Manorin Kontratadu Nain 1.499 Simu Ona Salariu

(Reportajen Estajiada Media ONE Timor Adelina Fátima)

Díli (www.mediaonetimor.co) – Manorin kontratadu hamutuk 1.499 hetan ona pagamentu ba sira nia salariu ne’ebé seidauk selu dezde fulan Janeiru to’o fulan Agostu tinan 2023 nian. Pagamentu ne’e hala’o husi Ministériu Edukasaun (ME).

“Ami sei selu sira (manorin kontratadu-Red), hahú husi fulan Janeiru to’o fulan Agostu  iha tinan ne’e nian. Tanba profesor hira ne’e kontratadu. Sira nain 1.499 ne’e foun. Nune’e,  agora maka foin simu salariu.”

Informasaun ne’e hato’o husi Direitór Jerál ME, Antoninho Pires ba Jornalista sira iha nia kna’ar fatin, Segunda (21/08/2023). Nia hatete, pagamentu ba manorin hirak ne’e hala’o, hafoin Komisaun Fungsaun Públika (CFP sigla Portugues) fó ona orientasaun.

Pagamentu ba manorin sira tarde katak Antoninho, tanba dadus manorin kontratadu hirak ne’e  aprezenta husi ME iha mandatu VIII Governu Konstituisionál nian. Lista hirak ne’e CFP simu iha fulan Maiu tinan 2023 ne’ebé besik ona eleisaun.

Hatete Antoninho, tanba iha situasaun eleisaun nian maka CFP hasai sirkular hodi suspende kontratadu governasaun nia salariu no suspende moos rekrutamentu sira. Husi CFP husu ba hotu-hotu atu hein IX Governu Konstituisionál nian maka bele hala’o fila fali.

“Durante ne’e Prezidente Komisaun Fungsaun Públika, Faustino Cardoso lista ona manorin kontratadu ne’ebé haruka ona husi Ministériu Edukasaun iha mandatu VIII Governu nian. Iha fulan Maiu, Komisaun Fungsaun Públika simu ona. Maibé iha hela situasaun eleisaun nian maka tenki adia”, Antoninho esplika.

Razaun seluk hodi suspende pagamentu ne’e katak Antoninho, CFP konsidera iha tempu eleisaun nu’udar periodu tranzisaun iha VIII Governu Konstituisionál  mai iha IX Governu Konstituisionál nian.

Antoninho esplika, prosedimentu iha ME VIII Governu Konstituisional nian moos iha dokumentu balun ne’ebé CFP tenki konfirma. Liu-liu kona-ba vaga sira. Tanba, iha parte seluk orsamentu ministériu nian la sufisiente atu selu ba manorin sira.

Aliende ne’e katak Antoninho, orsamentu iha ME VIII Governu Konstituisional para selu kontradu hirak ne’e tenki kontempla iha livru Orsamentu Jeral Estadu (OJE) númeru-2 Parlamentu Nasionál (PN). Maibé orsamentu ne’e la iha ne’ebá.

“Maske priense ona prosedimentu balun hanesan públika ona iha Jonál Repúblika no kestaun tékniku sira seluk nian, maibé iha livru orsamentu Jeral númeru-2 Parlamentu Nasional nian la iha. Tanba, kuandu laiha maka sei afeita ba desizaun ME IX Governu Konstituisionál nian,”  Direitór Jerál ME, Antoninho Pires dehan. (Asesu Youtube/Facebook https://www.facebook.com/Media1Timor Media ONE Timor)