Hamenus Dezempregu, PR Horta Husu Mobiliza Joventude Kuda Kafé

(Reportajen Guilhermino Ramos/Editora Suzana Cardoso)

ERMERA (Media ONE Timor) – Nu’udar kultura Timor-Leste (TL) nian, kafé tenke kuda iha fatfatin. Nune’e Governu presiza mobiliza joven barak ne’ebé mak dezenpregadu hela, hodi kuda kafé iha tempu feriadu.

“Kuda kafé iha fatin hothotu ne’ebé bele kuda. Ita hatene, joven dezenpregadu barak. Mobiliza jovetude sira kada tinan durante tempu feriadu. Haree ho klima fulan ne’ebé mak bele mobiliza sira para kuda kafe. Nune’e Timor-Leste bele sai produtor kafé mundiál, hanesan Amerika Sentral.”

Ezizensia ne’e hato’o hosi Prezidente Repúblika (PR) José Manuel Ramos Horta iha nia deskursu, bainhira halo dialogu komunitariu ho komunidade iha Munisipiu Ermera ho tema prinsipal ‘Dalan ba Dame’ no Sub tema ‘Hadomi Kafé, Hadomi Kultura’, iha Salaun Suku Talimoro, Postu Administrativu Ermera, Munisipiu Ermera, Sábadu, (09/07/2022).

Lee Notisia Relevante: Hametin Ekonomia TL-Indonezia, PR Ramos Horta Garante Atende Konvite Jokowi

Hahú hosi sub tema, hadomi kafé hadomi kultura, PR Horta konta katak, prezensa kafé iha TL, Portugal maka lori mai iha tempu Governador Celestino da Silva lori hosi Nasaun Arabika, iha maizu menus tinan 200 liubá.

Tuir PR Horta, historia kafé hanesan historia relijiaun Katolika. Missionariu sira lori mai tama iha reziaun Oe-Cusse, tinan 500 liubá. Hahú kedas ho kongregasaun, Portugal sira lori tinan 100 ba 100, hodi dezenvolve moos lingua Tetun. Igreja rasik maka kria no dezenvolve iha TL to’o ohin sai lingua nasionál ne’ebé mistura ho Lingua Portugues.

Tamba ne’e maka katak PR Horta, kafé sai hanesan evolusaun dinamika kultura. La’os estatiku lingua. No hosi fenomena evolusaun dinamika kafé ne’e, maka Timoroan tenke hadomi kafé hanesan kultura nasionál.

“Povu Timor nia toman, tenke halo ita hadomi kafé hanesan kultura nasional. Hanesan povu Japaneza. Povu Japaun haree hare hanesan buat sagradu. Foos haree konflitu bo’ot ne’ebé povu Japaun hasoru Estadus Unidos Amerika maka protisionismu bo’ot, laos ekonomia. Maibé kultura, sira hakuak foos”, tenik PR Horta hodi hatutan.

No dezde tinan 10-resin liubá, povu TL hakiak kafé hodi fó moris ba família. Ho esforsu tomak hamutuk Governu ho produtor sira, tenke aumenta produsaun kafé iha TL kada tinan tenke to’o rihun 50 tonelada. Tanba TL nia rai di’ak para kuda no hakiak kafé.

“Maibé presiza kuidadu kafé ho di’ak. Tamba kafé laos goiava fuik. Kafé presiza tratamentu di’ak, hanesan povu Japaun tau matan ba hare foos. Governu lapresiza estudu barak atu haree fatin kafe nian. Maibé presiza de’it maka reforsa Governu nia kbi’it ne’ebé iha ona durante tinan 20 nia laran ne’e”, PR Horta esplika.

Tuir PR Horta nia haree, iha Munisipiu Aileu halo ona estudu ba fatin hirak ne’ebé bele kuda kafé. Nune’e, presiza politika Governu nian hodi mobiliza joventude sira iha universitariu no sekundariu para abitua kuda kafé. Fatin hirak ne’ebé kuda kafé, bele uza moos hodi kuda vanilla no maek. Maibé, tenki tau importante liu ba kuda kafé.

Tanba ne’e PR Horta husu ba hotu-hotu atu servisu mak’as hamutuk ho instituisaun kafé sira iha TL. Governu presiza mobiliza nia rekursu privadu hodi kuda kafé iha fatin hothotu. ne’ebé bele kuda kafe. Aliende ne’e Governu presiza kria fundu ba kafé liu hosi fundu soberanu nian.

“Mobiliza Joventude kada tinan durante tempu feriadu, tuir fulan ne’ebé monu iha klima fulan ne’ebé mak bele kuda kafé. Nune’e, TL bele sai produtor mundiál. Pelemenus produsaun kafé to’o 30 mill ka 50 mill tonelada. Ne’e sai ona odamatan di’ak ba merkadu mundial kafe nian”, ezizi PR Horta.

Hanesan públika ona iha mídia sira katak, numeru dezempregu tinan ba tinan aumenta ba beibeik. Maibé laiha politika di’ak hosi Governu hodi kria kampu servisu. Nune’e, joventude sira obrigadu tenke sai hotu ba nasaun seluk hodi buka servisu, to’o balun sai vitima ba trafiku humanu.(Asesu Youtube/Facebook https://www.facebook.com/Media1Timor Media ONE Timor)