Planu Harii Adobu Minerál, ASL Hasoru PR Horta

(Reportajen Lívia Sarmento/Editora Suzana Cardoso)

Dili (Media ONE Timor) – Dezemvolve komérsiu planta industria adobu minerál organiku, maka ASL Associates PTY LTD sei loke kompaña iha Timor-Leste (TL) ho skalaun ne’ebé boot. No dau-daun ne’e hala’o ona  enkontru ho parte relevante balun.

“Ami mai kongratula Prezidente Repúblika hafoin manan eleisaun. No hodi haree mós  oportunidade balun iha Timor-Leste, atu dezenvolve komérsiu industria adobu minerál orgániku. Iha ona progresu enkontru balun.”

Assuntu ne’e hato’o husi Porta voz  ASL Associates PTY LTD, Lewis Hunter ba Jornalista sira, hafoin remata enkontru ho Prezidente Repúblika  José Ramos Horta  iha Palásiu Prezidensiál, Kinta, (10/11/2022).

Porta voz ne’e esplika liutan,  perspectiva interesante ba  kompañia ASL Associates PTY LTD atu dezenvolve planta industria adobu minerál orgániku ho eskala boot. Ida ne’e hanesan oportunidade hodi kria kampu traballu iha TL.

Informa Lewis, kada planta sei fó servisu ba ema hamutuk liu 100. Nune’e, populasaun TL sei sente orgullu. Aliende ne’e, sei suporta moos agrikultura lokál sira, hosi produsaun 250.000 adobu minerál orgániku ba uzu doméstiku. No mós ba internasionál.

“Ami hetan suporta husi Prezidente Repúblika José Ramos Horta. Tanba ho ninia esperénsia internasionál hanesan hela iha estranjeiru no servisu governu rai seluk nian. Entaun Xefe Estadu sei hatudu sinerjia ba saida mak ami atu halo iha Timor-Leste”, Lewis esplika.

Tuir Lewis, Xefe Estadu enkonraja kompañia ASL Associates PTY LTD ba planu ne’e sei fó oportunidade boot ba kampu traballu, komérsiu no esportasaun. Xefe Estadu mós motiva tebes atu kontinua halo negosiasaun ba planu refere  ho ninia suporta tomak.

Vizita kompañia ASL Associates PTY LTD ne’e primeira vez mai TL. Atu aselera planu ne’e, hala’o ona enkontru ho departamentu negósiu no finansa hodi haree kona-ba detallu komérsiu nian iha TL.

“Ohin ne’e enkontru inisiál ho Prezidente Repúblika José Ramos Horta. No ami husi ASL Associates PTY LTD sei fila fali mai iha fulan rua tan. Hasoru Xefe Estadu hodi diskute kona-ba progressu husi planu refere”, promote Lewis. (Asesu Youtube/Facebook https://www.facebook.com/Media1Timor Media ONE Timor)