(Reportajen Jornalista Estajiada Iria da Cunha-Francisca Ximenes)
Dili (www.mediaonetimor.co) – Rekrutamentu ba kadetes foun Polísia Nasionál Timor-Leste (PNTL) ne’ebé kredivel sei kontribui ba hari’i forsa PNTL ida ne’ebé professionál, disiplina no respeita ba prinsipiu direitu umánus.
“Polísia Nasionál Timor-Leste la’o ho padraun di’ak no kredivel sei kontribui ba hari’i forsa polísia ne’ebé profesionál, disiplina no respeita ba prinsipiu direitu umánus. Nune’e, apresia ba kandidatu kadetes foun PNTL nian ne’ebé hatudu maturidade ba buka lia los no justisa ho dalan legál no demokratiku”.
Lia hirak ne’e hato’o husi Vice Prezidente Asosiasaun HAK, Antoninho De Lima ne’ebé sai mos hanesan Porta Voz iha konferensia imprensa ne’ebé hala’o iha Salaun Asosiasaun HAK, Farol, Tersa, (10/02/2026).
Vice Prezidente Asosiasaun HAK, Antoninho esplika liutan, bazeia ba nesesidade seguransa iha Timor-Leste (TL) nian maka Konsellu Ministru diside hodi loke vaga ba kandidatu foun PNTL. Liu husi Diploma Ministerial numeru 17/2025, 25 Juñu altera ona ho Diploma Ministerial númeru 37/2025, 10 de Outubro kona-ba rekrutamentu ba ajente PNTL.
Katak Antoninho, rekrutamentu ne’e importante tebes. Tanba PNTL mak instituisaun seguransa públika neʼebé iha papél estratéjiku atu proteje no garante seguransa ba sidadaun sira nian iha Estadu direitu demokrátiku.
Nune’e Antoninho esplika liutan, asosiasaun HAK nu’udar organizasaun Naun Governamental, ne’ebé servisu iha área direitus umánus. Tuir HAK nia observa katak, prosesu rekrutamentu PNTL ne’ebé la’o dadaun ne’e, mak momentu importante atu kontinua fortalese profisionalizmu, integridade no konfiansa públika ba seguransa Estadu nian.
“Ami apresia no rekoñese husi Governu no instituisaun relevante sira ba politika rekrutamentu ida ne’e. Maibé hanesan organizasaun direitus umanus neʼebé tau matan ba asuntu direitus umanus hakarak subliña katak, rekrutamentu PNTL presiza la’o tuir enkuandramentu legál sira”, Antoninho dehan.
Katak Antoninho, rekrutamentu ne’ebé la’o tuir prinsipiu sira iha legalidade, transparénsia, méritu, imparsiálidade, igualidade no oportunidade maka prinsipiu ne’ebé tuir direitus umanus no enkuandramentu legál sira neʼebé vigor iha TL.
Hanesan públika ona iha mídia katak, iha loron 03 Febreiru 2026 liu husi komisaun rekrutamentu PNTL nian públika ona lista jerál kandidatu foun ho totál nain 12.874. Husi númeru ne’e, iha kandidatu 10.597 mak aprovadu. No kandidatu 2.277 mak la aprovadu. Husi númeru aprovadu ne’e fó prioridade ba kandidatu 400 ne’ebé tuir kuota kada munisipiu mak sei ba teste médiku.
Maibé públikasaun ne’e hatutan Antoninho katak, sai polemika iha públiku no hetan reasaun mak’as husi kandidatu sira. Tanba, konsidera naran aprovadu hotu iha lista. Maibé la admiti ba teste mediku.
Antoninho dehan, naran hirak ne’ebé tama iha lista teste mediku ne’e deskonfia iha indikasaun forte mós lista kadetes foun sira neʼebé aprovadu ba teste mediku maioria oan husi superior PNTL sira nian deit.
Nune’e maka Asosiasaun HAK liu husi nia Vice Prezidente HAK Antoninho, rekomenda hodi husu ba Ministeriu interior no PNTL imediatamente atu anula desijaun rezultadu lista. Alinde ne’e husu ba PDHJ imediatamente atu halo investigasaun ne’ebé klean hodi hatene tendensia ba pratika sira ne’ebe kontra prinsipiu boa governasaun.
No mos katak Antoninho hodi husu mos ba Parlamentu Nasionál, liu-liu komisaun ‘B’ ne’ebé trata asuntu Negósiu Estranjeiru, Defeza ho Seguransa atu halo fiskalizasaun ba prosesu rekrutamentu ne’ebé iha tendensia kontra prinsipiu Boa Governasaun.(Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.