(Reportajen Marcelino Tomae/Editora Suzana Cardoso)
Dili (Média ONE Timor) — Defende direitu ba obra ne’ebé maka eskritor hakerek múzika no artista sira halo maka Parlamentu Nasionál (PN) halo ona lei direitu kodigu autór ne’ebé hatuur iha regulamentu numéiru 40/V (4a).
“Depois de restaurasaun Ita nia Repúblika Demokrátika Timor-Leste (RDTL), foin primeira ves maka Timor-Leste iha lei kodigu direitu autór iha númeru 40/V (4a) ida hodi halo protesaun ba obra artista sira nian.”
Informasaun ne’e hato’o husi Prezidente Komisaun ‘G’ ne’ebé trata asuntu ba edukasaun, juventude, kultura no sidadania, Deputadu Antonino Verdial da Souza ba Jornalista iha resintu Parlamentu Nasionál (PN), Kinta (01/12/2022).
Projetu Lei kodigu direitu autór Númeru 40/V(4) hamutuk artigu 224. Maibé hadia fila fali iha debate espesialidade maka hela deit artigu 100. Proposta lei ne’e mai husi komisaun G, A no komisaun D. Komisaun tolu ne’e husu hodi sai proponente. Aliende hodi hadia lei ne’e.
Deputadu Verdial fiar katak ho lei ne’e artista Timoroan tomak bele hala’o sira nia profisaun no produs sira nia obra ho laran hakmatek no haksolok. Tanba, sira iha ona lei baze fundamemtal ida.
Tuir Deputadu Verdial, hanoin ne’ebé murak espesialmente ba kantora sira. Múzika na’in sira ka produsaun ne’ebé sira halo rasik. Ida ne’e bele defende, prespetiva aspetu legalidade hanesan direitu ba autór sira.
Informa Deputadu Verdial, iha loron 29 Novembru 2022 komisaun ‘G’ lori ona projetu lei númeru 41/V/4a) kona-ba autór kodigu artista ba iha plenaria hodi halo debate finál global. Debate ne’e pasa iha PN ho aprovasaun 48 votu, kontra zero no abstensaun na’in ida.
Hafoin pasa iha plenaria katak Deputadu Verdial, PN husu komisaun ‘G’ atu hadia lei númeru (41/V/4a) nia redasaun finál durante loron lima nia laran. Nune’e, dau-daun ne’e projetu lei ne’e sei hadia.
“Redasaun finál hadia hotu ona maka foin hato’o fila fali ba meza Parlamentu Nasionál hodi bele kanaliza ba Prezidente Repúblika Demokrátika Timor-Leste. Ho esperansa boot katak lei ida ne’e bele aprova di’ak liu tan no lalais”, ho esperansa Deputada Verdiál hateten.
Katak Deputadu Verdial, Timoroan barak maka hakerek ona sira nia múzika. Maibé, iha ema balu maka kopia fali. Ida ne’e maka bele halo eskritoriu laran susar. Sira la bele duun fali ema. Tanba lei seidauk iha. Lei ne’e kuandu promulgadu ona, sei regula asuntu hirak ne’e.
“Lei ne’e iha artigu lubuk ida iha laran. Nune’e iha dalan bá autór ida ne’ebé maka sente na’in ba obra ne’ebé maka nia iha bele husu nia direitu hodi defende nia obra ba nia aan”, esplika Deputadu Verdial. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.