Selebra Loron Dame Mundiál, YPBTL Hala’o Marsa

(Reportajen Maria Sandrawati/Editora Suzana Cardoso)

DILI (Media ONE Timor) – Atu konsolida no hametin relasaun amizade entre joven hotu-hotu iha Timor-Leste (TL), organizasaun Youth Peace Building in Timor-Leste (YPBTL) realiza atividade marsa hodi selebra loron dame mundiál ba da-haduluk nian.

“Objetivu prinsipál husi atividade ida ne’e maka atu konsulida Joventude sira para hametin relasaun amizade. Liliu, oinsa atu hala’o Ita nia relasaun amizade ne’ebé forte liutan entre Joven sira iha rai doben Timor-Leste.”

Lia fuan hirak ne’e hato’o hosi Vise Prezidente Komisaun Organizadora YPBTL Marsiano Victor ba Jornalista iha Jardin 5 de Maio, Kuarta, (21/09/22) bainhira prepara hela atu hala’o marsa.

Hino – Marsa dame sai sinál ba YPBTL hodi selebra loron dame mundiál tinan 2022 nian ne’ebé hahú husi Jardim 5 de Maio mai to’o Kampu SEJD ne’e loke ho kanta Hino Nasionál Patria, Patria antes kontinua ba sesaun deskursu, Kuarta, 22/09/2022). (Foto Formandu Ceftec/Feliciano Belo)

Organizasaun YPBTL estabelese iha loron 28 Marsu 2022. Objetivu harii organizasaun ne’e hodi tulun Joventude sira hadok aan husi komflitu no kontribui ba progresu dezenvolvimentu.

Iha tinan 2022, YPBTL selebra loron dame mundiál ho tema dame mak save ba dozomvolvimentu. Iha selebrasaun ne’e, YPBTL hala’o marsa ne’ebé hahú hosi jardim 5 de Maio mai to’o iha Edifisiu Sekretariu Estadu Joventude no Desportu (SEJD-Sigla Portugues).

Esplika Vice Prezidente Komisaun Organizadora YPBTL katak, maske foin harii maibé organizasaun ne’e sei tenta konsulida Juventude sira atu mantein kontribui ba sustenbilidade nasaun.

Tanba katak Marsiano, Joventude mak simbolu dame. Liu husi garantia dame no domin ba sosiedade iha Timor-Leste, joventude tenki iha prinsipiu ba nia ptofisaun ne’ebé professional hodi kontribui ba dezemvolvimentu Nasaun Timor-Leste.

Nu’udar simbolu dame katak Vice Prezidente Komisaun Organizadora ne’e maka Joventude hola inisiativa hodi hala’o marsa dame. Husi marsa ne’e hodi husu ba joventude Timor laran tomak atu hamutuk lao ba dame hodi hametin amizade iha Nasaun RDTL.

Konstrui – Ida hosi membru YPBTL kaer surat tahan ne’ebé hakerek lia fuan, “Liu hosi dame mak konstrui ba dezemvolvimentu nasionál” hodi dada atensaun públiku bainhira partisipa marsa dame, Kuarta, (21/09/2022). (Foto Formandu Ceftec/Adão Fatima)

Hateten Marsiano, atividade marsa ne’e hetan apoiu kontribuisaun osan husi membru YPBTL. Parte doador hanesan; UNDP fó apoiu hodi emprimi banner. Hosi SEJD asegura atividade ne’e hala’o ho di’ak no oferese fatin ba selebrasaun nian.

Liu hosi fatin ne’ebé oferese hosi SEJD, Marsiano dehan sei utiliza ba orador sira bele fó mensajen ba konvidadus no ba ema tomak atu tau importansia ba dezemvolvimentu liu hosi kapasita aan ho di’ak liutan. SEJD moos fó impresta meja no kadeira.

“Hakarak foti tema dame mak save ba dezemvolvimentu tanba dezemvolvimentu ne’e prinsipál no prioridade tebtebes. Joventude, inan-aman no sosiedade tomak, Ita hotu hamutuk priense ukun aan ho dezemvolvimentu”, Marsiano dehan. (Asesu Youtube/Facebook https://www.facebook.com/Media1Timor Media ONE Timor)