun notisia ho di’ak maka RTTL,E.P sei fasilita totál out put 20.
SEAK Jorge hatutan, durante jogu desportivu CPLP ne’e sei fó atensaun mos ba publisidade média komunikasaun nian. Hanesan, fatin ba joranalista no kamera sira nian durante jogu sira. Liu-liu, iha stadion Dili no kampu demokrasia. No mos iha GMT, Dili, kampu volibola nian.
Maibé atu publikasaun informasaun ba jogu desportivu CPLP ne’ebé sei hala’o iha loron 17 to’o loron 27 fulan Jullu ne’e lao ho diak liutan katak SEAK Jorge, média sira sei halo tray out hodi koko fasilidade husi kampu desportivu liga mai to’o iha media center iha CCD.
“Servisu téknika barak mak lao tiha ona. Ita hein tempu jogu desportivu CPLP nian to’o, ita mai halo servisu deit. No presiza halo try out hodi koko ekipamentu ne’ebé mak iha input. Bainhira balu maka jornalista sira husu atu presiza ekipa tékniku sira atu hadia, maka ita sei buka mekanizmu hotu hodi bele hadia antes”, SEAK Jorge dehan hodi hatutan.
Nune’e, bele transmiti ba sosiedade iha rai laran no rai liur ba atividade desportivu ne’ebé lao hela iha TL. No ema internasional sira hakarak akompaña progresu sira ho diak. Iha output 20 maka prepara ba média internasional no media nasional sira bele foti hodi halo transmiti liu husi sira nia kanal rasik.
Jogu CPLP ne’ebé sei hala’o hahú husi loron 17 to’o 29 fulan Jullu tinan 2025 ne’e tuir SEAK Jorge katak, komisaun organizadora mos prepara media center hodi halo jestaun ba média nasionál no internasionál ba publikasaun informasaun.
“Natureza servisu hamutuk ho RTTL,E.P hodi bele fasilita hosting (lian Inglesh) ba média hotu-hotu, tantu média nasionál no média internasionál. Tamba hosting ne’e mai hosi média ida de’it iha media center maka sei fahe tutan ba média sira seluk”, SEAK Jorge dehan.
Jogu CPLP ne’e katak SEAK Jorge, laos fó sai de’it iha média nasionál. Maibé, RTTL,E.P koopera ho média sira husi Indonesia, Portugal no Australia. No agradese ba média husi ABC ID Australia no Portugal ne’ebé apoiu mos ba RTTL,E.P.
“Jogu CPLP ne’ebé mak sei realiza nia abertura iha loron 19 fulan Jullu 2025 ne’e, sei realiza modalidade ualu. No sei partisipa atleta besik nain 500-resin. Maka Timor-Leste hanesan uma nain ba eventu ne’e tenki koopera hamutuk hodi lao diak liutan”, SEAK Jorge deklara hodi hatutan.
Aliende ne’e husu ba RTTL,E.P atu fasilita no fó atendementu ne’ebé professionál ba média nasionál no internasionál sira, atu nune’e eventu internasionais hanesan jogu CPLP ne’e bele hetan atensaun husi mundu internasionais.
Iha parte seluk Prezidente RTTL,E.P, Elizeu Isaac Fernandes hato’o agredese ba ekipa servisu ne’ebé estabelese ona asina akordu hodi fó kunfiansa tomak ba RTTL,E.P hodi halo transmisaun direta ba jogu CPLP tinan 2025 iha Dili.
“Liu hosi asina akordu ne’e, RTTL,E.P halo komitmentu ba komisaun no estadu katak, RTTL,E.P prontu ho forsa no tékniku sira hotu no mos prontu ona atu bele apoiu totál ba eventu jogu CPLP nian ne’e”, Elizeu hatete.
Aliende ne’e lori RTTL,E.P nia naran, Elizeu mos promote ba parte governu nian hodi hato’o komitmentu prontu 100% fó apoiu maximu ba eventu jogu CPLP nian ne’ebé mak estadu RDTL sei realiza iha loron 17 to’o loron 29 fulan Jullu tinan 2025 ne’e.
Ba média sira seluk Elizeu dehan, sei fasilita hodi média sira ne’ebé ho Plataforma dijitál bele hatan output hodi fornese informasaun ba komunidade hotu-hotu liu husi ida-idak nia kanais. Inklui, média internasionais sira. (Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.