(Reportajen Formandu Ceftec)

Dili (Média ONE Timor) – Nesesidade kabun, obriga komunidade sira tenki hala’o vida negosiu iha estrada públiku ne’ebé kontra lei numeru 33/2018, hodi duni malu ho Autoridade Munisipiu Dili (AMD), tanba Merkadu Manleuana no Merkadu Taibessi la-sufisiente ona.

Ba formandu Ceftec, Xefe Jestaun Merkadu Gaspar da Silva, Koodenador femenista progresivu ne’ebé desde tinan 2019 observadora Elgana Monica Caetano, vendedór permanente Teresa da Silva  Estudante Denitri Natersia nu’udar kompradór kestiona negosiante sira ne’ebé faan modo hodi okupa estrada públiku iha fatin diferente, iha Semana Datoluk Fulan Marsu 2023.

Esplika Xefe Jestaun Merkadu, Gaspar da Silva, departamentu jestaun merkadu kumpri de’it dever hodi ezekuta lei númeru 33/2018. Tanba, kuandu la-ezekuta lei dehan la professionál.  Nune’e, guarda jestaun merkadu Munisipiu Dili hahú Segunda to’o Sesta kada semana, tenki duni vendedor sira para labele fa’an iha trotoar no estrada públiku.

“Atu labele hamosu problema iha implementasaun lei ne’e, iha tinan 2013, Governu estabelese merkadu Taibesi no Manleuana ne’ebé kompleta ho fasilidade. Nune’e vendedór sira bele fa’an sasan iha ne’ebá”,  Xefe Gaspar dehan.

Maibé hatutan Xefe Gaspar, realidade ohin loron  vendedór barak mak sei nafatin fa’an sasán iha trotoar leten no okupa estrada públiku. Tanba tuir lei 33/2018 iha artigu 6, númeru 3 hateten, iha sidade proibidu atu okupa area hirak ne’ebe mak enkomoda.

Aliende ne’e katak Xefe Gaspar, lei ne’e mós hateten prejudika ka afeita fali nia objetivu ne’ebé maka destina tia ona. Liu-liu  bainhira halo komersiu, labele  taka dalan públiku ka paseiu (trotoar-Lian Indoezia) sira. No lei ne’e hahú implementa depois de Prezidente Repúblika promulga.

Xefe Jestaun Merkadu ne’e dehan, atu labele hamosu problema iha implementasaun lei ne’e, iha tinan 2013, Governu estabelese merkadu Taibesi no Manleuana ne’ebé kompleta ho fasilidade, para vendedór sira fa’an sasan iha ne’ebá. Maibé, realidade vendedór barak mak sei nafatin fa’an sasán iha trotoar leten. Sira okupa estrada públiku.

Lei bandu ne’e mak katak Xefe Gaspar, dala barak guarda jestaun merkadu sempre duni. Prende hotu vendedór sira-nia sasan,  tanba lei bandu. Maibé loraik-loraik sira kontinua fa’an nafatin sasan iha; Audian, Bairu-Pite, Elemloi, Kampung-Baru no Comoro. Maioria sira sai hosi merkadu Taibesi no Manleuana.

Maibé tuir observasaun formandu Ceftec nota katak, Merkadu Taibesi no Manleuana la sufisiente ona atu akomoda vendedór ambulante hotu-hotu atu ba fa’an sasan iha ne’ebá. Maske vendedór balun iha ona fatin permanente iha merkadu. Maibé tanba ladun hetan rendimentu di’ak, obriga sira tenke sai hodi fa’an hadau-malu iha liur.

Iha parte seluk Koodenador femenista progresivu ne’ebé desde tinan 2019 to’o agora halo halo advokasia ba problema vendedores ambulante sira nian, observadora Elgana Monica Caetano  hateten, impementasaun lei ne’e la justu ba vendedór sira. Tanba antes kria lei, Governu la-konsulta uluk ho públiku hodi involve vendedór sira para fó ideia. No implementadór sira mós la halo sosializasaun kona-ba lei ne’e.

“Uluk eviksaun mak’as hasoru vendedores sira iha Dili laran susesu ne’ebé sira halo mak Autoridade Munisipiu Dili konsege tau vendedor sira iha Largo to’o ohin loron fa’an ho organizadu iha tasi ibun”, katak Observadora Elgana.

Haklean Elgana, antes AMD implementa lei, kria uluk kondisaun dignu no sufisiente molok muda vendedór sira. Nune’e, vendedór sira ne’ebé fa’an sasan iha trotoar leten no okupa estrada públiku bele fa’an deit iha merkadu ne’ebé governu prepara ona. Tanba karik laiha fatin dignu no sufisiente mak konserteza sei la rezolve esijénsia vendedór sira nian.

“Vendedór sira ne’ebé fa’an permanente ona iha merkadu Taibesi ho Manleuana mos sei enfrenta problema barak hanesan; fatin la adekuadu, ema fa’an hadau-malu. Modo la folin hodi difikulta sira-nia atividade negosiu”, dehan Elgana.

Lia fuan hanesan hato’o husi vendedór permanente iha Audian Klinika Foho Osan-Mean nia oin Teresa da Silva  ne’ebé muda husi merkadu Taibesi. Maibé tanba fatin iha laran liu, entaun ema la-bá sosa.

“Ha’u nia modo barak. Ho ida-ne’e, hakarak ka lakoi hau tenke fa’an sai mai liur atu ema bele sosa netik hodi sustenta nesesidade uma-laran ho oan sira-nia eskola”, dehan vendedor Teresa hodi hattan.

Bainhira  fa’an deit iha merkadu Taibesi, hau la hetan rendimentu tanba modo ema la sosa tó namlaik, balun dodok no soe estraga deit. kompara bainhira ha’u fa’an iha ne’e (Audian), ha’u-nia modo folin tanba ema barak mak mai sosa.

Tuir Estudante Denitri Natersia nu’udar kompradór,  AMD presiza kria regra ida atu kontrola vendedór sira atu labele fa’an sasán iha oras servisu, atu ami bele asesu ba merkadu ne’e besik. Karik merkadu sentraliza deit iha Taibesi no Manleuana, konserteza difikulta tebes komprador sira atu ba sosa. Liu-liu hanesan estudante sira, tanba atu ba sosa de’it modo futun ida lolos gastu de’it sentavus lima-nulu. Maibé ho distánsia dook entaun ami tenki gastu dobru.

Iha sorin seluk Paulo Soares hanesan vendedór ambulante iha Elemloi hateten, “hau tenki fa’an iha ne’e tanba laiha fatin permanente mai ha’u iha merkadu. Dalabarak seguransa sira duni ami, hadau ami-nia sasan no haruka atu labele fa’an iha ne’e tanba lei bandu, maibé nesesidade obriga hau tenki fa’an nafatin hodi sustenta familia no selu rasik hau-nia eskola”.

Nia husu, kuandu Autoridade Munsipiu Dili obriga ami atu labele fa’an iha ne’e, ami prontu atu kopera, maibé presiza kria uluk fatin dignu no sufisiente mai ami, hodi nune’e, ami nafatin kontinua hala’o atividade negosiu, tanba ami-nia moris depende ba negosiu no ami mós la tane-liman ba estadu.

Hatan ba ida ne’e Xefe Departamentu Jestaun Merkadu, hateten “hare’e ba situasaun ne’ebé dadaun enfrenta hela mak, atividade negosiu aumenta ba beibeik, ho ida ne’e, Governu iha ona planu atu loke tan merkadu foun ba vendedór sira no iha tempu badak Governu sei halo akijisaun ba rai ida iha Manleuana hodi haluan tan merkadu, hodi nune’e bele rezolve ezijénsia vendedór sira nian”, nia hakotu. (Asesu Youtube/Facebook https://www.facebook.com/Media1Timor Media ONE Timor)