(Reportajen Maria Sandrawati/Editora Suzana Cardoso)
DILI (Media ONE Timor) – Maske tinan 22 ona hikis aan hosi okupasaun Indonezia maibé Timor-Leste sei menus fasilidade importante iha area oioin, inklui ró operasionál ba komponente Naval F-FDTL (Falintil-Forsa Deveza Timor-Leste) nian.
“Ita nia Governu simu ro tolu ne’ebé entrega mai Komponente Naval. Hosi ro tolu ne’e, ro rua entrega ba Polisia Maritima. No ida seluk maka planu atu utiliza ba komponente naval hodi halo operasaun. Maibé la konsege.”
Lia fuan hirak ne’e hato’o hosi Komandante Komponente Naval Kapitaun Mar e Gerra, Higinio da Neves ba Jornalista iha Portu Dili, Sesta, (22/07/2022).
Nia esplika liutan, Governu Timor-Leste (TL) simu ro tolu ne’e hosi Governu Korea ho kondisaun tuan ona. Ro rua entrega ba Polisia Maritima no ida seluk ba Komponente Naval atu uza ba hala’o servisu operasional nian.
Maibé, hatutan Kapitaun Neves bainhira Governu TL simu ro ne’e hosi Governu Korea ho nia kondisaun tuan ona. Nune’e, ro ne’e avaria hela. Komponente Naval la konsege utiliza hodi halo operasaun.
Katak Kapitaun Neves, TL laiha fasilidade no kapasidade ekonomia hodi halo manutesaun ba ro ne’ebé avaria. Nune’e mak to’o agora ro ne’ebé entrega ba Komponente Naval F-FDTL nian para deit iha ponte kais, Governu TL dezenvolve hodi utiliza ba atividade komersiu.
Katak Kapitaun Neves, tinan 10 ona membru F-FDTL husi komponente Naval laiha ro patroliamentu hodi apoiu servisu Maritima.
Maske dehan Kapitaun Neves, Komponente Naval utiliza ro ida ne’ebé sosa husi Xina hodi halo operasaun hosi tasi mane Jaco, Lospalos mai Betanu, Manufahi. Maibé, kondisaun ro avaria ona.
“Ro ne’ebé fó hosi Xina ne’e iha hela prosesu manutesaun. Maka agora F-FDTL laiha ro operasaun. Dezde hau asume kargu hanesan Komandante Komponente Naval to’o agora seidauk iha ro Patroliamentu,” Kapitaun Neves dehan hodi hatutan.
Nasaun TL iha rekursu tasi nian ne’ebé luan no bo’ot. Maibé dezafiu ida ne’ebé bo’ot ba Komponente Naval maka laiha ro operasaun hodi difikulta tebes halo servisu operasaun nian.
Hatan Jornalista konaba aliende ro, fasilidade hirak ne’ebé urjente no nesesariu ba Komponente Naval katak Kapitaun Neves, tuir proposta Komponente Naval halo ona desmatela ba iha patrimoniu estadu.
“Patrimoniu estadu mak haree sasan sira hanesan kilat no sasan ida ne’ebé importante, sei hasai hodi bele uja ba militar nian. No makina sira sei utiliza ba terenu iha area terrestre, ne’ebé sei prepara iha futuru”, Kapitaun Neves hateten.(Asesu Youtube/Facebook https://www.facebook.com/Media1Timorv Media ONE Timor)
Ita nia komentariu konaba post ne'e.