MEDIAONETIMOR-Tanba trauma ho esperensia ba krizi iha tinan 2006 nian maka dau-daun ne’e populasaun sira ne’ebé hela iha Kapítal Díli kumesa prepara a’an hodi antisipa enkuantu apresiasaun Programa VII Governu Konstituisionál la-passa iha Parlamentu Nasionál (PN), karik sei mosu konflitu.
“Ita bo’ot sira komunidade lalika halo imazinasaun oi-oin. Hala’o imi nia kna’ar hanesan bai-bain. Karik iha preokupasaun ruma liga ba seguransa PNTL hodi komunika ba malu. Polisia prontu atu atende. Tanba Polisia maka komunidade nia seguransa. Nune’e depozito konfiansa ba seguransa.”
Lia fuan hirak ne’e hateten hosi Komando PNTL Postu Administrativu Dili, Euclides Belo ba jornalista iha nia servisu fatin hodi responde konaba situasaun seguransa ba debate programa VII Governu Konstituisionál hahu iha loron 16 to’o 20 Outobru 2017.
Nia esplika liutan, asegura seguransa komunidade ba rumoris ne’ebé iha ligasaun ho debate programa VII Governu Konstituisionál hamutuk PNTL besik 462 maka halo segurasa ba iha Dili laran.
Euclides hateten, Eskuadra Vera Cruz parte Polisia forsa rezerva no tranzitu maizu menus nain 50-resin ho ko’ordenasaun Unidade Espesial Polisia (UEP), Batellaun Ordém Públika (BOP) no DNSP maka fo seguransa ba aktividade iha Parlamentu Nasionál (PN) hodi lao ho diak.
Hatutan Euclides, polisia balun seluk halo seguransa lao iha luron-luron. Balun seluktan prontu iha Eskuadru PNTL nian atu simu no komunika ho komunidade iha kualker óras no situasaun para atende prekupasaun sira.
“Atu fo hateten deit ba komunidade sira ne’ebé maka iha problema familiar, tenke ba imi nia eskuadra para orienta lalais ba asegura seguransa. Ba estudante no foin sae sira ne’ebé hakarak hetan informasaun klaru kona-ba situasaun rai laran mós mai Eskuadra PNTL ida-idak para hetan esplikasaun,” sujere Euclides.
Fortifika seguransa ba komunidade katak Euclides, maske prosesualmente tuir kodiku penal PNTL maka hala’o servisu ba asistensia seguransa maibé hetan apoiu mós hosi ordém parserial Falintil-Forsa Deveza Timor-Leste (F-FDTL) no Polisia Militar (PM).
Hosi forsa seguransa ne’ebé maka iha, Euclides husu ba komunidade atu keta tauk ba rumoris oin-oin. Lalika halo imajinasaun oin-oin. Timor-oan idak-idak husu para hala’o nia kna’ar hanesan bain-bain.
“Ami nia polisia sira lao iha luron mós iha. Keta tauk. Polisia mak imi nia seguransa rasik. Tenki depozita konfiansa ba seguransa sira para bele asegura ita hotu,” katak Euclides ba komunidade ne’ebé prekupa ho isu sei akontese konflitu ba programa VII Governu Konstituisionál se’e wainhira la-passa.(Reportájem Hilario da Silva)
Ita nia komentariu konaba post ne'e.