(Reportazen Estajiada Teotonia Ximenes/Editor Marcelino Tomae)
Dili ( Media One Timor) – Quarezma ba sarani Katolika tama on aba semana da-haat. Nu’udar ema sala na’in, relijiaun Katólika hanorin ba sarani hotu-hotu atu tenke rekoñese sala iha tempu Kuarezma ninian hodi manan salvasaun.
“Ita sarani Katólika tenke rekoñese Ita aan nu’udar sala na’in. Tanba tempu kuarezma mak momentu di’ak ba sarani sira atu hakribi sala. Muda Ita nia an no hamoos Ita nia an. La’o tuir dalan loos. Labele halo Ita nia an hanesan Fariseu ne’ebé lakohi rekoñese an hanesan sala na’in.”
Lia hirak ne’e kasu husi Pe. Paulos Soares iha ninia homilia bainhira prejidi misa datolu iha Igreja Parokia St. Antonio Motael ba tempu Kuarezma iha semana da-haat, Domingu (19/03/2023).
Lee Notísia Relevante: Sarani Tenke Rekoñese Sala Iha Tempu Kuarezma
Esplika Pe. Paulos, fi’ar sarani Katólika tama ona ba semana dahat tempu kuarezma ninian. Iha misa ne’e fó hanoin mai Ita Sarani Katolika atu tenke rekoñese sala hotu-hotu. Tanba kuarezma mak tempu di’ak ba sarani sira atu hakribi sala no hamoos an hodi la’o tuir dalan loos.
Katak Padre Paulos, Jesus Kristu nia liafuan haklaken ba ema hotu-hotu. Matan delek la halo sala. Maibe ema matan nakloke haree buat hotu. Hakarak buat hotu no gosta buat hotu. Tanba ne’e labele taka an. Labele subar an. Labele bosok an no la bele moe atu rekoñese an hanesan sala na’in.
“Nune’e mai Ita akompañia iha tempu Kuarezma ne’e, atu bele hadia Ita ninia moris. No hadia Ita nia devosaun ba Maromak mizerdikordia ne’ebé rohan la’ek. Fiar iha laran luak, liu husi hakribi Ita nia sala”, Pe. Paulos hatete hatutan.
Hanesan ema matan delek sira sempre dehan ba Nai Jesus katak, “Nai Ha’u fiar.” Ida ne’e de’it maka bele tulun sira haloos moris ba dalan loos.
Aliende ne’e, Pe. Paulos mós husu ba sarani sira ne’ebé maka partisipa iha misa refere hodi selebra loron São José para bele bele fó matak malirin ba sarani Katólika iha mundu tomak.
“Ohin loron 19 Fulan Marsu Tinan 2023, Ita selebra mós festa São José nian. Husu harohan ba Aman ida ne’ebé fiel no Aman ida ne’ebé matenek.
Enkuantu misa Domingu datolu iha Igreja St, Antonio Motael ba kuarezma da-haat ne’e, hetan partisipasaun maximu husi sarani sira. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.