Polisia Patrolia Soke Rogeiro Mate Fatin

MEDIAONETIMOR-Polisia Nasional Timor-Leste (PNTL) bainhira hala’o patrolia to’o iha kurva atu korta tama Suku Lahane Osidental, Postu Administrativu Vera Cruz, Aldeia Kare-Laran, Munisipiu Dili hasoru malu ho motorista Rogeiro da Silva de Araujo (29) soke malu to’o mate fatin.

Tuir Vitor de Araujo maun husi vitima ba jornalista iha Hospital Nasional Guidu Valadares (HNGV) nakonu hó matabén konta katak iha Loron, Dominggu, (04/06/2017), maizu menus tuku 24:00 OTL nia alin ho motor atu ba sosa pulsa.

Tanba hatutan Vitor, antes ne’e matebian Rogerio ne’ebé mate hó klosan ne’e haruka nia subrinha maka atu ba sosa iha Hale-laran. Maibé tanba kalan bo’ot ona, la konsege sosa. Subrinhu ne’e tula malu ho kolega fila-fali mai hasoru nia Tiun Matebian Rogerio.

Matebian Rogerio husu subrinhu pulsa ne’e iha ne’ebé. Hatan subrinhu, “Tiu nia pulsa hau la konsege sosa.” Hirus ida ne’e, Matebian Rogerio hadau save motor. “Fó hau nia osan U$1.00 mai. Husik hau maka ba sosa,” hasara Vitor.

Tanba presiza lós maka Matebian Rogerio hamoris motor hodi aranka ba dau-daun. To’o dalan kurva kareta Polisia Patrolia tama mai hasoru lós Matebian Rogerio nia motor halai iha Estrada ninin soke malu to’o mate fatin.

“Soke tiha pelemenus tun mai haré hodi ajuda komunika ba ambulance para mai foti lori ba hospitál mós lae. Soke tiha atu halai tán. No Polisia Task Force seluk maka mai atu bolutan bombeirus para rega rán nakfakar iha dalan,” katak Vitor hodi hatutan.

Maibé vizinyu balun hader hodi empede netik bombeirus para labele fase rán ne’e. Vizinyu sira ne’e lori brani hamtauk hodi hakilar bombeirus labele fasé ran. Ne’e laos animal. Ema nia familia sira iha. Husu lai, sira hakarak fase rán ne’e ka lae. Nune’e lakonsege fase rán.

Tanba ne’e katak Vitor, husi familia hakarak lori isin Matebian Rogerio mai autopsia hodi hatene lolos motivu soke nian. Aliende ne’e la aseita hó haruka bombeirus atu fase ra’an. “Kuitadu ne’e laos animal,” tenik Vitor.

Iha parte seluk, Kinta, (08/06/2017) ba jornalista Komesariu Geral PNTL, Julio Hornay hateten, membru PNTL ne’ebé soke mate Matebian Rogeriu prosesu hala’o ona. Investigasaun remata maka foin hatene lia lós.

“Husi investigasaun maka klaru. Se deit maka viola ona lei ka halo uluk problema ruma sei prosesa tuir lei. Nune’e husu hotu-hotu atu diak liu hare husi rejultadu deit,” katak Komisaris Julio.(Reportájem Jose Samuel)