Xanana – Alkatriri Hasoru Malu Iha Dalan Kloot PN

(Reportajen Editor Marcelino Tomae)

Dili (www.mediaonetimor.co) – Reuniaun dahuluk ba VI lejislatura, periodu tinan 2023 to’o tinan 2028, Prezidente Partidu Kongresu Nasionál Rekonstrusaun Timorense (CNRT sigla Portugues), Kay Rala Xanana Gusmão ho Sekretáriu Jerál Partidu Frente Revolusionariu Timor-Leste Independente (Fretilin), Mari bin Amude Alkatiri  hasoru malu iha dalan kloot, uma fukun Parlamentu Nasionál (PN).

Tuir observasaun Media ONE Timor iha uma fukun PN,  Kinta, (22/06/2023) dadeer nota katak, Prezidente Partidu CNRT, Kay Rala Xanana Gusmão to’o iha resintu PN, maizu menus tuku 09:00-resin ho karreta privadu.

Hafoin tau ain iha jardim PN, Xanana tama liu kedan ba Bankada CNRT nia fatin. Iha eskritoriu bankada CNRT, Xanana kumprimenta deputadu sira. Iha sikun seluk Sekretáriu Jerál Partidu Fretilin, Mari Bin Amude Alkatiri ne’ebé mai uluk iha ne’ebá kumprimenta hela deputadu sira.

Maibé tanba antes ne’e hatene ona katak Xanana atu tun hosi kareta no hatene moos katak Marii besik hela iha jardim laran iha resintu PN, nune’e ida-idak kria ninia  asaun hodi labele hasoru malu entre matan.

Iha leet oan resintu PN ne’e, ida-idak halo vinji  sei kotuk ba malu. Maibé bainaka no deputadu hotu-hotu ne’ebé hamriik besik iha momentu ne’e, atensaun hela atu kuandu sira rua derepente hasoru malu iha fatin kloot iha resintu PN ne’e maka sira ses malu la di’ak, saida maka sei akontese.

“Kuandu hasoru malu iha dalan kloot karik, saida maka sei akontese  ba sira rua (Xanana no Marii). Hakuak malu deit ona ka lao fila fali ba sira nia fatin antes nian. Maibé Maun Boot Xanana ema militar, nune’e sukat ona fatin para labele hasoru malu diretamente”, hateten Jornalista Media ONE Timor ba nia kolega jornalista seluk ho hamanasa.

Entretantu, abertura sesaun lejizlatura da VI ne’e, hahú iha tuku 10:00 OTL. Iha momentu ístorika hafoin funu lia fuan ba malu durante kampañe eleisaun parlamentar tinan 2023 nian remata ne’e, sira hotu-hotu halibur malu fali iha uma fukun PN.

Lider Nasionál ne’ebé marka prezensa iha momentu ne’ebá maka; Kay Rala Xanana Gusmão, Francisco Guterres Lu Olo, Lere Anan Timor no Mari Bin Amude Alkatiri. La marka prezensa maka Jenederál Taur Matan Ruak ne’ebé iha kondisaun tristeza nia laran, hafoin lakon ninia espoza ne’ebé haloot ona iha maktoban ikus, iha Semiteriu Bekuse.

Prezensa lideransa sira, maske la fó sinál atu sira hasee malu, maibé Media ONE Timor nota katak, iha inisiu CNRT ho PD nia mandatu ukun ne’e, halo surpreza ho marka ístoria foun feto dahuluk maka lidera PN, Maria Fernanda Lay ho background ekonomista.

Bainhira  termina plenaria lejislasaun da VI  PN nian ne’e,  Xanana sai  husi  odamatan  besik sala konferensia hodi tesik ba bankada CNRT nia eskritoriu. No Marii Alkatiri sai  husi odamatan  liman loos,  ba iha sala kafetaria nian. (Asesu Youtube/Facebook https://www.facebook.com/Media1Timor Media ONE Timor)