MEDIAONETIMOR-Hakarak garantia liberdade imprensa no espresaun iha Nasaun Demokratiku Timor-Leste maka regulasaun iha seitor komunikasaun sosial tenki bele proteje no fasilita sira nia servisu, inklui ema sira ne’ebé servisu hodi públika informasaun.
“Hau lori mensagem 3 importante iha asuntu ida ne’ebé relasiona hó garantia liberdade imprensa no espresaun iha sosiadade nia le’et, bazea ba esperensia governu ida ne’e harí durante tinan 10 nia laran.”
Hateten Sekretariu Estadu Komunikasaun Sosial (Sekoms), Nelyo Isaac Sarmento ba jonalista bainhira remata sai orador iha konferensia internasional hodi selebra aniversariu Konsellu Imprensa ba dahuluk nian iha Salaun, Delta Nova, Tersa, (9/5/2017).
Partisipa iha konferensia internasional ne’e, Presidente Conselho Imprensa (CI), Virgilio da Silva Guterres, Presidente Autoridade Nasional Comunicasaun (ANC), Antonio Brigido Correia, Adjunto Prokuradoria Jeral da Republika (PJR), Zelia Trindade, Komandante Jeral Polisia Nasional Timor Lorosae (PNTL), Komisariu Julio da Costa Hornay, estudante departementu komunikasaun social hosi Universidade Nasional Timor Lorosae (UNTL) no Universidade Oriental Timor Lorosa’e (UNITAL) nomos jornalista sira.
Sekretariu Estadu Sekoms Nelyo esplika liutan konaba asuntu 3 ne’ebé importante para fó liberdade imprensa no espresaun iha komunidade nian katak, tenki iha kolesi kebijaksanaan ida hodi hare setor dezenvolvimentu komunikasaun hodi halo prozesaun ba futuru.
Parte importante seluk maka hatutan Nelyo, konaba kompetensia hosi komunikasaun ne’e rasik. Katak, sira ne’ebé maka atu sai fontes informasaun ba jornalista sira para públika ba povu atu asiste tenki iha kompetensia. Exemplu; instituisaun estadu, ministeriu sira no instituisaun sira seluk. Tenki kria estratejiku komunikasaun ka mekanizmu ida iha instituisaun hodi fasilita servisu jornalista sira nian atu bele fasilita informasaun ba povu sira.
Iha parte seluk koalia konaba jornalista katak Nelyo tenki iha kualidade. Tenki iha koñesimentu atu interpreta informasaun sira ne’ebe mak fontes ka ministeriu sira fo sai. Nune’e públiku ne’ebé konsume informasaun ne’e bele kumpriende didiak.
Nelyo hateten, informasaun ne’ebé públika hosi media sira tenki sai hanesan referensia ba públiku hodi aumenta sira nia koñesimentu. Nune’e, liu hosi konferensia ne’e bele kumpriende diak liutan hosi nasaun Asia Pasifiku sira nia media ne’ebé fo sai informasaun serve duni atu ema kumpriende.
Lia fuan hanesan hato’o hosi Presidente KI, Virgilio da Silva Guterres. Nia hateten, ho tema konferensia internasional nian; “Promove Liberdade Imprensa No Liberdade Espresaun iha Sudueste Aziatiku No Pasifiku” hosi esperensia nasaun seluk ne’ebe fahe iha konferensia ne’e hodi kontribui ba dezemvolvimentu demokrasia.
Katak Virgilio, objetivu hosi konferensia ne’e tanba Timor-Leste (TL) hanesan orgaun foun sei foti esperensia balun ne’ebe maka kompetival ho situasaun para uja hanesan matadalan atu funsiona ba oin.
Loron KI ne’ebé sei monu iha 10 Maio 2017 ne’e tuir Virgilio, iha konferensia internasionais ne’e hetan resposta positivu hosi intitusaun sira ne’ebe iha ligasaun diretamente hó servisu jornalista sira nian iha nasaun demokratiku TL.
Jornalista La Kontra Polisia
Aliende ne’e iha diskursu Komandante Jeral PNTL, Komisariu Julio da Costa Hornay hateten, direitu ba liberdade espresaun no informasaun nomos liberdade imprensa no Liberdade ba komunikasaun sosial ne’ebe konsagra iha konstituisaun RDTL nu’udar direitus universais ba baze demokrasia esensial ba sidadaun hodi ezersa direitu sira seluk.
“Regras konaba deireitu atu asesu ba fontes informasoens, katak jornalista iha direitu atu buka no hetan informasaun. Direitu ne’e maka tenki asegura ba Jornalista, entidades publikas, privadas no sira ne’ebe hala’o interese públiku. Maibe iha mos limite ba direitu. Exemplu; kazu atu asesu ba prosesu segredu iha Justisa nian no dokumentus pasifikadus,” esplika Komisariu Julio.
Nia esplika liutan, iha dezemvolvimentu Konselho Imprensa nia papel ba aktividade orgaun komunikasaun sosial TL hodi promove no asegura aktividade jornalista sira nian tenki dezenvolve ho profesionalismu hodi respeita ba padraun ne’ebé a’as. Kualidade katak jornalista nia aktividade la kontra servisu ka aktividade polisia nian.
“Restuisaun ka limitasaun ba ema nia liberdade atu hato’o sira nia inspirasaun wainhira bele justifika tuir kondisaun ne’ebe lei hateten. Exemplu; Ajente Polisia ida wainhira defende ema ruma nia vida inklui mos vida jornalista nian dala ruma iha aktus balu ka situasaun balu ne’ebe mak ita nia membrus Ajente PNTL iha terenu la autoriza jornalista ida atu tama iha fatin ne’ebe perigoju ba nia a’an,” katak Komisariu Julio hodi hatutan.
Ba salvasaun vida ema nian ne’e polisia sei hateten, dehan Komisariu Julio, “Ita bo’ot sira labele tama. Tanba area ne’e risku ba ita bo’ot sira nia vida. Entaun husu ba jornalista sira mós impende situasaun para ita bele ko’opera ba malu.”(reportajem Deonisio da Cruz/João Bernadino)
Ita nia komentariu konaba post ne'e.