(Reportajen Marcelino Tomae/ Editor Suzana Cardoso)
DILI (Media ONE Timor) – Atu evita Timoroan sira lalika sai hotu ba rai liur hodi ba buka servisu, maka husu VIII governu konstituisionál atu loke kampu traballu ba juvetude sira iha Timor-Leste (TL).
Hateten Deputadu hosi Bankada Kmanek haburas unidade nasionál Timoroan (KHUNTO) Deputadu Luis Roberto no Deputadu hosi bankada Frente Revolusionáriu Timor-Leste Independénsia (Fretílin) Fabião de Oliveira ba Media ONE Timor iha fatin la hanesan iha uma fukun Parlamentu Nasional (PN), Kuarta (08/06/2022).
Relasiona ho joven ne’ebé fulan-fulan sai beibeik ba rai liur hodi halo nasaun TL sei mamuk, Reprezentante povu hosi Bankada KHUNTO, Deputadu Luis Roberto husu VIII governu konstituisionál tenke loke kampu traballu ba juvetude sira iha Timor-Leste (TL), nune’e sira lalika ba beibeik nasaun seluk.
“Ida ne’e loke ona ita nia estadu nia matan ho nia hanoin atu halo oinsá para bele kria kampu traballu iha rai laran, liu husi aproveita riku soin rai laran nian hodi loke kampu servisu”, dehan Deputadu Luis.
Nia hatutan, hahú husi Prezidente Repúblika ba to’o partidu polítiku sira atu labele halo komprimisu iha palku polítiku hodi halo komprimisu ba povu katak, kuandu eleitu sei halo negosiasaun ho nasaun viziñu sira para atu servisu iha rai li’ur.
“Ida ne’e signifika ita atu hamamuk ita nia rai laran. Maski nia benifisiu ba ita nia nasaun, maibé ne’e fó impaktu negativu mai TL. Tanba ita nia joven sira sei sai hotu ba liur ne’ebé mak ba servisu iha ne’ebá. No signifika ita nia nasaun Timor labele loke kampu traballu ba joven sira iha rai laran”, nia dehan.
Nune’e hanesan reprezentante povu, Deputadu Luis husu ba estadu no órgaun sira hotu, liuliu governu para tenke kria kampu traballu ba joven sira atu nune’e joven sira kada fulan no kada tinan labele sai beibeik ba nasaun seluk.
“Hanesan akontesimentu iha Bekora. Timoroan barak maka teste para sai ba rai li’ur. Ba Korea ninian. Balu to’o hetan kanek tanba tuda malu no dudu malu. Ne’e loke lideransa sira nia hanoin. Tantu governu no moos estadu ida ne’e presiza kria kampu traballu iha rai laran hodi minimiza joven sira labele sai beibeik ba nasaun sira seluk,” tenik Deputadu Luis hodi hatutan.
Labele fó dalan ba ita nia joven sira ba bebeik iha rai li’ur. Tanba lakleur tan ita nia nasaun ne’e bele mamuk. Joven laiha tanba hotu-hotu hakarak ba buka osan iha rai li’ur.
Iha fatin la hanesan tuir Bankada Frente Revolusionáriu Timor-Leste Independénsia (Fretílin) Fabião de Oliveira katak labele haree katak hotu-hotu ba liur maka foin atu buka servisu. Ne’e ladún di’ak. Tanba Timor mós iha servisu barak.
“Ha’u nia hanoin VIII governu konstituisionál ida ne’e, neineik sei loke kampu traballu ba joven sira. Maske dala ruma ita nia joven sira mak sente katak salariu ida boot liu ne’e mak ba Australia ka ba Irladia no Korea”, nia dehan.
Nia salienta, joven sira ne’ebé mak ba nasaun seluk ne’e, tuir formasaun kona-ba kursu Inglesh no Portugés depois mak governu haruka joven sira ne’ebé tuir formasaun nian.
“Ha’u hanoin governu mós iha ona hanoin atu loke kampu traballu ba joven sira atu servisu nafatin iha rai laran. Tanba, orsamentu jerál estadu ninian agora no mós orsamentu retifikativu. Osan sira ne’e sei rezolve neineik emprezariu sira sei loke sira nia kampu traballu.(Asesu You Tube/ Facebook Media ONE Timor)
Ita nia komentariu konaba post ne'e.