(Reportajen Guilhermino Ramos/ Asistente Editor Marcelino Tomae )
DILI (Media ONE Timor) — Joven Timoroan sira ne’ebé hakarak pasa vida ba servisu iha rai liur, sempre hasoru problema iha ema nia rai. Nune’e, husu ba Governu mak tenke iha obrigasaun atu trata sira ho dignidade.
“La bele hanesan ita rona katak, joven sira iha Portugál toba iha dalan ninin no uma tatis. Ne’e laiha dignidade. Governu mak tenke haree, atu joven sira ba hodi moris no servisu ho dignidade. iha ema nia rain.”
Sujestaun ne’e hato’o hosi Reformadu Tenente Jenerál, Lere Anan Timur ba Jornalista hafoin hasoru malu ho Prezidente Repúblika, José Manuel Ramos Horta iha Palásiu Prezidensiál, Díli, Kinta (14/07/2022).
Nia esplika liutan, sorumutu ho Xefe Estadu hanesan maun no aman ba povu hodi ko’alia konaba situasaun polítika interna. Liliu, joven sira ne’ebé nadodon ba rai liur hodi hasoru situasaun defisil iha ema nia rain.
Aliende ne’e Lere sujere ba Governu para husu responsabilidade ba ajénsia sira ne’ebé fasilita joven sira ba rai liur hodi evita akontese tráfiku umanu no krime organizadu. Maske, daudaun ne’e komesa hahú akontese ona.
Konta Lere, joven sira sai ba liur ne’e signifika TL exporta ona ema. Maibé, aumezmu tempu halo importasaun osan. Nune’e, sira tenke ba ho dignidade. Hela iha ema nia rai moos ho dignidade no fila mós ho dignidade.
“Agora iha tan fenomena foun ida ne’ebé sai preokupasaun públiku, mak ajénsia barak iha Timor-Leste ne’ebé hakarak fasilita Timoroan sira servisu iha rai liur. Maibé, to’o ema nia rai moris terus no susar liu”, dehan Lere hodi hatutan.
Governu TL no Portugal presiza halo akordu hanesan Austrália ho Korea. Nune’e joven sira labele ida-idak la’o ninian. Governu moos tenke iha obrigasaun para kontrolu maka’as ajénsia traballadór sira ne’ebé eziste.
Iha parte seluk sorumutu Lere ho PR Horta koa’lia moos kona-ba dezenvolvimentu militár. Katak, priodade forsa armada tuir estatutu 2020 mak programasaun militár. Mak, tenke iha kapitál umanu no iha kapasitasaun ba ofisiais sira para matenek no iha vizaun ba dezenvolvimentu instituisaun forsa armada.
Hatan ba perkupasaun ne’e Lere haktuir, Prezidente Repúblika Horta husu para tenke iha forsa rezerva ne’ebé hanaran forsa prevensaun. Forsa rezerva ne’e mak Kompañia ida iha Palásiu Prezidensiál kaza militár nian hodi asegura servisu Xefe Estadu nian.
“Xefe Estadu José Ramos Horta la hanesan ho kualkér prezidente. Tanba nia hanesan mós Premiadu Nobel da Pas. Dalaruma nakloke liu ba ema hotu. Nia lagosta forsa barak ne’ebé besik liu ho nia,” Lere haktuir. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.