(Reportajen Marcelino Tomae/Editora Suzana Cardoso)
DILI (Media ONE Timor) – Atu hetan oportunidade hodi ukun ba povu nia moris di’ak liutan iha tinan 2023 to’o 2028, eleisaun Parlamentar tinan 2023 nian maka estrutura Partidu Kongresu Nasionál Rekonstrusaun Timorense (CNRT-sigla portugés) konsolida aan hodi servisu mak’as hahú hosi baze.
“Partidu Politika CNRT nia sentidu mak hamriik atu tau interese ba estadu hodi servi povu, duke interese privadu partidu nian”, hateten Sekretáriu Jerál (Sekjer) partidu CNRT Francisco Calbuadi Lay iha nia diskursu semana kotuk iha abertura konsolidasaun Partidu CNRT.
Lee Notísia Relevante: Konferensia KTP Hodi Fó Vitoria Ba CNRT
Sekjer CNRT ne’ebé hato’o deskursu lori Prezidente CNRT, Kay Rala Xanana Gusmão nia naran ne’e hateten, sentidu partidu polítiku CNRT hamriik atu servi Estadu Timor-Leste (TL). No hadia povu tomak nia moris iha territóriu nia laran.
Nia informa, hotu-hotu ne’ebé hola parte iha estrutura CNRT tenki servisu mak’as hodi konsolida aan hahú husi Dili too munisípiu no RAEOA hodi prepara ba eleisaun Parlamentár 2023.
Katak Calbuadi, ba interese Estadu TL nian entrega tomak ba Prezidente Repúblika, José Ramos Horta. Parte Partidu CNRT nian buka konsolida aan. Halo dialogu ho ema hotu-hotu para servisu ho partidu ne’ebé de’it, ho ema hotu no grupu ne’ebé de’it ba interese povu nia moris di’ak.
Ba interese povu nian ne’e hatutan Calbuadi, prontu servisu ho partidu no ema hotu ba interese nasionál CNRT prontu dialogu no servisu saida de’it para hadia distinu Nasaun TL no hadia povu nia moris.
“Kuandu ida-idak mai ho nia interese atu buka kargu de’it, ne’e laloos. Tanba partidu CNRT nia intensaun atu servi nasaun ida ne’e. Atu hadia povu nia moris. Maibé kuandu mai ho interese seluk, partidu CNRT sei la simu”, katak Calbuadi.
Nune’e Calbuadi husu ba fiskias, koordenador, selkom no nurep sira iha munisipiu 12, inklui RAEOA atu liu hosi konferensia ida ne’e tenke servisu mak’as hodi hametin tan abut Partidu CNRT iha baze. Tanba, baze metin maka sei reforsa liutan iha leten.
“Sentidu estadu partidu CNRT nian tuir lider karismatiku Kay Rala Xanana Gusmão nia hanorin maka interese nasionál aas liu partidu, liu hosi hatuur ona Jose Manuel Ramos Horta sai ona Aman ba nasaun no povu TL. Hanesan iha ukun tuir mai sei tau aas povu nia interese”, katak Calbuadi.
Partisipa iha konferensia konsilidasaun ne’e, estrutura nasional Partidu CNRT, koorndenador husi munisípiu 12 no Rejiaun Administrativu Espesial Oekusi Ambenu (RAEOA).(Asesu Youtube/ https://www.facebook.com/ Media1TimorMedia ONE Timor)
Ita nia komentariu konaba post ne'e.