MEDIAONETIMOR-Rezultadu votasaun Eleisaun Parlamentar (Elpar) 2017 ne’ebé maka hatudu laiha manan maioria hodi obriga Partidu Politiku (Parpol) sira tenki halo koaligasaun, hatudu katak povu fó mensajem ba lider sira tenki tu’ur hamutuk no lao hamutuk ba dezemvolvimentu hó paz no estabilidade.
“Votus ne’ebé maka povu fó ba lider sira iha eleisaun nu’udar mensajen povu nian para bele halo dialogu hodi tu’ur hamutuk no lao hamutuk ba dezemvolvimentu Timor-Leste hó paz no estabilidade.”
Lia hirak ne’e Prezidente Partido Demokratiku (PD), Mariano Sabino Asanami hatún ba jornálista sira iha Palacio Prezidensial, Aitarak Laran, Quinta, (27/07) hafoin remata enkontru hó Prezidente Repúblika (PR), Francisco Guterres Lu-Olo.
Asanami hateten, hosi obrigasaun povu nia votasaun ne’e maka PR Lu-Olo transmite hela ba Parpol idak-idak atu uza oportunidade ne’e hó militantes tomak nia naran hakarak hato’o agradese hotu-hotu nia esforsu ne’ebé maka hala’o iha kampaña to’o eleisaun.
Hatan jornalista konaba koaligasaunAsanami deklara, PD sei hein rezultadu final hosi prosesu apuramentu nasional ne’ebé maka hosi tribunal intrega ba Conselho Nasional Eleições (CNE) hó Secretariadu Tekniku Administrasaun Eleitoral (STAE) para hodi halo servisu.
Asanami esplika, hafoin apuramentu nasional CNE no STAE tenki intrega fali ba Tribunal Rekursu maka sei públika final rezultadu Elpar 2017 nian. Tribunal rekursu anunsiu ona maka PD foin foti desijaun bazeia ba votus ne’ebé timoroan sira fó.
“Ba O Timor, Ami Maubere Oan Sempre Prontu iha dalan ne’ebé deit, sei servi tuir kbi’it no votus ne’ebé maka inan-aman sira fó. Ami Sempre Prontu atu servi iha pozisaun saida deit. Tanba povu mak fo votus maka ami tenki uza votus ida ne’e para atu fo fali ba povu liu hosi servi ba progresu dezemvolvimentu povu nia moris diak,” dehan Asanami.
Khunto Prontu
Iha loron hanesan Parpol Kmanek Haburas Unidade Nasional Timor Oan (Khunto) ne’ebé liu ona bareira 4% ne’e mós ba aprezenta a’an iha PR Lu-Olo. Lia tu’un ba jornalista sira Presidente Khunto, Armanda Berta dos Santos hateten prontu hein deit sé mak konvida atu servisu hamutuk hodi forma Governu.
“Ohin hasoru malu ho PR Lu-Olo, hanesan refleksaun ida atu kria estabilidade paz nomós unidade iha Nasaun TL. Maibé ba Khunto, iha dau-daun ne’e importante maka halo refleksaun atu bele kontinua kria estabilidade paz iha ita nia nasaun ida ne’ebé bodik ba povu Timoe-Leste,” tenik Armanda.
Nia hatutan, iha tempu daun-daun ne’e posizaun Khunto nian maka hein deit. Sé deit maka konvida atu servisu hamutuk iha governu no nasaun ida ne’e. Tanba, Khunto nia vizaun maka atu harí paz no estabilidade iha ita nia nasaun ida ne’e.
“Durante tinan 15 nia laran ona povu nia interese maka paz no estabilidade. No ba oin ami Khunto sei kontinua nafatin povu nia mehi hodi moris iha paz no dezemvolvimentu ba rai doben TL hodi lori povu ba moris diak liutan,” promote Armanda.
Iha loron antes ne’e, Partidu Fretilin, Partidu CNRT no Partidu PLP ba hasoru malu ona hó PR Lu-Olo. Hafoin remata enkontru, Sekretariu Jeral Fretilin, Marí Bin Amude Alkatiri hateten, Fretilin nafatin kumpri sira nia promesa ba povu durante kampaña hodi hakarak halo koaligasaun hó Partidu hó Partidu CNRT.
Maibé tuir Sekretariu Jeral Partidu CNRT, Francisco Kalbuady Lay hateten, CNRT sei halo konferensia ida hamutuk hó strutura municipal Dili nian iha loron 29 Jullu 2017 hodi desidi konaba koaligasaun ne’e.
Entertantu hosi Prezidente Partidu PLP deklara ona sira nia a’an hakarak sai oposizaun ne’ebé edukativu hodi lakohi involve a’an iha forma governu konstituisional VII ba periode tinan 2017 to’o tinan 2022.(Reportájem Deonisio da Cruz/João Bernadino)
Ita nia komentariu konaba post ne'e.