Aldeia 25 Seidauk Asesu Eletrisidade

(Reportajen Jornalista Baukau Tomas Reis/Asisten Editor Jacinto Caet)

BAUKAU (Media ONE Timor) – Maske ukun aan tinan 20 ona ho dezemvolvimentu ne’ebé lao avansadu loos, maibé populasaun iha aldeia 25 iha Postu Administrativu Laga, Munisipiu Baukau seidauk asesu ba eletrisidade.

“Dezde tempu okupasaun Indonesia to’o agora populasaun iha aldeia 25 ne’e hasoru problema seidauk asesu eletrisidade. Maske hau halo ona pedidu ba Governu, maibé to’o agora seidauk hetan resposta.”

Preokupasaun ne’e hato’o hosi Administradór Postu Administrativu Laga, Domingos Loiola José Pereira hodi hatan Jornalista iha Sentru Konvensõens Baucau (CCB‐sigla portugés), Tersa (28/06/2022).

Aldeia 25 ne’ebé seidauk asesu eletrisidade hosi suku Ualu; Suku Atelari iha aldeia balun eletrisidade seidauk lakan, Libagua mos iha, Nunira, Saelari, Sagadate iha aldeia rua de’it, Salamari aldeia rua, Soba iha aldeia haat no Suku Tekinaumata mós iha.

Impaktu hosi laiha eletrisidade iha aldeia hirak ne’e katak Domingos, fó impaktu ba estudante sira labele estuda iha tempu kalan, labele asesu progresu informasaun no labele halo mudansa ba moris nian tanba minimu ho kuñesementu inovasaun mundu nian. Komunidade mos tesi ai arbiru hodi uza ba sunu.

Maibé Domingus dehan, nia parte kontinua esforsu hatama karta pedidu ba governu sentral, nune’e bele hanoin povu nia preukupasaun, durante mandatu tinan lima nia laran.

“Husi esforsu ne’e fiar katak governu sei fó solusaun ba povu nia preokupasaun atu hetan naroman no kuñese nasaun Timor-Leste nomoos mundu nia progresu dezemvolvimentu”, katak Domingos.

Postu Administrativu Laga hamutuk iha aldeia 52 Xefe familia 4.656, no totál populasaun hamutuk 22, 486.(Asesu Youtube/Facebook https://www.facebook.com/Media1Timor Média ONE Timor)