Manán Maioria, AMP Tenki Servisu Mak’as

MEDIAONETIMOR-Atu manan maioria iha Eleisaun Antisipada (EA), Aliansa Mudansa ba Progresu (AMP) tenki servisu mak’as liu hosi estrutrura politika iha rai laran nomós iha rai liur.

“Iha EA AMP sei avansa ho ekipa hosi Partidu CNRT, PLP no Khunto hamutuk hó figura Kay Rala Xanana Gusmão, Taur Matan Ruak no Naimori maka sei fasil liu ba votantes atu kunyese AMP.”

Lia hirak ne’e kasu hosi Koordenador Komisáriu Komisaun Mídia, Informasaun no Públisidade (KMIP), Mericio Juvinal dos Reis Akara ba jornalista liu hosi konferensia imprensa iha sede Partidu CNRT foin lalais ne’e.

Nia esplika liutan, ho figura nain 3 ne’e sei fó forsa liutan ba AMP no fasil atu kordena ho votante sira iha fatin-fatin. Maske nune’e, estrutura politika sira tenki servisu ho hakbesik a’an ba votantes sira.

Laos hein deit maka vitoria mai. Maibé katak Mericio, estrutura, rede, membru no simpatizante sira iha fatin barak, inklui iha rai liur funsiona ho diak liu hosi mídia sosiais, elektronika, telephone para komunika ba-malu.

AMP Uza Poder Desentraliza

Ba Timor-oan sira iha rai liur dehan Mericio, AMP la-presiza haruka nia delegasaun ba to’o ne’eba. Iha estrutura politika organizadu para realiza programa EA nian. Entre strutura nasionál no rai liur sempre komunika ba malu ho update progresu Politika AMP nian iha Timor laran.

“Membru AMP iha rai liur intende politika hodi organiza malu. La-presija delegasaun AMP nian to’o iha ne’eba. Strutura AMP mós metin ona. Tanba desentraliza. Komunikasaun no desentraliza poder ne’e fasil liu,” esplika Mericio.

Poder sentralistiku ne’e maka tuir Mericio, deside tiha haruka ema ba. Maibé AMP nian lae. Desentraliza. AMP iha rai liur sira maka sei lori Politika AMP nian hodi halo sosializaun. Inklui, preparasaun ba EA.

Hatan Media One Timor konaba AMP depende ba naran bo’ot Kay Rala Xanana Gusmão no Taur Matan Ruak katak Mericio, figura lutador no resistensia maun bo’ot nain 2 ne’e hanesan nilai tamba. Maibé AMP tenki servisu mak’as. Tanba vitoria ne’e laos mai deit.(Reportájem Deonisio da Cruz/Suzana Cardoso)