DÍLI (Media ONE Timor) – Atu fasilita veteranus nia oan no oan kiak sira nia estudu iha universidade, Ministerio dos Asuntos da Combatentes da Libertação Nacionál (MACLN) sei ajuda ba estudante Secundariu sira ne’ebé valor bo’ot.
“Ami sei fasilita veteranos no oan kiak sira nia oan ba asesu iha univesidade. Maibé tenki estuda maka’as hodi sira bele priense rekezitu husi universidade. Nune’e, governu la taka matan ba sira nia esforsu.”
Lia fuan ne’e hato’o husi Ministru MACLN, Julio Sarmento da Costa Meta Malik ba jornalista sira, hafon remata asina Memorandum of Understanding (MoU) ho Ministrerio do Ensino Superior Ciencia e Cultura (MESCC) iha Salaun Infordepe, Tersa, (08/09/2020).
Nia esplika liutan, MoU entre MACLN no MESCC ne’e hodi fasilita diak liutan veteranus no kbi’it laek nia oan sira ne’ebé iha intensaun atu hakarak eskola liu husi hatudu sira nia valor ne’ebé diak para hodi asesu iha universidade.
Katak Meta Malik, iha futuru ministeriu rua ne’e sei servisu hamutuk hodi tau prioridade ba veteranus no oan kiak sira atu asesu iha universidade. Maibé, tenki lao tuir kriteria sira ne’ebé universidade sira haruka.
Nune’e dehan Meta malik, tenki estuda mak’as hodi priense rekezitus sira hanesan, presiza valor ne’ebé boot, abilidade analiza, peskisa no tenki kritiku hodi sai estudante ne’ebé kualidade ba dezemvolvimentu nasaun Timor-Leste ida diak liutan.
Iha fatin hanesan Ministru MESCC, Longuinhos dos Santos hateten, asinatura MoU ne’e importante atu servisu hamutuk hodi bele identifika estudantes veteranus nia oan no oan kiak sira para bele asesu iha universidade.
“Asinatura ida ne’e importane tebes, atu oinsa mak bele servisu hamutuk ho linha ministerial sira. Nune’e bele identifika estudantes sira ne’ebé atu asesu iha universidade,” katak Ministru MESCC, Longinhos hodi hatutan planu bolsa estudu ne’e sei exekuta iha tinan 2021.(Reportájem Javelino da Silva)
Ita nia komentariu konaba post ne'e.