Ahi Han Mutuk Armazém, Mane Ida Desmaio

DÍLI (Media ONE Timor) – Anin ne’ebé boot konsege dudu ahi han mutuk armazém farmácia Foho Osan Mean no armazém loja UD Palma, inklui mane ida desmaio, iha Bairu Metin Satu, Suku Bebonuk, Dom Aleixo.

Akontesementu ne’e akontese iha loron, Dominggu, (13/09/2020), maizu menus tuku 16:20 ÓTL. “Hau tu’ur jaga hela. Derepente komunidade balun halai mai. Hakilar, ahi hán gudang (armazém)-ahi hán gudang. Hau mós halai tu’un ba hare,” esplika segurança Kompanya Sun Mu Lda, ne’ebé besik malu ho ahi hán fatin.

Segurança Kompanya Sun Mu Lda, ne’ebé lakohi temi nia naran ne’e esplika liutan, wainhira ba to’o besik, ahi hán saé ho volume boot ona. Komunidade hela besik mós mai hobur nakonu. Balun hakilar bolu ambulansia-bolu ambulansia.

Tuir informasaun ne’ebé jornalista Media ONE Timor halibur iha fatin akontesementu katak, armazém farmasia foho osan mean rai sasan saúde nian. Hanesan, aimoruk, toba fatin ema moras nian no sasan seluk kona-ba moras nian.

Iha armazém UD. Palma rai roda, oli, kareta no sasan autopeças oficina nian. Sasan hirak ne’e rai iha Armazém ketak-ketak lori kuartu maka haketak. Armazém rua ne’e Kompanya Aitula nian maka fo aluga ba farmasia foho osan mean no UD. Palma.

Aliende ne’e sei husi observasaun jornalista Media ONE Timor katak, iha akontesementu ahi hán armajem ne’e, rezulta ahi han mutuk armazém rua ne’ebé nakonu ho sasan maibé iha mane ida maka desmaio.

Mane ne’e komunidade ho sira nia kareta privadu, ho voluntariumente ajuda tula ba kedas hospital hodi hetan lalais tratamentu saúde nian. Hafoin ne’e jornalista, tenta atu intervista nain ba kompanya maibé dehan sei trauma.

Hafoin ahi han, la kleur deit ekipa bombeirus to’o fatin. Ho esforsu mak’as atu hamate ahi. Bombeiros hetan apoiu mós husi Kompanya Elemloi ajuda tan kareta rua hodi lori be’e mai rega para habadak tiha ahi nia sirkulasaun.

Maibé, la konsege. Tamba ahi nia volume sae maka’as ona. Anin ne’ebé bo’ot halo ahi espalla ho lalais. Ekipa bombeirus ne’ebé rega desdde tuku maizu menus tuku 16:30 to’o tuku 18:00 ona kontinua lakan mak’as nafatin.

To’o notisia ne’e públika, seidauk hatene motivu husi akontesimentu ne’e, tanba seidauk hetan konfirmasaun husi Polisia Nasional Timor-Leste (PNTL) nomos Kompanya nain husi Foho Osan Mean no husi UD. Palma, inklui bombeirus.(Reportagen Javelino da Silva)