(Reportajen Jornalista Estajiariu Deometro Amaral Ramos/Editor Marcelino Tomae)
Dili (mediaonetimor.co) – Remata mandatu VIII Governu Konstitusionál, Sekretáriu Estadu Juventude no Desportu (SEJD) fó apresiasaun ba media na’in iha orgaun komunikasaun sosiál privadu no media estatál no moos Jornalista destakadu sira, liu husi atribuisaun sertifikadu agradesementu.
“Obrigadu ba media estatál no media privadu sira. Liu-liu Jornalista ne’ebé desktakadu iha area joventude no desportu. Tanba hatutan ona ami nia lian no ami nia atividade durante ha’u nia mandatu VIII Governu Konstitusionál ba sosiedade.”
Hateten Sekretáriu Estadu Juventude no Desportu (SEJD), Abrão Saldanha Nogosico iha ninia deskursu ba atividade distribui sertifikadu apresiasaun ne’ebé hala’o iha sala konferensia SEJD, Sesta, (09/06/2023).
Nia esplika liutan, apresiasaun ne’e nu’udar momentu importante ida ba média sira hotu ne’ebé mak durante ne’e halo kovertura ba programa joventude no desportu nian, liu hosi servisu SEJD iha VIII Governu Konstitusionál nian.
Iha serimonia atribuisaun sertifikadu ne’e SEJD Abrão aprofunda katak, média nu’udar ajente transforma informação ida ne’ebé besik ho sosiedade. Liu husi media, jornalista sira ho vontade tomak produs notisia ne’ebé bele enkoraja desijaun balun iha SEJD.
Nune’e SEJD Abrão enkoraja jornalista sira atu antes halo kovertura, presiza peskiza para buka hatene klean no domina asuntu ho klaru. Asuntu ne’ebé klaru sei hetan informasaun ne’ebé kompletu hodi eduka komunidade nia kuñesementu ho di’ak para ajuda foti desijaun iha sira nia moris.
“Presiza hasa’e di’ak liutan abilidade jornalista sira nian, atu nune’e bele halo kompetisaun mós ba iha merkadu. Atu nune’e sai nu’udar komersiu kompetitor ne’ebé di’ak. Maka rekomenda ba mandatu IX Governu Konstituisionál, tenke investe mak’as ba media. Tanba media ohin loron nu’udar modalidade desportiva iha komérsiu”, katak SEJD Abrão hodi hatutan.
Husu moos ba orgaun komunikasaun sosiál sira atu konsidera desportu nu’udar modalidade boot hodi kontribui ba ekonómia nasionál. Media na’in sira tenke harii departementu relasaun desportivu iha idak-idak nia instituisaun media.
Tuir observasaun Media ONE Timor katak, serimonia apresiasaun ne’ebé fahe ba media na’in no Jornalista destakadu iha SEJD ne’e, hetan partisipa husi reprezentante media nain sira husi; eletronika, emprimi no online, inklui media na’in ba Kompañia Media ONE Timor, Unip, Lda no na’in ba Kompañia Timor Post, S.A, Suzana Cardoso. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.