DÍLI (Media ONE Timor) – Maske ho rekursu naton, maibé prezensa Jornál Suara Timor-Timur (STT) iha tempu okupasaun Indonezia, konsege produz jornalista Timoroan lubuk ida, ne’ebé famozu iha Nasaun Timor-Leste (TL).
“Jornalista ho média hanesan satu sisi mata uang yang tidak dapat dipisahkan (moeda ida ne’ebé labele haketak malu). Média laiha, jornalista laiha. Iha média maka iha jornálista. Husi STT nia prezensa iha rezimi ditadura Soeharto, konsege produs Timoroan lubuk ida ne’ebé iha komitmentu a’as iha mundu jornalizmu to’o ohin loron.”
Lia fuan ne’e fo sai husi Xefi Redasaun Diáriu Suara Timor Lorosae (STL), Domingos Saldanha wainhira simu formandu sira husi Centro Formação Técnica Comunicação Sociál (Ceftec) iha Salaun redasaun STL, Tersa, (29/09/2020).
Nia esplika, jornalista nia profisaun ne’ebé hala’o iha média means trim, ajensia notísia nasionál no internasionais nia ejizensia mak vertude jornalizmu nian. Jornalista tenki ónestidade no liberdade.
Domingos dehan, wainhira ema fiar média, kuandu jornalista halo reportazem labele ho sentimentu tendensiozu. Labele halo akuzasaun falsa seim cover both side. Esplika kronolozia tuir profisaun jornalizmu nian.
Hateten Domingos hodi fo exemplu; rona akuzasaun ema halo korupsaun. Tenki halo cover both side. Buka tuir ema ne’ebé hetan akuzasaun hodi husu informasaun. Tanba, jornalista nia konvivensia laos ânglu ida deit.
Tuir Xefi Redasaun nu’udar mós nain ba Kompaña STL Group ne’e hateten, atu labele tendensiozu maka reportazem notísia tenki haré ninia valor ba sosiedade, fo influensia no bele eduka sosiedade hahu iha nivel nasionál, rezional, internasionais no to’o iha nivel povu lian la sai.
“Hakarak sai jornalista labele iha lia fuan kolen. Profisaun jornalista hanesan ho mestri, juiz, prokurador jeral no doutor. Jornalista servisu laiha óras. Katak, prontu atu servi kualker situasaun no tempu. Kuandu kolen diak liu hili profisaun seluk,” sujere Domingos.
Tuir Domingos nia observasaun, iha TL mezmu iha ona média investigativu, maibe sei ‘dansa’ ho notísia straight news (reportagem baziku). Maske prezensa média sosiais obriga média emprimi tenki muda a’an ba reportagem mediu no reportagem nivel a’as.
“Tuir predisaun matenek nain, pezensa média sosiais obriga jornalista ba média konvensionál sira labele halo ona reportagem straight news. Tanba, sei lakon fama no kualidade,” tenik Sefi redasaun STL ne’e hodi hatutan.
Maibé kualidade edukasaun no ekonomia iha TL ne’ebé sei tu’un liu, prejudika kapasidade no fasilidade jurnalista sira atu halo reportagem mediu no nivel a’as. Nune’e maka dala barak jurnalista sira halo kobertura bazeia deit ba konvite.
Jornalista Famozu Iha TL
Iha parte seluk Sefi Redasaun STL, Domingos Saldanha nu’udar mós nain ba Diáriu Suara Timor-Timur (STT) ne’e konta, prezensa jurnál ístoriku STT maka sai lian ba sira ne’ebé lian laiha. Maka pro independensia.
Maske, esplika Domingos rekursu ne’ebé naton husi tulun groupu Kompas. Diáriu STT lao hakdasak to’o Setembru 1999. Sira ne’ebé sai jornalista, tanba vokasaun (panggilan alam). Suzana Cardoso tama liu semana ida ba halo ona kobertura. No Rosa Garçia tama liu husi sai sales iha públisidade, hafoin muda ba sai jornalista.
Domingos hateten, iha tempu okupasaun Indonesia uniku jurnál STT maka eziste. Ezistensia diáriu ne’e nia públikasaun notísia, husi progresu dezemvolvimentu Indonezia nian nomos ba ezistensia rezistensia sira.
Balansu ba informasaun ne’ebé hetan fiar ne’e tuir Domingos, tanba dedikasaun jurnalista sira nian. Sira ho maturidade tomak fo tulun sira ne’ebé laiha lian. No Governasaun Indonezia ne’ebé respeitu teb-tebes jurnalista nia servisu.
“Ulun boot husi Korem 164/Wira Dhama Timor-Timur momentu ne’eba fo osan hau, haruka hasai jurnalista Timoroan balun ne’ebé brani hakerek ulun boot resistensia ho atividade pro kemerdekaan nian. Maibé hau lakohi hodi dehan, nee asset STT nian,” konta Domingos hodi hatutan.
Tanba militar Indonesia sira hatene sei nafatin iha STT, entaum sira labele halo asaun. Maibé kuandu sai ona husi jurnalista, sira bele naok hodi ba oho subar. Jurnalista hirak ne’e mós ativista pro kemerdekaan, maka militar Indonezia bele halo intimidasaun hodi husu ema sira iha kotuk husi atividade pro kemerdekaan nian.
Katak Domingos, meski diferente politika maibé mayoria Timoroan no jornalista Indonezia sira iha STT ne’ebé hatene no kuñese fontes sira lakeisar arbiru. Lahalo manobra ba sira nia interese privadu. Lafa’an entre Timoroan, tantu husi pro otonomia no pro independensia.
Nune’e Domingos argumenta, sira sai jornalista famouzu. Servi ho komitmentu tomak hodi atende públiku nia nesesidade ba asesu informasaun to’o ohin loron. Sira ne’e maka nakfilak a’an ba jornál ístoriku iha; Suara Timor Lorosa’e no Diáriu Timor Post.
Maibé tuir Domingos, tanba ekonomia sei hakdasak no edukasaun nia kualidade sei menus liu, prejudika komitmentu iha mundu jurnalizmu nian. Iha TL jornalista infrenta hasoru fontes.
Domingos dehan, jornalista marka tiha audensia. Hein to’o fulan la bolu. Informasaun ne’e la konsege rekolla. Ministeriu no sekretariu estadu sira maioria fo informasaun bazeia ba ideia no argumentasaun deit. Laiha dadus hodi fortifika transparansia.
“Kazu konkreta. Daun-daun ne’e sai preukupasaun públiku, maka osan ita nian iha Amerika, bele transfere mai ka lae. Atu halo konfirmasaun ba Ministra, maibe dehan tempu laiha. Isu barak husik deit iha sosiedade, hodi sai preukupasaun bo’ot,” katak Domingos hodi ezizi media officer sira nia atensaun.
Antes remata, formandu Ceftec halo vizita ba studio STL TV no Radio STL. Hafoin kontinua ba vizita makina emprimi jornál STL nian hodi hetan esplikasaun konaba prosesu emprimi jornál STL.
Iha STL Group aliende nain ne’ebé mai husi STT mak; Salvador Januario Ximenes no Domingos Saldanha, iha mós jurnalista ne’ebé uluk haknar a’an iha STT mak; Germano Sousa (Timoroan), Mikael Mali Mau no Gaudensio Mau husi Indonesia.(Reportájem Formandu Ceftec Juvenal de Araujo/Adolfo Natalia da Silva-Editor Suzana Cardoso)
Ita nia komentariu konaba post ne'e.