MEDIAONETIMOR-Hasoru formasaun VII Governu Konstituisional, Prezidente Repúblika (PR), Francisco Guterres Lú Olo husu ba partidu mais votadu atu tenki respeita konstituisaun Repúblika Demokratika Timor-Leste (RDTL).
“Orientasaun Prezidente Repúblika husu ba ami Partidu mais votadu atu respeita Konstituisaun RDTL para buka parpol sira seluk hodi tu’ur hamutuk forma governu ida ne’ebé diak liu,” hateten Sekretáriu Jeral Parpol Fretilin, Marí Bin Amude Alkatiri ba jornálista sira hafoin enkontru hó Prezidente Repúblika, Francisco Guterres Lú Olo iha Palásiu Prezidenti Nicolau Lobato, Bairru-Pité, Quinta, (03/08/2017).
Maske nune’e tenik Marí, mensajen povu nian katak hotu-hotu ne’ebé hakat liu bareira 4% hodi hetan fatin iha Parlamentu Nasional (PN). Parpol Fretilin, CNRT, PLP, PD no Khunto, hotu-hotu iha lejitimidade.
Marí esplika, Partidu Libertasaun Popular (PLP) ho ninia preokupasaun, aspirasaun no lejitimasaun. Partidu Kmanek Haburas Unidade Nasional Timor Oan (KHUNTO) mós hó ninia reprezentatividade. Ba Partidu Demokratiku (PD), maske lakon sira nia lider, maibé eleitoradu la-lakon. Partidu ne’e mós konsolida a’an hodi lalakon sira nia eleitoradu.
Maske Konstituisaun RDTL iha artigu 106 fó dalan deit ba forma governu hó manan maioria iha eleisaun parlamentar no koaligasaun hodi forma governu, maibé tuir Marí, tenki harí governasaun aberta para bele halo konsulta hó Igreja Katolika, Profesionais Relijiojas no Sosiedade Sivil sira.
Desizaun Konferensista
Hatán perkupasaun públiku konaba Fretilin sei hein desizaun CNRT hodi hakarak halo koaligasaun para forma VII governu, Sekretario Jeral Partidu Conselho Nasional Rekonstrução Timorense (CNRT), Francisco Kalbuadi Lay akompañia hó Vice Presidente Partidu, Virgilho Smith hafoin remata hasoru PR Lú Olo hateten, CNRT seidauk iha desizaun koletivu.
“Tanba CNRT sei halo konferensia partidu nian iha Centru Convensaun Dili (CCD) iha loron 4 to’o 5 Agostu. Konfrensista sira maka sei desidi. Nune’e, remata konferensia maka bele fó sai rezultadu final,” deha Kalbuady.
Tenik Kalbuady, Partidu CNRT sai hanesan segundu Partidu mais votadu. Nune’e, desizaun labele foti, enkuantu Konferensia seidauk hahú. Remata konferensia maka CNRT bele toma desizaun ruma.
PLP Sei Deskute
Remata enkontru ho PR Lú Olo, Vice Prezidente Partidu PLP, Fidelis Magalhaes hateten, maske PLP desidi ona sai oposizaun maibé tanba hare ba interese ema hotu nian maka sei deskute hó partidu mais votades; CNRT, PD no Khunto para avansa hodi lori ba oin.
“PLP sei deskuti ho partidu se’e-se’e deit iha Timor-Leste. Laos partidu rua. Maibé, iha partidu votades ida mai husi CNRT, PD hó KHUNTO para avansa hodi lori ba oin. Ho ida ne’e maka ita nian prekupasaun,” deklara Fidelis ba Jornalista iha Palásiu Prezidente Bairru-Pite.
Fidelis hateten, dau-daun ne’e iha situasaun atu forma governu. Desizaun hotu-hotu PR Lú Olo maka komanda. Nune’e, PLP fó apoiu tomak ba desizaun PR nian, nu’udar desizaun estadu. Partidu hotu-hotu tenki tuir desizaun ida ne’e.(Reportájem Deonisio da Cruz)
Ita nia komentariu konaba post ne'e.