(Reportajen Jornalista Estajiada Media ONE Timor-Francisca Ximenes)
Ermera (www.mediaonetimor.co) – Reajustamentu ba strutura partidu politiku (parpol) Klibur Kmanek Unidade Nasionál Timor Oan (KUNTO) iha nivel munisipál nian importante atu bele manan eleisaun Prezidensiál no eleisaun Parlamentar iha periodu tuir mai.
Nune’e Parpol KUNTO realiza konferensia extraordinariu Munisipiu Ermera nian, ho tema óras to’o ona mai ita hamutuk ho partidu KUNTO hodi hateke ba futuru ida di’ak liu. Iha konferensia ne’e fó mos pose ba strutura Parpol KUNTO Munisipiu Ermera nian.
Tuir Konselleiru Parpol KUNTO, José dos Santos Naimori Bucar, Vice Presidente Parpol KUNTO Odete Beloi, Secretáriu Jeral KUNTO, Elidio de Araújo no Koordenador Interinu KUNTO Munisipiu Ermera, Sebastião de Deus hatete, atu manan iha eleisaun iha periodu tuir mai hotu-hotu tenki servisu mak’as.
“Hafoin simu tiha pose ne’e, husu ba koordenador munisipiu no koordenador postu administrativu sira, hamutuk ho militante no mos hirak ne’ebé afilia mai husi partidu CNRT, PLP no PD, atu servisu mak’as”, hatete Konselleiru Parpol KUNTO, José dos Santos Naimori Bucar.
Naimori esplika liutan, atu manan eleisaun iha periodu tuir mai maka hotu-hotu tenki servisu mak’as hahú agora, iha tinan 2025 to’o realizasaun eleisaun prezidensiál iha tinan 2027 no eleisaun Parlamentar ne’ebé sei realiza iha tinan 2028.
Aliende ne’e Naimori mos hato’o bemvindu ba hirak ne’ebé mai husi parpol CNRT, PLP no PD n’ebé afillia ona ba KUNTO. Hamutuk ho lider KUNTO sira seluk iha Munisipiu Ermera, hotu-hotu tenki kolabora hodi sai aman servidor ba família no Estadu Timor-Leste (TL).
Katak Naimori, hotu-hotu halo politiku laos tamba deit atu sai boot no kaer projetu boot. Maibé sai lideransa politik atu fó hanoin no hafanu lideransa sira nia hanoin hodi tau matan ba povu nia moris di’ak. Liberta povu husi nakukun ba naroman.
Naimori hateten, halo politiku laos atu tau iha bolsu. Maibé, halo politika atu servi povu. Maka, lider nasionál sira tenki hamutuk, rona malu no fiar malu hodi kaer metin unidade nasionál ba ema hotu nia moris hakmatek. Nune’e komunidade bele senti sira nia an moris ho dignu iha rai ne’e nia leten.
“Aproveita tempu ida ne’e hau hakarak hato’o agradese no parabéns ba estrutura foun. No mos afiliasaun sira husi Partidu CNRT, PD no PLP ne’ebé nakfilak an mai hamutuk ho Partidu KUNTO. Hau fiar katak, laos imi nain haat deit, maibé hamutuk ho imi nia família sira ita haburas liutan KUNTO”, Naimori dehan.
Lia fuan hanesan mos hato’o husi Vice Prezidente KUNTO, Odete Beloi. Nia hato’o parabéns ba estrutura ajustamentu foun ne’ebé simu ona pose. No mos hato’o parabéns ba afiliasaun sira husi Partidu CNRT, PLP no PD.
“Hamutuk ho afiliasaun no estrutura ajustamentu foun, mai ita lori KUNTO ba oin. Lori KUNTO sai forsa liu tan. Nune’e bele hetan vitoria iha elisaun tuir mai. Liu-liu iha Munisipiu Ermera. Hau fiar iha elisaun tuir mai sei hetan votus ne’ebé as”, Odete deklara.
Nune’e, Odete husu ba reprezentante Parpol KUNTO iha Ermera atu kontribui iha dezemvolvimentu nasionál liu husi fó hanoin ba prosesu dezenvolvimentu ne’ebé lao daudaun. Kontribui servisu mak’as iha area hirak ne’ebé bele kontribui ho voluntariamente.
Haktuir Odete liu husi ideia no servi ho voluntariu maka Parpol KUNTO bele kuñese no hatene nesesidade husi povu. Kuñesementu ne’e, sei fasilita KUNTO iha oportunidade bainhira manan eleisaun tuir mai hodi tau iha planu dezemvolvimentu nasionál nian.
“Militante KUNTO tenki fó kontribuisaun hanoin ba ita nia dezenvolvimentu iha futuru, liu husi ita nia servisu mak’as. Ita hotu hanoin ba oin, atu bainhira hetan oportunidade, KUNTO bele tau planu sira tuir povu nia hakarak hodi kontribui ba dezenvolvimentu”, Odete dehan.
Iha fatin hanesan, Sekretariu Jeral Parpol KUNTO, Elidio de Araújo fó nia rajaun hodi hili Munisipiu Ermera sai hanesan fatin inisiu konsolidasaun Parpol KUNTO nian. Tanba, lider maximu parpol KUNTO hahú nia prosesu politika Parpol KUNTO iha rai kafé laran ne’e nian. Iha Munisipiu Ermera.
“Ermera sai hanesan fatin ida ne’ebé ita nia lider hahú deskute. Inisia Partidu KUNTO iha fatin ne’e maka konsege produs votantes barak ne’ebé sai ona lider. To’o ohin loron hetan kadeira lima iha Parlamentu. Ita bele ba tur iha Oitavu Guvernu. No agradese tanba ohin loron ita bele halibur malu fila fali iha fatin ida ne’e”, Elidio hatete.
Nu’udar sekretariu jerál parpol KUNTO nian, Elidio husu ba estrutura munisipál nian, liu-liu ba sira ne’ebé maka foin reajustál, atu servisu mak’as. Ko’alia it’oan maibé servisu maka barak. Tenki rezultadu maka barullu. Labele ko’alia maka barullu. Hatudu rezultadu, hetan vitoria iha elisaun 2027.
Maibé katak Elidio hetan vitoria, presiza trasa planu hirak ne’ebé planeia tiha ona. Maka hanesan, halo formasaun politika, lideransa no formasaun finansa nian ba lider munisipál sira. Iha formasaun finansa nian, inklui oinsa atu halo relatoriu.
Tamba ne’e maka Elidio husu ba militante partidu ne’ebé hola parte nu’udar patriota KUNTO nian no estrutura sira hotu, atu involve an iha kapasitasun oinsa maka bele dezenvolve povu no nasaun TL ho lideransa politiku hirak ne’ebé maka profesionál.
Koordenador Interinu Parpol KUNTO Munisipiu Ermera nian, Sebastião de Deus promote, militante partidu KUNTO ho nia strutura tomak sei servisu mak’as hodi hetan votus ne’ebé as iha eleisaun tuir mai.
“Durante tinan 2025 to’o tinan 2027, koordenador munisipiu fila ho konsiensia tomak atu kontinua servisu. Ho ami hotu iha strutura, sei lolo liman ba malu. Sei kabas ba malu, hamutuk ho kompatriota ajustadu no mos koordenador postu sira, KUNTO sei manan iha eleisaun tuir mai”, Sebastião hatete hodi hatutan.
Seidauk tarde atu bolu malu. Oras to’o ona, mai hamutuk ho KUNTO hateke ba futuru ida ne’ebé di’ak liu. Futuru ne’ebé di’ak maka povu agrikultur sira tenki moris di’ak. Povu agrikultur sira nia produtu tenki tama to’o merkadu internasionál sira. (Asesu Youtube–https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.