Rekruta Membru Polisia Foun, PNTL Presiza GNR Nia Tulun

(Reportajen Jornalista Media ONE Timor Teotonia Neto)

Dili (www.mediaonetimor.co) – Rekrutamentu ba membru Polisia Nasional Timor-Leste (PNTL) foun ne’ebé tuir planu sei hala’o iha fulan Marsu tinan 2024 ne’e, presiza moos parseiru parte GNR (Guarda Nacional Republicana-Portugés) nia tulun.

“Ita persija mós parseiru sira husi parte GNR hodi bele ajuda halo rekrutamentu ida ne’e. Maske, ne’e desizaun Ministeriu Interior ninian. Maibé, ida ne’e hodi hatudu neutralidade ka inparsialidade iha prosesu rekrutamentu membru polisia foun.”

Esplikasaun ne’e esplika husi Komandante Jerál PNTL, Komisariu Jerál Polisia Henrique da Costa ba Jornalista sira hafoin remata hasoru malu ho Prezidente Repúblika, José Ramos Horta iha Palasiu Prezidensiál, Tersa, (16/01/2024).

Komisariu Henrique esplika liutan, bazeia ba orsamentu tinan 2023 ne’ebé aloka ona ba kada instituisaun maka instituisaun PNTL sei tau duni osan hodi halo rekrutamentu ba membru polisia foun ne’ebé tuir planu sei rekruta na’in 200.

Maibe katak Komisariu Henrique, molok atu realiza rekrutamentu ne’e sei halo preparasaun. Sei forma ekipa. Halo aproximasaun ho GNR. Sei kria regra rekrutamentu. No preparasaun téknika sira seluktan.

Aliende ne’e hatete Komisariu Henrique, PNTL moos presiza komunika fila fali ba Ministeriu Interior para hetan aprovasaun. Tanba, prosesu rekrutamentu ne’e la’ós PNTL maka hala’o mesak. Maibé, tuir orientasaun husi Ministru Interior nian. Remata husi ne’e maka foin hato’o ba komisaun hodi halo rekrutamentu.

“Rekrutamentu ne’e ita hare kona-ba osan. Sei osan sufisiente ba ema na’in 200 de’it, sei rekruta maka 200. Sei liu ida ne’e, ita foti osan husi ne’ebé para hodi selu sira. Seluk maka rekrutamentu ne’e mos, hare ba fatin ne’ebé maka atu utiliza hodi hala’o formasaun. No moos sira ne’ebé preparadu para fó formasaun”, tenik Komisariu Henrique.

Nia hatutan, joven Timor oan barak maka antusiezmu hakarak tama polísia. Maka, tenki hala’o tuir faze ne’ebé extraordinariu. Hanesan; halo selesaun dokumentu, teste médiku ninian no mós selesaun iha parte nivel akademiku. Nune’e, prosesu rekrutamentu sei kleur it’oan.

“Rekrutamentu ba polísia ka forsa, ne’e la’ós buka ema ne’ebé atu buka servisu hodi koloka nia ema ba iha vaga ne’e. Maibe, tenki iha duni vontade hodi sakrifika no dedika ninia an ba nasaun no estadu. Tanba wainhira halo servisu, sei hasoru risku barak.

Iha parte seluk tuir informasaun ne’ebé espalla ona iha media sosiál dezde inisiu Fulan Janeiru Tinan 2024 katak, prosesu rekrutamentu membru polisia foun, tuir planu sei loke iha Fulan Marsu tinan 2024. Kriteria ba rekrutamentu maka hanesan tuir mai ne’e:

Certidaun RDTL/Baptismu Inan-Aman.
Certidaun RDTL/Baptismu Aplikante.
Certidaun Kazamentu Inan-Aman, Karik Seidauk ka la Kaben Halo Deklarasaun Suku/Barlakeadu.
Bom Komportamentu husi PNTL.
Diploma Sekundaria/Lisensiatura/Mestradu Legaliza husi Ministeriu Edukasaun.
Kartaun Eleitoral no Kartaun Billhete Identidade (Bl) Inan-Aman.
Kartaun Eleitoral no Kartaun Billhete Identidade (Bl) Aplikante.
Atestadu Médiku Aplikante husi HNGV.
Certifikadu formasaun sira.
Deklarasaun Suku.(Asesu Youtube/Facebook https://www.facebook.com/Media1Timor Media ONE Timor)