Sei Uza To’o Estende Remata, Membru PN Deklara Intrega Kareta

MEDIAONETIMOR-Hafoin koilleta protesta iha mídia sosial to’o hamosu demonstrasaun konaba leliaun kareta ne’ebé foin maka uza iha tinan 2012 to’o 2017, ikus mai membru Parlamentu Nasional (PN) deklara sei intrega fila fali kareta ne’e ba pátrimonia nian.

Deklarasaun intrega kareta ne’e hato’o husi idak-idak nia bankada. Husi bankada CNRT hato’o liu husi konferensia imprensa ne’ebé partisipa husi mayoria membru bankada ne’e, deklara halo kanselamentu ba alienasaun kareta deputadu sira uza.

Deputadu Bankada CNRT, Natalino dos Santos ba jornalista liu husi komunikadu imprensa iha sira nia bankada, Tersa, (22/08/2017) esplika, bazeia ba dekretu Lei no 32/2011, 27 Jullu, kona-ba Gestão e Alienação Dos Bens Movies do Estado no Mos Lei no 12/2017 kona-ba Lei da Organizasaun e Funsionamentu da Administrasaun Parlamentar.

Nune’e maka liu hosi Concelho Administrasaun PN ne’ebé mak kompostu hosi reprezentantes hosi deputadus Bankada CNRT, Bankada Fretilin, Bankada PD, Bankada Frenti Mudança no reprezentante Administrasaun PN nian hodi deside atu halo prosesu alienasaun tuir prosedimentu legal tomak ne’ebe mak iha.

Inklui mós nia presu alienasaun nian hatutan Deputadu Natalino, tanba durante mandatu tinan 5 nia laran deputadus ida-idak ne’ebé partisipa ba kustus manutensaun anual kareta PN tuir desizaun Concelho Administrasaun ne’ebé mak haktuir iha akta reuniaun Conelho Administrasaun refere.

Maibe katak Deputadu Natalino, hafoin tetu di-diak ba situasasun aktual ne’ebé hamosu polemika bo’ot iha públiku kona-ba prosesu alienasaun kareta PN, no hare ba desizaun Presidente Parlamentu Nasional hodi supende prosesu alienasaun refere.

No mos liu hosi diskusaun Bankada rasik hodi tetu mos ba desizaun hosi CPN-CDN Partidu CNRT nian, ho nune’e Bankada CNRT iha PN deside:

1. Atu intrega kareta 30 hosi deputadus nain 30 Bankada CNRT nian, hodi lakontinutan tuir prosesu alienasaun ba kareta Parlamentu Nasional.
2. Husu ba Presidente Parlamentu Nasional atu kansela prosesu alienasaun kareta PN nian ba Deputadus nain 65.
3. Ikus liu Bankada CNRT husu ba Publiku atu kria situasaun paz no hakmatek, matan moris neon nain hodi fó apoiu maximu ba prosesu formasaun Governu no mós prosesu negosiasaun Tasi Timor ne’ebé mak halao hela.

Iha Estende Mandatu

Lia fuan hanesan mai husi Deputadu Bankada Fretilin, Francisco Miranda Branco. Nia hateten, tanba Concelho Administrasaun hasai tiha ona desizaun iha loron 18 Agostu tinan ne’e husi despaixu Prezidente PN ne’ebé konsidera kareta sira ne’e patrimonia PN nian maka ohin loron, (22/08/2017) kareta sira ne’e sei uja to’o estende mandatu remata iha loron, 5 Agostu 2017.

Hatan kareta membru PN nian balun troka ona matrikula ba privadu Deputadu Branco afirma, ne’e tanba regras ne’ebé parlamentu rasik mak fó espasu ba deputadu sira. Nune’e halo hanesan mós ho bankada sira seluk. Maibé desizaun hosi despasu ne’e klaru ona katak ne’e propriedade parlamentu nian.

“Kestaun matrikula ne’e laos problema. Tanba konteudu despasu ne’e vinkula katak ne’e patrimonio PN nian. Parlamentu mak fó autorizasaun atu troka maibé iha fali despasu ida, entaun tenki fila ba orijen patrimonio PN nian,” dehan Deputadu Branco.

                                                                           PD Kansela Alienasaun

Husi Bankada Partidu Demokratiku (PD) liu husi Presidente Bankada, (PD), Maria Lourdes Besa mós hato’o deklarasaun sei kansela prosesu alienasaun kareta Deputadus PN ne’ebé mak lao tiha ona hodi ikus mai sai polemika bo’ot.

Tanba ne’e katak Deputada Maria Lourdes, Bankada PD deklara katak sei kansela total ba alienasaun kareta PN. Maibé sei uza kareta to’o mandatu estende remata durante semana rua nia laran hodi halo servisu.

Hateten Deputada Maria Lourdes, Bankada desidi ona kareta ba Deputadu PD nain 8 ne’e sei intrega bainhira mandatu IV lejislatura loke. Depois toma de pose maka sei intrega hodi sira bele uja nafatin kareta ne’e para halo servisu durante tinan 5 nia laran.

“Ami desolve kareta sira ne’e mai iha PN para deputadu foun sira uja. Laiha tan nesesidade atu sosa no fa’an kareta. Hau hateten ba Jornalista sira, ami PD mai iha PN ne’e hare ba prosesu lei, prosesu dezenvolvimentu no prosesu ba ita nia rai. Ami la preokupa ba prosesu kareta,” katak Deputada Maria Lourdes.

Wainhira Media One Timor tenta buka Deputadu husi Bankada Frente Mudança hodi halo konfirmasaun konaba intrega kareta PN nian ne’e ba pátrimonia, maibé sira laiha iha uma fukun PN.

Kareta hó marka prado hamutuk 65 intrega ba Deputadu husi bankada CNRT nain 30, Fretilin nain 25, PD nain 8 no Frente Mudança nain 2 deit maka José Luis Guterres Lugu no Jorge Teme. (Reportájem Deonisio da Cruz)