PPN Aniceito Aseita Hapara Sosa Karreta-Laptop

(Reportajen Marcelino Tomae/Editora Suzana Cardoso)

DILI (Média ONE Timor) – Politika sosa karreta no laptop foun hodi fó apoiu ba lejislatura foun tinan 2023 to’o tinan 2024 nian ne’ebé hala’o ona dezde segunda lejislatura ne’e, sei hapara hodi reve fila fali politika sosa karreta ne’e.

“Hau konvida deputadu sira, atu reve. Tanba polítika sosa karreta ba deputadu sira, hahú sala tiha ona. Ha’u apoiu estudante no joven sira ne’ebé halo manifestasaun. VIII Governu Konstituisionál hakat tiha ona ho polítika ba kargu xefia sira, atribui deit subsidiu transporte. La fó karreta.”

Deklara Prezidente Parlamentu Nasionál (PPN), Aniceito Longuinhos Guterres Lopes iha diskusaun Orsamentu Jerál Estadu (OJE) tinan 2023 nian iha jeneralidade ba loron datoluk, liu husi plenaria iha uma fukun Parlamentu Nasionál, Kuarta, (09/11/2022).

Hanesan públika tiha ona iha www.mediaonetimor.co iha edisaun Tersa, (08/11/2022), estudante universitariu hirak ne’ebé halibur aan iha Aliansa Maubere Nasionál (AMN) rejeita planu orgaun lejislatura da IV ne’ebé hakarak atu sosa karreta Spot prado no laptop ho halo manifestasaun. Tanba OJE tinan-tinan aprova hela de’it maibé laiha benefisiu ba povu kbiit laek sira.

Estudante sira ne’ebé halo manifestasaun hodi ezizi atu hapara sosa karreta ba deputadu lejislatura foun katak PPN Aniceto, presiza reve polítika apoiu transporte ba deputadu sira. Tanba sosa karreta ne’e afeita ba orsamenru bo’ot.

Bu’udar PPN no Prezidente ba Konselho Administrasaun PN Aniceto Informa, polítika sosa karreta hahú sala iha segunda legislatura. Maibé VIIII Governu hakat tiha ona ho polítika ida ba kargu xefia sira. Atribui deit subsidiu transporte la fó karreta.

Hatete Aniceto, lei estutu deputadu sira hatete katak iha direitu ba transporte, La signifika tenke hetan kareta. Interpretasaun ida dehan, deputadu sira iha direitu ba karreta hahu 2007 iha segunda llegislatura, ne’e interpretasaun ne’ebé sala.

“Uluk Fretilin kontra sosa karreta ne’e. Ha’u maka xefe bankada. Ha’u hamrik iha oin kontra sosa kareta. Loloos atribui deit subsidiu transporte. Ohin loron atu sosa, problema hela de’it. Hahú husi akizasaun, manutesaun, konbustivél, motorista no seluktan. Ne’ebé, implika ba despeza ne’ebé bo’ot,” Aniceito dehan. (Asesu Youtube/Facebook https://www.facebook.com/Media1Timor Media ONE Timor)