Pe. Abito Nia Mate Isin Translada Ba Katedrál

(Reportajen Guilhermino Ramos/Editora Suzana Cardoso)

DILI (Media ONE Timor) – Hafoin hadeer iha Semináriu Maior Fatumeta durante kalan rua, Padre (Pe.) Abito José Brites Casimiro nia mate-isin translada ba Igreja Nossa Senhora Imaculada de Conçeição hodi hala’o misa funerál.

Tuir observasaun Media ONE Timor iha terenu; família, Padre, Madre, seminárista no sarani Dioseze Dili iha loron Kuarta, (24/08/2022) halo transladasaun mate-isin Pe. Abito husi semináriu Maior mai Igreja Katédral hodi hala’o misa funerál.

Hafoin to’o iha Igreja Katedrál kontinua kedas ho misa ne’ebé prezidi hosi Pe. Grasiano Almedia. Iha nia homilia Pe. Grasiano hateten, Maromak nia planu furak liu buat hotu-hotu ne’ebé eziste iha mundu.

“Maromak nia domin hodi hili Abito sai Amu Lulik hodi serbí igreja Katólika no sarani sira. Nai Maromak nia planu mós mak deside hodi bolu hikas Amu lulik Abito José Brites Casimiro ba hamutuk ho nia iha tronu lalehan”, dehan Pe. Grasiano.

Katak Pe. Grasiano, Nai lulik Abito nu’udar bibi atan di’ak ida ne’ebé iha esperansa ba nia sarani. Maibé liu husi Maromak nia planu bolu hikas nia. Tanba ema hothotu nia durasaun moris hakerek nanis ona iha historia Nai Maromak nian.

Hanesan ai-horis sira ne’ebé moris iha to’os laran haktuir Pe. Grasiano, nia sempre buras. Too nia tempu atu mate, nia sei mate. Ita ema nia moris hanesan aihoris iha to’os laran. Bainhira nia fó fuan di’ak, ema hothotu hakbesik hodi kuu lisuk. Maibé too ona nia tempu atu mate, ema hotu laiha espiritu ida ne’ebé ho domin boot hodi fó forsa ba nia.

“Ita mate iha rai sei moris fila fali iha lalehan. Ne’e Maromak hakerek ona iha livru historia ita ema moris nian. Hanesan modo musan ne’ebé monu ba rai, maibé nia sei moris fila fali. Amu lulik Abito nia isin mak mate. Maibé nia klamar la mate”, haklaken Pe. Grasiano.

Hanesan públika ona katak, Pe. Abito nia mate hafoin soke barazen estrada iha viajen hosi Aileu mai Dili. To’o iha estrada Manu-meta rai-hun motor namrodas monu tun halo Matebian Pe. Abito nia ulun baku ba moru.

Hosi baku ba moru ne’e rezulta Matebian Pe.Abito hetan pankada mak’as iha parte ulun maka reforsa Nai Lulik ne’e hakotu nia jornada moris iha mundu, iha loron Segunda, 22 Agostu 2022 hafoin lori halai ba hospital nasionál Guido Valadares. (Asesu You Tube/Facebook https://www.facebook.com/Media1Timor Media ONE Timor)