Alterasaun Ba Lei KAK, Deputadu ‘Duun Ba Malu’

(Reportajen Marcelino Tomae)

 Dili (Media ONE Timor) –  Atu halo alterasaun ba lei  númeru 8/2009 15 fulan Jullu ba komisariu Anti Korrpusaun (CAC sigla Portugués),  Parlamentu Nasionál (PN) liu-husi Bankada Governu no  Bankada opozisaun komesa ‘duun’ ba malu.

Hatuir  membru Bankada opozisaun Kongresu Nasionál Rekonstrusaun Tomorense (CNRT), atuál membru Komisaun ‘A’ trata asuntu Konstitusaun no Justisa Deputada Carmelita Caetano Moniz  no Bankada Governu Frente Revolusionariu Timor-Leste Independente (Fretilin) atuál Prezidente Komisaun ‘A’, Deputadu Joaquim do Santos ba Jornalista iha resintu uma fukun Parlamentu Nasionál (PN), Segundu, (17/04/2023) hatete   labele husik pozisaun CAC mamuk.

Membru Bankada CNRT no komisaun ‘A’ Deputada Carmelita Caetano Moniz konsidera, Prezidente Parlamentu Nasionál (PPN) Aniceto Longuinhos Guterres  Lopes ninia desizaun ne’e ilegál.  Tanba, PPN  laiha kompeténsia mesak atu hakotu mandatu Komisáriu CAC ida ni’an.

“Prezidente Parlamentu Nasionál laiha kompeténsia ba ida ne’e. Tanba la’ós nia mesak de’it mak nomeia diretamente bá komisáriu CAC. Ida ne’e desizaun hosi deputadu  hothotu ne’ebé prienxe kourum ¾. Ne’e mak nomeia komisáriu CAC ida,” Deputada Carmelita hatete.

Bainhira liga fila-fali ba prinsipiu kontinuidade ba instituisaun ninian katak Deputada Carmelita, tuir loloos  labele husik instituisaun ida mamuk. Labele husik vacuum of power. Ne’e labele.

Katak Deputada Carmelita, PN bele halo aprovasaun ba rezolusaun ida  hodi fó kontinuadade ba  komisáriu CAC ho nia adjuntu sira ne’ebé agora iha ona, to’o nomeasaun Komisáriu CAC foun. Maibé tenke liu-husi aprovasaun iha plenária. La’o tuir  rezolusaun PN nian.

“Prezidente Parlamentu Nasionál laiha kompeténsia. Nein nada. Lei la atribui. Nein kompeténsia bá parlamentu nasionál, atu hamate ka atu extende. Nia mesak de’it labele desidi de’it bá mandatu komisáriu CAC,” Deputada Carmelita fó hanoin.

Enkuantu tuir  Bankada Governu FRETILIN Prezidente Komisaun A trata asuntu Konstitusaun no justisa Deptudu Joaquim do Santos, defende katak, desizaun ne’ebé PPN Aniceto Guterres halo ne’e, tuir duni lei ne’ebé mak hatuur tiha ona iha lei CAC nian.

“Desizaun PPN Aniceto la’ós  illegal. Tuir lei komisáriu CAC nia mandatu ona, hotu, sessa automátiku. Prosesu ne’e hanesan ne’e, dentru do prazu 30 dias, molok komisáriu CAC nia mandatu hotu, tenke iha ona kandidatu foun eleitu tiha ona. Tuir lei ne’e, artigu 7 aliña 1 hatete,” Deputadu Joaquim esplika hodi dehan.

Iha loron 30 nia laran, molok komisáriu CAC ne’ebé ezistente ne’e nia mandatu hotu, parlamentu tenke hili ona, komisáriu CAC foun. Maibé, iha kazu ida ne’e, prazu liu tiha ona loron 30, seidauk iha komisáriu CAC foun.

Tanba ne’e, Deputadu Joaquim dos Santos, hateten tuir lei ‘hakarak ka lakohi’ komisáriu atuál ka sesante ne’e, tenke para ona hosi ninia mandatu.  La’ós ne’e de’it, lei mós fó kompeténsia ba iha prezidente parlamentu, bele husu se komisáriu CAC seidauk kumpri prazu loron 30, tanba seidauk iha komisáriu CAC foun, maka, PPN Aniceto bele husu bá komisáriu CAC, atu aguenta tán fulan-ida ka, fulan-rua, konforme nia husu, hodi  prosesa tiha lai, eleisaun ba komisáriu CAC foun.

“Mais, liu tiha fulan tolu, komisáriu CAC foun laiha ona, prezidente parlamenu, labele husu dala-rua tán, tenke kumpri lei de’it. Ida ne’e mak nia halo. Ne’ebé, la kontra lei ida,” Deputadu Joaquim esplika hodi dehan.

Bankada opozisaun sira bele fó opiniaun saida de’it, maibé, buat e’ebé PPN Aniceto halo ne’e, la’o tuir de’it lei ne’ebé mak iha.  Molok loron 30, tenke iha Komisáriu CAC foun. Maibé baainhira liu ida ne’e, komisáriu CAC ezistente tenke konklui ninia mandatu.

Iha lei Kourum artigu 7, númeru 1, ezíje prezensa deputadu sira nian ho ¾, iha efetividade bá funsaun nian. Ne’e signifika, atu marka prezensa hodi foti desizaun ne’e, presiza deputadu 49.

Maibé, katak Joaquim durante ne’e  PPN Aniceto ajenda ba dala neen ona,  hodi halo eleisaun ba komisáriu foun CAC nian, la konsege 49, tanba bankada sira hosi CNRT lakohi partisipa. Maske ida ne’e, direitu deputadu sira CNRT nian, maibé, prejudika bá kourum deliberasaun, tanba ne’e maka prosesu paradu.

Deputadu Joaquim informa tan, tuir lei CAC nian ida atuál ne’ebé válidu, kourum ne’e presiza prezensa hosi deputadu 49. Bainhira la to’o , maka labele deside. Maibé, sé liu deputadu 49, bele deside. Bele deside kourum deliberativu nian.

“Se Governu halo mudansa ba kandidatu, bele iha mudansa desizaun. Kuandu  nafatin ho kandidatu ida ne’e, grupu ida la konkorda, sé la marka prezensa, kourum laiha nafatin. Tanba lei ne’e fó kompeténsia bá Governu de’it mak atu aprezenta kandidatu bá komisáriu CAC”,   Joaquim dos Santos hateten.

Antes ne’e Prezidente Parlamentu Nasionál Aniceto Longuinhos Guterres Lopes  informa nia parte sei Baucau projetu lei  hodi altera tiha korum atu hili komisariu foun ba komisaun Anti Korrpusaun (CAC).

Enkuantu desizaun Parlamentu Nasionál ne’e hodi anula desizaun anteriór liu-hosi karta nú ofisiu 457/2023/V/PPN, 20 janeiru 2023, ne’ebé hanaruk mandatu Komisáriu CAC nian atu kontinua hala’o misaun CAC nian hodi hein eleisaun ba Komisáriu foun.(Asesu Youtube/Facebook https://www.facebook.com/Media1Timor Media ONE Timor)