DILI (Media ONE Timor) – Maske seidauk iha jornalista maka hakerek notisia investigativu kazu korupsaun, maibé kontribuisaun edukasaun sivika hodi kombate kazu korupsaun iha Timor-Leste (TL) ne’ebé a’as ba bei-beik presiza hetan atensaun hosi jornalista.
“Ba kazu korupsaun iha TL, papel jornalista nian importante hodi fo edukasaun sivika,” hateten Loreadu Nobel da Paz, Dr. José Manuel Ramos Horta iha serimonia tomada de posse ba strutura Asosiasaun Jornalista Timor Lorosa’e (AJTL) iha salaun MSSI, iha semana ikus Fulan Fevereiru 2020.
Antes tomada de posse, AJTL realiza ona kongresu da haat, iha loron 7 to’o 8 Fevereiru 2020, hodi hili strutura ba periodu tinan 2020-2024. Eleitu ba Prezidente ho mandatu tinan haat ne’e, Maria Zevonia Vieira no Sekretariu Jeral Alberico Junior.
Iha ninia deskursu Ramos Horta esplika liutan, journalista iha nasaun avansadu, hakerek notisia kazu korupsaun lori tempu naruk. No entre jornalista hosi mídia oin-oin servisu hamutuk. Jornalista iha TL lolos ne’e hahu daun-daun ona.
Katak Ramos Horta, kuandu jornalista hosi mídia oin-oin servisu hamutuk hodi investiga kazu korupsaun, balun seluk labele ansi públika uluk. Tanba ne’e sei lafó benefisiu diak ba servisu investigasaun. Hakerek kazu korupsaun presiza servisu hamutuk entre jornalista.
“Korupsaun iha TL kumesa barak ba bei-beik. Kuandu nasaun ida maka halo korupsaun makas, maka estadu no governu ne’e nia lijitimidade sei tu’un. Ne’e perigoju ba soberania Nasaun TL,” dehan Ramos Horta hodi hatutan.
Papel jornalista nian importante para kontribui edukasaun sivika. Hola parte ba kampaña luta kontra korupsaun ba estadu no governu ida ne’e para mós hosi korupsaun. Nune’e TL hetan fila-fali ninia integridade no sentidu nasionálizmu.
“Kuandu Governu TL mós hosi korupsaun, povu brani atu halo sakrifisiu finanseira. Exemplu iha Korea parte Sul. Wainhira akontese krizi ekonomia, hotu-hotu halo kontribuisaun hodi lori osan mean ba intrega, fo tulun ba sira nia governu. Ne’e maka folin hosi governu ne’ebé mós hosi korupsaun,” katak Ramos Horta.
Mídia Literasia
Iha parte seluk Prezidente eleitu AJTL, Maria Zevonia Vieira iha ninia deskursu hateten, AJTL iha ona planu stratejia ba tinan haat nian. Hamutuk ho jornalista sira seluk sei foka liu ba era dijitalizasaun informasaun.
“Informasaun falsu sai hanesan obstaklu boot iha TL ba mundu globalizasaun. Nune’e, AJTL iha intensaun atu halo kampaña no edukasaun sivika mídia dijital literasia. Laos ba jornalista deit. Maibe sei fo mós ba lider politiku, governu no sidadaun TL,” esplika Zevonia.
Edukasaun sivika ba mídia dijitalizasaun literasia ne’e katak Zevonia, para públiku kumpriende ho diak konaba mídia propaganda no mídia kredibel. Liu-liu ba informasaun hirak ne’ebé fo sai iha mídia sosiais sira nia influensia ba desijaun hirak ne’ebé atu foti.
Aliende ne’e hatutan Zevonia, strutura AJTL mós sei fó importansia ba hakerek notisia sensitivu violasaun sexual ba balun ne’ebé soe bebe no jeneru. Tanba, jornalista balun hakerek notisia foka liu ba feto sai hanesan objetu.
“AJTL iha responsabilidade atu fo formasaun ba jornalista sira. Nune’e sira iha sensibilidade jeneru winhira hakerek notisia. Katak, notisia labele halo feto seluk sai vitima ba kazu violasaun sexual no soe bebe,” tenik Zevonia.
Atu haburas liutan misaun no vizaun AJTL nian iha liberdade expresaun no liberdade imprensa katak Zevonia, hotu-hotu ne’ebé hala’o kna’ar jornalista iha mídia ne’ebé deit, radio komunidade, estudante universitariu departementu komunikasaun sosial no photographer’s bele sai membru.
“AJTL mós lataka dalan ba kolega sira ne’ebé halo filme iha liur no produs ona produtu ne’ebé liga ho komunikasaun. Ba peskizador no ativista direitus umanus mós bele sai membru. Tanba, aktividade hirak ne’e nia misaun no vizaun maka atu defende no promove liberdade expresaun no liberdade imprensa,” dehan Zevonia.(reportajem ekipa MOT/Editor Suzana Cardoso)
Ita nia komentariu konaba post ne'e.