Povu Nia Direitu ba Informasaun Violadu, CI no Orgaun Ezekutivu ‘Finjidu’

(Rejultadu diskusaunentre formandu Ceftec formasaun Nivel III, kona-ba Kodigu Étika Jornalizmu Imprensa iha unidade Hakerek Imprensa tinan 2023)

Dili (mediaonetimor.co) – Orgaun ezekutivu no Konsellu Imprensa (CI Sigla Portugues) mak iha poder atu halo koordenasaun mutua hodi asegura povu nia direitu ba informasaun ne’ebé loos no kredivel. Nune’e Jornalista no media ne’ebé sai instrumentu ba povu nia direitu ne’e, presiza iha liberdade ba asesu fatin públiku sira no independente iha públikasaun informasaun sira. Maibé misaun sagradu jornalista nian ne’e iha eleisaun Parlamentar tinan 2023 la realiza, tanba orgaun ezekutivu no CI nu’udar liman ain hodi koordena ho STAE halo ‘finji’ la hatene.

Nu’udar instituisaun implementador ba eleisaun sira, STAE (Sekretariadu Tékniku Administrasaun Eleitorál) no instituisaun fiskalizador CNE (Komisaun Nasionál ba Eleisaun),   organiza ona votantes Timoroan hamutuk nain 705.680 hodi ezerse sira nia direitu, hanesan sidadaun loloos liu hosi eleisaun parlamentar tinan 2023. Nu’udar Estádu Demokratiku ida, eleisaun sai nu’udar momentu ida ne’ebé povu hatudu ninia poder no depojita poder ba ukun nain sira liu hosi partidu polítiku ne’ebé mak eziste.

Nune’e iha loron 21 Maiu 2023, Timoroan depojita ona sira nia votus liu husi eleisaun. Hafoin eleisaun, Timoroan sira iha direitu atu hatene nia rezultadu imediatamente.  Tanba ema ne’e

naturalmente ‘hakarak hatene ’ no iha ‘direitu atu hetan informasaun’, inklui informasaun kona-ba kontajen. Tanba direitu ba informasaun ne’e nu’udar direitu fundamentál ida. Nune’e ema hotu-hotu, liu-liu militante no simpatizante sira hosi partidu 17 antuziasmadu hodi akompaña prosesu kontazen.

Povu nia direitu atu hetan no hatene informasaun ne’e halulik ona iha Konstituisaun RDTL Artigu 40 kona-ba liberdade ko’alia no informasaun.  Iha alenea 1 hateten; “ema hotu-hotu iha direitu ba liberdade ko’alia nian no hetan informasaun ruma no tan informasaun loloos nian”. Tanba hatur ona hanesan lei inan ida, nune’e obriga sidadaun hotu-hotu atu respeita no hametin.

Povu nia liberdade atu asesu ba informasaun ne’ebé loos no di’ak ne’e realiza deit iha media akreditadu, liu hosi Jornalista profesionál sira ne’ebé servisu ba media ruma. Jornalista profesionál sira mak iha kompetênsia, direitu no dever sira atu buka, hetan divulga informasaun loos ba publiku tuir lei komunikasaun sosiál ne’ebé mak promulgadu husi Prezidente da Repúblika iha fulan Novembru 2014.

Lei komunikasaun sosiál ne’ebé maka fó liberdade tomak media no jornalista atu promulga informasaun ne’e hafoer tiha husi STAE ne’ebé autoriza de’it Media RTTL. EP mak halo transmisaun direta kona-ba rezultadu apuramentu votu nian ne’ebé hala’o iha loron 21 fulan Maiu tinan  2023. Desizaun STAE nian hodi limita media privadu sira atu halo transmisaun direta hamosu reasaun hosi parte oi-oin. Inklui, Prezidente Republika, José Ramos Horta. Xefe Estadu argumenta katak, desizaun ida ne’e prejudika imajen Timor-Leste nu’udar pais demokratiku ne’ebé kualifikadu iha kontinente aziátiku. Nune’e Xefe Estadu promete sei halo auditoria hodi hatene kauza loloos[1].

Iha fatin seluk, Diretor Ezekutivu Interinu Fundasaun Mahein (FM), Abél Amaral mos konsidera STAE diskrimina media seluk ne’ebé mak eziste iha Timor-Leste. Tanba STAE hili de’it media estatal RTTL.EP, entre media sira seluk hodi halo transmisaun direta ba kontajen votus no apuramentu, ne’ebé sira divulga la iha transparensia[2] tanba media estatál.

Media sira diskriminadu tanba STAE limite ona sira nia papel nu’udár órgaun komunikasaun sosiál nian ne’ebé mak atu informa, eduka no diverte hodi harii sosiedade ida ne’ebé informadu no opiniaun públiku ida ne’ebé la hanesan[3]. STAE nia desizaun hodi la kolabora ho jornalista sira hosi media privadu atu divulga informasaun direta ba povu konsidera kontra Lei Komunikasaun Sosiál ne’ebé hateten: jornalista iha direitu atu hetan asesu ba fonte no asesu ba informasaun[4] no la bele iha impedimentu ho forma saida de’it bainhira jornalista sira hala’o atividade jornalista nian iha fatin ne’ebé presiza ninia prezensa hanesan ema profesionál komunikasaun sosiál nian[5].

Limita media sira nia direitu atu halo transmisaun direta ne’e  nu’udár degradasaun valor demokrasia ne’ebé estadu ida ne’e komunga. Tuir Kódigu  Étika ba Jornalista  sira, liu-liu iha númeru 1 vinkula ona jornalista ida hodi defende sidadaun hotu-hotu nia direitu ba informasaun. Signifika, jornalista profesionál iha obrigasaun, dever no direitu atu buka no hetan informasaun hotu-hotu ne’ebé publiku nesesita liu-liu informasaun apuramentu votu nian. Maibé, STAE taka dalan ba jornalista sira privadu sira.

Inseguransa ne’ebé media sira hasoru iha momentu apuramentu, tuir loloos sai mos nu’udár responsabilidade Estadu nian. Tanba iha Lei Komunikasaun Sosiál artigu 5 mos mensiona kna’ar Estadu nian ba-iha área komunikasaun sosiál. Iha lei ne’e hateten estadu nia knaar atu garante ezistensia no funsionamentu radiodifuzaun no televisaun, liu-liu orgaun ezekutivu no instituisaun CI atu toma desizaun ruma ba asuntu ne’e.

Artigu 5

Kna’ar Estadu nian ba-iha área komunikasaun sosiál

1. Sai nu’udar kna’ar Estadu nian ba-iha área komunikasaun sosiál maka:
2. Garante ezisténsia no funsionamentu servisu públiku radiufuzaun no televizaun nian.
3. Asegura informasaun haruka-ba-mai livre no hetan asesu livre ba informasaun sira ne’ebé fó sai.
4. Mantein no defende plaralizmu no konkorénsia;
5. Fiskaliza kumprimentu ba lei no regra sira atu hodi hala’o atividade komunikasaun sosiál nian;
6. Kontribui ba informasaun profesional komunikasaun sosiál nian;
7. Estabelese medida sira apoiu nian ba órgaun komunikasaun sosiál privadu sira nian.   
8. Bele assegura servisu públiku komunikasaun sosiál nian liu hosi kontratu konsensaun, husi entidade públiku ka privada sira komunikasaun sosiál nian tuir regime juridiku ne’ebé maka bele aplika ba aktu ida ne’e.

Iha parte seluk, CI mos to’o agora la hola pozisaun ruma hodi hasoru desizaun STAE ne’ebé tuir loloos fó impaktu negativu ba servisu jornalizmu nian, ne’ebé sai ajente demokrasia iha rai ida ne’e. Durante períodu apuramentu wainhira média seluk la halo transmisaun, CI nunka halo komunikadu imprensa publikamente hodi hola pozisaun ruma atu responde ba ezizensia públika kona-ba povu nia direitu atu hetan informasaun lalais no loos. Nune’e  Prezidente Repúblika konvoka enkontru urjente ho Prezidente CNE, José Agostinho Belo, ne’ebé media nasionál sira pública, mos CI la book an nafatin.

Iha estatutu CI nian, iha artigu 13, alinea ‘a’ to’o ‘d’ mensiona klaramente kona-ba CI nia objetivu prinsipál mak atu promove no asegura meius komunikasaun sosiál no jornalista sira nia dever no direitu. Maske lei estatutu ne’e tama iha vigor iha loron 17 fulan Jullu tinan 2015, maibé media no jornalista sira la sente protejidu wainhira hasóru desizaun polítika sira ne’ebé mak la kontribui ba liberdade imprensa no liberdade ba espresaun.

Artigu 13

Objetivu sira atividade Konsellu Imprensa nian

Konsellu Imprensa Iha Objetivu principal sira maka:

1. Promove liberdade ba espresaun no imprensa;
2. Promove independénsia ba meus komunikasaun sosiál husi kualker influensia indivídu, grupu ka interese polítiku no ekonómiku sira.
3. Asegura katak asesu ba profisaun jornalista nian sei halo tuir kondisaun legal sira ne’ebé bele aplika;
4. Promove no assegura atu atividade jornalista sira nian dezenvolve ho profesionalizmu hodi respeitu padraun étiku aas no ho kualidade.

Jornalista sira nia sentimentu la protejidu ne’e laos de’it hasóru desizaun polítika,  maibé moos hasoru festa demokrasia iha eleisaun parlamentar tinan 2023, ne’ebé Jornalista nia liberdade atu asesu ba sentru votasaun hanesan iha eleisaun Prezidensiál tinan 2022 nian ne’e hetan impedementu. Tanba la hetan autorizasaun ho fó kartaun asesu livre ba jornalista sira husi STAE.

Nune’e direitu ema hotu-hotu atu hetan informasaun ne’ebé kredivel no lalais la konsege realiza iha eleisaun parlamentar tinan 2023. Povu nia direitu ba informasaun violadu. Maske nune’e ho espasu ne’ebé iha, jornalista sira uza hodi hala’o nafatin servisu jornalismu nian, tuir kódigu etika Jornalismu Timor-Leste nian.

Husi impedementu ne’ebé jornalista sira hasoru ne’e, husu CI atu hakas an tuir kompetensia ne’ebé hatur ona iha estatutu CI nian, iha artigu 11 ne’ebé ko’alia kona-ba dever kolaborasaun nian. Katak, orgaun komunikasaun sosiál no jornalista  sira tenke servisu hamutuk ho CI liu husi komunikasaun mutua. No hetan apoiu tomak husi orgaun ezekutivu sira hanesan Ministeriu Asuntus Parlamentar no Komunikasaun Sosiál (Mapkoms). Nune’e kazu hanesan STAE ne’ebé fó biban de’it ba RTTL, E.P maka halo transmisaun direta, la-bele repetetan iha futuru.

Artigu 11

Devér kolaborasaun nian

1. Órgaun sira komunikasaun sosiál no jornalista sira tenke servisu hamutuk ho Konsellu Imprensa, liu-liu atu hetan informasaun no dokumentu sira, bainhira servisu hamutuk ne’e presiza hodi hala’o ninia knaar sira.
2. Bainhira hetan solisitasaun, tribunál sira tenke fó hatene ba Konsellu Imprensa konteúdu desizaun sira transitada-emjulgadu nian iha matéria kona-ba krime sira ne’ebé halo liuhosi meu sira Komunikasaun Sosiál, direitu ba resposta no responsabilidade sivil ne’ebé prevee iha artigu 39˚ hosi Lei Komunikasaun Sosiál nian, sein prejuízo ba rezerva vida privada involvidu sira nian.

Maibé atu labele kria diskriminasaun entre media estatál no media privadu sira ne’ebé kontribui mak’as ona ba haburas demokrasia iha Timor-Leste, durante tinan barak nia laran, maka orgaun ezekutivu sira presiza fasilita ho harii sentru ba media sira iha eventu-eventu nasionál sira, liu-liu tempu festa demokrasia, ne’ebé ezizi transparansia ba ninia prosesu tomak, nu’udar pontu importante ba garante liberdade imprensa no espresaun ne’ebé iha loron 3 Maiu 2023 Timor-Leste tama ona kualifikasaun númeru 10 nível  mundiál. (Asesu Youtube/Facebook https://www.facebook.com/Media1Timor Media ONE Timor)

[1] Pájina FB, Presidência da República Democrática de Timor-Leste, 22/05/2023

[2] Pájina FB, Fundasaun Mahein, 25/05/2023

[3] Cf. LCS, Artigo 22, N^o 1.

[4] Cf. LCS, Artigo 19, N^o 1.

[5] Cf. LCS, Artigo 19, N^o 6