Husu Governu Kria Kondisaun Ba Arte-Marsiais

(Reportajen Guilhermino Ramos/Asistente Editor Marcelino Tomae)

DILI (Media ONE Timor) – Atu halakon atitude ne’ebé laiha valor husi arte- marsiais sira iha Timor-Leste (TL), sobreviviente 12 Novembru husu ba VIII Governu Konstitusionál atu kria fatin dignu hodi sira bele kontribui ba dezenvolvimentu nasionál.

“Ita nia Governu Timor-Leste presija kria kondisaun ne’ebé di’ak. Nune’e grupu arte-marsiais sira bele halakon atitude ida ne’ebé laiha valor ba dezenvolvimentu nian. No fó oportunidade ba ema hotu-hotu atu investe iha setór oioin hodi kontribui ba dezenvolvimentu nasional.”

Ezijensia ne’e hato’o husi Sobrevivente 12 Novembru, Manuel Saldañia ba Jornalista hafoin remata partisipa serimonia nasionál hodi selebra loron internasionál juventude iha salaun Universidade da Paz (UNPAZ), Sesta, (12/08/2022).

Nia esplika liutan, arte- marsiais uluk la hanesan agora. Iha tempu okupasaun Indonézia, eziste arte-marsiais barak. Maibé, hotu-hotu hamutuk ho prinsipiu ida de’it maka luta hodi liberta Patria ida ne’e husi kolonializmu Indonézia nia torturasaun.

Hosi prinsipiu fundamentál tuir funu nain Falintil ne’ebé konkista ona hatutan Manuel, mate ka Moris ukun rasik a’an. Ideolozia polítika ne’e mak Timor oan hotu-hotu ne’ebé namkari iha territoriu laran, inklui arte marsiais oioin hamutuk liberta povu husi liman kro’at invazor Indonezia nian.

Maibé, depois TL restaura ninia independensia katak Manuel, mosu fila fali arte marsias husi organizasaun Persaudaraan Setia Hati Terate (PSHT), Ikatan Kera Sakti Putra Timor-Leste (IKS-PTL), Kmanek Oan Rai Klaran (KORK) no arte ritual 77. arte-marsiais haat ne’e laiha hanoin inovativu hodi harii paz.

Nune’e, atu evita insulta malu ne’ebé kria situasaun lahakmatek iha nasaun demokrátika nia laran maka mate restu ne’e husu ba VIII Governu Konstitusionál para kria fatin treinamentu ba grupu arte-marsiais sira ne’e.(Asesu You Tube/Facebook https://www.facebook.com/Media1Timor Media ONE Timor)