Insulta Orgaun Soberania, PPN Aniceito Lamenta Manifestante AMN

(Reportajen Marcelino Tomae/Guilhermino Ramos/Editora Suzana Cardoso)

DILI (Media ONE Timor) – Uza liafuan insulta hanesan ‘naokten no korupsaun’iha manifestasaun Aliansa Maubere Nasionál (AMN), Prezidente Parlamentu Nasionál (PPN), Aniceito Longuinhos Guterres Lopes lamenta lia falsu hirak ne’ebé kondena orgaun soberanu PN.

“Ita lamenta tebes ho manifestasaun ida ne’e. Tanba, manifestasaun ne’e la’ós atu insulta ema ho naok ten, Korupsaun. La merese duni atu hasai liafuan ida ne’e ba   orgaun soberaniu  hotu-hotu”, lamenta PPN Aniceto iha plenaria  ba debate Orsamentu Jerál Estadu (OJE) tinan 2023 ba espesialidade, Tersa, (15/11/2022).

Hanesan públika tiha ona antes ne’e,  manifestante AMN ne’ebé kompostu hosi estudante universitariu iha Timor-Leste (TL), halo asaun protesta hodi ezizi ba deputadu sira atu anula  OJE tinan fiskál 2023 ne’ebé prevee ba sosa kareta 60 no laptop.

Manifestante AMN ezizi ba PN no Governu atu uza osan povu nian hodi tau uluk prioridade ba infrastrutura iha TL ne’ebé seidauk la’o ho di’ak. Povu barak maka sei sofre hamlaha, moris kia’ik no mukit, estrada barak mak sei aat. Eskola barak mak nia kondisaun kumesa aat ona. Hadia tiha asuntu sosiais hirak ne’e maka foin hanoin atu sosa kareta ba deputadu sira.

Lee Notísia Relevante: PPN Aniceto Aseita Hapara Sosa Karreta-Laptop

Maibé tuir PPN Aniceito, universidade la divia fatin atu halo manifestasaun. Maske lei la bandu ema hotu-hotu atu halo manifestasaun. Maibé, tenke dook husi fatin orgaun soberaniu. Nune’e, PPN Aniceto husu ba deputadu sira atu halo lei kona-ba defamasaun ida ne’e.

“Ha’u husu  ba distintus  Deputadu sira hotu  iha plenaria ida ne’e, ho ida ne’e Ita tenke  hanoin katak  iha duni urzensia atu halo lei ida kona-ba  ba injuria ida ne’e la’ós defamasaun.  Tanba PN maka halo lei no lejislador”,  PPN Aniceito dehan.

Lee Notísia Relevante: Sosa Karreta-Laptop Ba PN Laiha Impakt, AMN Rejeita

Observasaun Media ONE Timor nian nota katak, estrada taka husi diresaun PN nia oin hodi tun ba loja Pateo  hetan siguransa husi Autoridade siguransa  Polisia Naionál Timor-Leste (PNTL) no Polisia Tranzitu.

Iha fatin manifestasaun nian, Koordenador Jerál Universidade Dili (UNDIL), Mariano de Sousa  hateten, TL iha nia Konstituisaun Repúblika Demokrátika de Timor-Leste (KRDTL) ne’ebé funda liu husi veteranu sira.

Esplika Mariano, KRDTL funda hosi parte tolu mak hanesan; redi klandestina, diplomatiku no redi falintil. Maka, AMN husu reprezentante povu iha uma fukun PN atu bele  responde ba objetivu ne’ebé manisfestante sira hala’o.

“Espasu ida ne’ebé sai edukasaun polítiku ba públiku hodi ezizi ita nia direitu ho baze fundamental. Tamba ne’e ita tenki koalia ho etika. Organizadu no disiplina tuir liberdade ne’ebé lao iha rai laran”, Mariano hatete.

Tuir Mariano nia hanoin, manifestante tenke kumpri ba regra manifestasaun hodi evita krimi durante hala’o manifestasaun. Nune’e asaun ne’ebé  halo la fó impaktu ba Ita hodi ignora no kontra regras sira.

Manifestante AMN mai husi estudante Universidade  da Paz (UNPAZ), UNITAl no UNTL. Sira kontinua halo manifestasaun to’o mosu konfrontasaun hodi rezulta Polisia atua tiha manifestante besik 29, inklui difisiensia na’in 10. Manifestasaun ne’e sei kontinua nafatin. (Asesu Youtube/Facebook https://www.facebook.com/Media1Timor Media ONE Timor)