(Reportajem Estajiada Teotonia Neto-Nuryanti/Editora Suzana Cardoso)
Dili (mediaonetimor.co) – Votus husi partidu sira ne’ebé la-atinji to’o maizu menus 26,000 hodi bele liu bareira ba tuur iha kadeira Parlamentu Nasionál (PN), sei la uza. Votus hirak ne’e tuir lei labele fó ba Partidu sira ne’ebé liu barreira. Votus ne’e konsidera hanesan votus ne’ebé la uza ona.
“Kona-ba metodu D‘Hondt ba sira ne’ebé la atinji bareira, iha lei la-hatete atu fó hodi atribui ba fali partidu seluk”, hatan Vice Prezidente Komisaun Nasionál Eleisaun (CNE Sigla Portugues), Domingos Barreto ba Jornalista sira iha konferensia imprensa ne’ebé hala’o iha salaun CNE, Kinta, (25/05/2023).
Nia hatete, iha lei eleisaun parlamentar nian ne’ebé uza metodu D’Hondt hodi determina totál votus as liu ba distribuisaun kadeira iha PN ne’e, kuandu remata halo balansu apuramentu husi CNE, votus husi partidu la-liu bareira la uza ona.
Metodu D’Hondt ne’ebé uza iha Nasaun Estados Unidos iha tinan 1791 hodi sura kadeira reprezentante iha Parlamentu nasaun ne’e nian katak Domingos, partidu sira ne’ebé la-hetan votus maizu menus 26.000 to’o 27.000 konsidera la liu bareira. Sira nia votus sei la uza ona. Votus ne’e la vale ona.
Eleisaun parlamentar tinan 2023 ne’e hamutuk partidu 17 maka kompete. Maibé iha apuramentu balansu ne’ebé hala’o husi CNE foin atinji 24%, partidu; CNRT, Fretilin, PD, KHUNTO no PLP maka liu ona bareira. Maibé partidu 11 seluk hanesan; PVT, PUDD, APMT, CASDT, PLPA, PST, PDC, PR, UDT, UNDERTIM, MLPM no PDN maka seidauk liu barreira.
Apuramentu balansu votus ne’ebé hahú dezde loron 24, 25 no sei remata iha loron 26 Maiu 2023 ne’e, iha loron daruak, 25 Maiu 2023 dadeer CNE foin maka atinji 24% husi sentru votasaun 348 ne’ebé konfirmadu husi munisipiu; Aileu votus konfirmadu (29,763), Ainaro(37,029), Atauro (6,534) no Bobonaro votus konfirmadu (57,530). Sei falta sentru votasaun 1, 124 ka 76% husi totál sentru votasaun 1,472 iha Timor-Leste no diaspora.
Hasa’e Kadeira CNRT
Iha parte seluk Vise Prezidente CNE ne’e esplika, husi Munisipiu Aileu hamutuk votu reklamasaun ualu. Votus haat nulu. No haat seluk validu, ne’e atribui ba partidu CNRT. Iha Aileu moos mosu discrepância númerika. Maibé konsege detekta. Tanba eleitor ne’ebé vota tau fali ba urna laran. Nune’e konsidera nu’udar votu rezeitadu.
Husi Ainaro nian votu relamadu lima no sai validu no atribui ba partidu CNRT. Husi Atauro votu reklamadu ida no sai validu hodi atribui ba CNRT. Husi Bobonaro votu reklamadu hamutuk 43 sai nulu 6, sai branku 3. No validu 34. Atribui ba partidu PD 3, Khunto 2, Fretilin 5 no CNRT 24.
Husi Munisipiu Covalima, votu reklamadu sia. Nulu rua no validu hitu. Atribui ba PD ida, Fretilin rua no CNRT haat. Husi Munisipiu Baucau nian iha moos discrepância. Iha bulletin votus tolu maka sai nu’udar votu abandonadu. Tanba eleitor ne’ebé vota la tau bulletin iha urna laran.
Aliende ne’e katak Domingos, durante realizasaun apuramentu, CNE moos simu keixa no reklamasaun kona-ba Elia da Costa Babo hamutuk ho reprezentante partidu CNRT no Partidus OS Verdes halo partisipasaun minoridade ne’ebé iha votasaun konfirma katak mosu praktika ne’ebé iha kategoria krime eleitorál.
“Krimi eleitorál ne’e partisipa husi minoridade ne’ebé refere, ladauk atinji idade 17 para atu vota. Nia moris iha Fulan Agostu 2006. No oras ne’e dau-daun, kazu refere prosesu ona ba iha Ministeriu públiku”, hateten Domingos hodi hatutan.
CNE moos simu reklamasaun husi Duarte Maia hamutuk ho reprezentante Partidu Politiku CNRT no partidu Os Verdes nian iha sentru votasaun EP Mazo, Suku Aiasa, Bobonaro. Katak, iha fiskais nain rua maka uza likus kartaun kredensiál ida hodi ba vota. Keixa ne’e moos aprezenta no prosesa dau-daun ona.
Hateten Domingos, kazu seluk maka iha eleitor ida ne’ebé vota dala rua. Nia hanesan fiskais husi partidu KHUNTO nian. Fiskais ne’e ba vota tiha iha sentru ida, depois nia sai fali husi sentru ida ne’e nian ba vota fali iha sentru seluk. Ba kazu ida ne’e fó ona ninia prosidementu ba Polisia hodi halo ona investigasaun. Dau-daun ne’e submete ona ba Ministerium púbiku.
Kona-ba reklamasaun ne’ebé hateten, iha ema Indonezia hakat husi mota sorin mai vota iha Munisipiu Bobonaro katak Domingos, hafoin halo aprivicação (hak istimewa-Lian Indonesia) hamutuk ho Polisia nota katak ema ne’e sidadaun Timor-Leste.
“Nia hela iha memo, hola feto maka ema Indonesia. Durante ne’e nia mai tuir bei-beik ona eleisaun. No nia seidauk sai sidadaun Indonesia. Nia sei kontinua sai sidadaun Timor. Bai-bain iha ne’eba nia ba mai. Sidadaun ne’e moos iha dokumentu kompletu. Iha Passaporte no kartaun eleitoral”, tenik Vice Prezidente CNE, Domingos Barreto.
Hosi portal CNE nian ne’ebé Media ONE Timor asesu nota katak, maske balansu apuramentu foin maka atinji 24% maibé CNRT nia kadeira sae ona ba to’o 33 kompara ho Fretilin ho kadeira 13, KHUNTO 8, PD 7 no PLP kadeira 4. Maibé kadeira sei bele menus no bele moos sae tan. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.