(Reportajen Livia Sarmento/Asistente Editor Marcelino Tomae)
DILI (Media ONE Timor) — Relasiona ho imformasaun sira ne’ebé espalla iha públiku kona-ba kombustivel iha Timor-Leste atu maran, Xefe governu Taur Matan Ruak la garante tanba litru milliaun haat tempu besik sei to’o iha TL.
“Ha’u dehan ba Prezidente Repúblika katak lalika preokupa ho informasaun kona-ba kombustivel atu maran. Tanba ita sei garante ba empreza sira ne’ebé halo hela sira nia atividade. Empreza estatál Timor Gap nia bele ativa.”
Deklara Primeiru Ministru (PM) Taur Matan Rauk ba Jornalista sira hafoin remata hasoru malu ho Prezidente Repúblika iha palasíu Prezidensial Ai-tarak Laran Kinta, (28/07/2022), hodi hatan komunidade Dili laran nadodon ba ense mina dezde Kuarta (27/07/2022) kalan to’o Kinta, (28/07/2022).
Lee Notísia Relevante: Labele Pániku Ho “Boatus” Kombustivel Menus
Xefe Governu hatete, nia parte simu ona informasaun husi ministériu petróleu, katak daudaun kombustovel litru milliaun haat tempu besik sei to’o iha TL.
“Ohin ministériu petróleu informa ona mai ha’u katak, daudaun ne’e Pertamina nia ro boot ida lori ona kuatru millions de litru mina gazolina iha tasi laran. Sira deskarga orsida lorokraik ka aban lori mina mai ona”, nia informa.
Tanba ne’e Xefe Governu apela ba populasaun, lalika pániku ho boatus ne’ebé espalla iha públiku, sei lae bele halai mohu to’o mate.
“Ha’u apela ba populasaun, lalika pániku. Tanba ho situasaun mina atu maran ita halai monu mate aan. Karik mina laiha para tiha motor no karreta la’o ain de’it. Tanba Maromak tau ita nia ain hodi la’o”, tenik PM Taur. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.