UKL Faze Daruak Hahú Ona Iha Baukau

(Reportajen Tomas Reis/Asisten Editor Jacinto Caet)

BAUCAU (Média ONE Timor) — Ministeriu Administrasaun Estatál (MAE) ho Dezenvolvimentu Programa Nasionál Dezenvolvimentu Suku (PNDS), ohin Tersa-feira 28/06/2022 halo ona verifikasaun ba Uma Kbiit Kaek (UKL) faze daruak iha Munisípiu Baukau.

“Ohin halo verifikasaun ba ita nia UKL tinan-2022 nian, ne’ebé ita konklui ona, óras ne’e ita tama ona preparasaun point no preparasaun ba prosesu aprovizionamentu.”

Asuntu hirak ne’e, hato’o hosi diretóra programa nasionál dezenvolvimentu suku (PNDS) Baukau, Amelia Maria Viegas iha kna’ar fatin Vila-Nova Baukau, tersa (28/06/2022).

Diretóra ne’e hatutan, UKL iha munisípiu Baukau hamutuk 553, kada suku hetan uma sia (9), ho tipu ne’ebé diferente, medida 3×7 kompostu hosi kuartu rua, medida 4×8 kompostu hosi kuartu tolu.

Amelia informa, kona-ba lansamentu fatuk dahuluk ba UKL 2022 seidauk bele fó sai ba públiku, tanba projetu implementasaun tinan-2022 númeru ne’ebé boot.

Daudaun ne’e PNDS nasionál deside ona UKL faze daruak fó prioridade ba empreza lokál sira, hodi jere projetu UKL, suku mak sei fó avaliasaun ba kompañia lokál sira ne’ebé sai fornesedór.

“Oras ne’e kompañia hirak ne’ebé rejistu ona hamutuk 90 resin, ita garante tanba kritéria hirak ne’ebé mak ita fó kompañia tenke iha lisensa negósiu kompletu, ita mós esplika ba sira kona-ba fundus iha sira nia konta bankária hanesan garansia ba implementasaun UKL,” katak nia.

Amelia afirma, tuir planu tempu PNDS Baukau sei realiza enkontru ho kompañia lokál sira ne’ebé submete ona dokumentu iha aprovizionamentu hodi ko’alia asuntu mata-dalan PNDS nian hafoin halo lansamentu primeira pedra ba UKL nian.

Enkuantu durante halo verifikasaun ba benefisiariu UKL kompostu husi ema na’in 8 hanesan, lidera husi Xefe suku, reprezentante joven, Xefe Aldeia albu, OPS, reprezentante veteranu, inklui reprezentante relijiaun iha suku refere.

Entertantu orsamentu ba UKL tinan 2022 nian hamutuk 9.779.520,00 Milloens no osan ba operasional hamutuk 359.718,00 milloens.(Asesu Youtube /Facebook Média ONE Timor)