(Reportajen Asistente Marcelino Tomae/Editora Suzana Cardoso)
DILI (Media ONE Timor) — Aprovasaun Orsamemtu Jerál Estadu (OJE) tinan ba tinan laiha benefisiu ba povu kbiit laek. Nune’e, Aliansa Maubere Nasionál (AMN) rejeita polítika Parlamentu Nasionál (PN) hodi sosa karreta prado 35 no laptop 30 ba lejislatura foun. Maske, Parlamentu Nasionál (PN) konsidera laiha impaktu ba dezemvolvimentu Timor-Leste (TL).
Hatan ba rejeitasaun AMN nian ne’e Vise Primeira PN, Maria Angelina Sarmento Lopes no Vise Segundu PN Luis Roberto ba Jornalista iha resintu Uma Fukun PN, Segunda, (07/11/2022), dehan sosa karreta prado ho laptop ba depudatu sira laiha impaktu ba dezenvolvimentu.
“Kuandu estrada aat, eskola laiha kadeira, meza no kondisaun ladiak. Bee moos laiha. Maka Parlamentu Nasionál tuun ba halo fiskalizasaun hodi husu ba Governu para tau osan. Ha’u hanoin sosa karreta ba deputadu sira ne’e laiha impaktu,” Vise Primeira PN, Maria Angelina Sarmento Lopes dehan.
Tuir Vice PN Angelina, deputadu sira presiza kondisaun para uza hodi halo fiskalizasaun ba povu nia kondisaun. Esrada aat, bee moos laiha, meza no kaderia iha eskola laiha. Labarik sira tuur de’it iha rai. Povu la bele uza sira nia transporte rasik hodi hato’o keixa ba sira nia reprezentante iha PN.
Katak Vice PN Angelina, sosa transporte ba lejislatura da-lima iha periodu 2023 to’o 2028 ne’e meius ida hodi fasilita deputadu sira. Tanba iha mandatu konstituisionál hatete katak kna’ar PN atu halo fiskalizasaun.
“Atu halo fiskalizasaun povu la buka ami (Deputadu-Red). Ami maka buka povu. Sei kuandu transporta laiha, oinsá maka ita hatene povu sira nia preokupasaun”, Vice PN Agelina haktuir hodi hatutan.
Nune’e, PN sei mantein para sosa karreta no laptop foun ba lejislativa foun ne’ebé sei hahú sira nia knaar iha tinan 2023. Tanba katak Vice PN Angelina, “Mandatu lejislatura periodu 2017 sei remata iha 2023. Ha’u rasik kuandu tama iha PN, uza ha’u nia karreta privadu durante fulan rua. Depois maka fó karreta operasionál.”
Iha sikun seluk Vise segundu PN Luis Roberto husu ba joventude sira atu di’ak liu halo manifestasaun ba dezenvolvimentu hirak ne’ebé dau-daun ne’e la la’o. La’ós kestiona fali PN atu sosa karreta no sosa laptop. Tanba ne’e la’ós sai impaktu ba dezenvolvimentu.
“Relasiona ho estudante sira halo manifestasaun kona-ba Parlamentu Nasionál sosa karreta ne’e la’ós impaktu boot. Tanba orgaun soberania sira tenke uza transporte hodi halo servisu. Maibé manifestasaun krojiál ba estudante sira maka dezemvolvimentu fiziku territóriu laran tomak agora lala’o ”, hatete Vice PN Luis.
Maibé Vice PN Luis moos konkorda ho manifestasaun estudante sira ne’ebé kestiona sosa kareta no laptop foun hela de’it hodi fó impaktu ba fundus gastus nian aas ne’e politiku na’in sira tenki haree didi’ak fila fali preokupasaun sira ne’e.
Kareta atu sosa ka la sosa katak Vice PN Luis, desizasaun iha deputadu sira tuir mai atu halo deskusaun. Nesesariu ka la’e hodi bele hamenus gastus orsamentu nian. Maibé ba deputadu sira agora ne’e, fiar katak karreta sira ne’e sei iha kondisaun di’ak.
“Estudante sira mós sidadadaun Timoroan, iha diretu atu halo manisfestasaun. Maibé orgaun soberania mós iha diretu hanesan sosa karreta hodi kontrola fundus hotu-hotu. Tanba osan ne’e ita hotu ninian. Ita hotu iha diretu hodi kontrola”, dehan Luis Roberto.
AMN Rejeita Atu Hola Karreta Spot-Laptop PN
Iha parte seluk estudante universitariu hirak ne’ebé halibur aan iha AMN rejeita planu orgaun lejislatura da IV ne’ebé hakarak atu sosa karreta Spot prado no laptop. Tanba OJE tinan-tinan aprova hela de’it maibé laiha benefisiu ba povu kbiit laek sira.
“Ita rejeita totál ho polítika Parlamentu Nasionál atu sosa karreta prado sport ho laptop bá membru parlamentu sira,” Portavós AMN Gaspar Maugamu hateten iha intervensaun durante Asaun Pasífika ne’ebé hala’o iha kampus sentrál Universidade Nasionál Timor-Lorosa’e (UNTL) Caicoli, Segunda, (07/11/2022).
Nia hateten, AMN konsidera polítika sosa karreta no laptop sai hanesan injustisa boot bá povu TL. Tanba deputadu sira tuir loloos bá ukun atu reprezenta povu. Ko’alia povu ninia problema. Maibé iha pratika, la akontese. No pior liu maka ko’alia povu ninia problema ba sira nia interese.
Iha PN ne’ebá katak Gaspar, deputadu sira tu’ur hodi defende de’it sira-nia an. Halo lei ba sira nia aan. No ignora tiha povu. Politika sosa karreta foun ho marka Sport no laptop no moos Lei Pensaun Mensál Vitalísia nú 1/2007 fó impaktu mak’as ba osan gasta hotu de’it ba parte balun.
Nune’e katak Gaspar, movimentu universitáriu TL liu hosi AMN ezíje bá PN atu kansela sosa karreta prado Spot no laptop bá deputadu sira.
Aliende hato’o orasi iha palku, manifestante sira moos hakerek krítiku oioin iha pamfletu mak hanesan; independénsia la’ós atu troka ema kulit mutin ho metan. La’ós atu troka kores nandeira, eh la’kaóunema. Presiza liu maka destroi no hakotu abut hosi esplorasaun kolónial ne’e.
Tuir planu, manifestasaun pasífika ne’e AMN sei hala’o durante fulan rua nia laran hahú hosi fulan Novembru to’o Dezembru tinan 2022. No sei realiza semana ida loron tolu hahú hosi loron Segunda, Tersa no loron Kuarta. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.