(Reportájen Estajiada Media ONE Timor-Dilvia Moniz)
Dili (www.mediaonetimor.co) – Sukat lideransa Primeiru Ministru (PM), Kay Rala Xanana Gusmão nia Governasaun da IX atu hetan suseisu maka tenki halo avaliasaun hodi halo remodelasaun.
Maibé, tuir PM Xanana avaliasaun ne’e sei bele realiza iha tinan 2025. Tanba dau-daun ne’e sei halo hela auditória hodi mantein nafatin membru Governasaun da IX ne’e to’o mandatu remata iha tinan 2028.
“Besik ona fulan sia, Governu dasia hala’o sira nia mandatu. Espera katak Primeriu Ministru tenki halo duni avaliasaun servisu, para hare benefisiu servisu”, dehan Prezidente Repúblika (PR), José Ramos Horta ba Jornalista sira hafoin remata husi Serimonia selebrasaun aniversariu PNTL ba dala 27 nian.
PR Ramos Horta esplika liutan, avaliasaun servisu tenki halo duni. Tanba, bele sai sasukat ba PM Xanana nia kredibilidade lideransa. No sai mós sasukat ba kualidade Governasaun da IX nian.
Dehan PR Horta, kuandu halo remodelasaun maka membru governu ne’ebé laiha kualidade tenki troka hodi servisu atendementu públiku bele la’o ho di’ak liutan.
Liu-liu hatutan PR Horta, servisu públiku iha seitor ekonomia. Tenki halo avaliasaun ba seitór ekonomia hodi halo mudansa. Tanba iha keixa barak ona kona-ba atendementu ne’ebé kleur liu iha trata dokumentu sira.
“Ema barak kontinua keisa, katak investidór sira hakarak hatama surat ruma, maibé demora hela de’it. Ida ne’e tenki hare didi’ak. Ministeru hirak ne’ebé kaer area ekonomia, agrikultura no saúde tenki hare didi’ak fali sira nia servisu”, PR Horta sujere.
Iha parte seluk, PM Xanana iha Palasiu Prezidensiál, Kinta, (04/04/2024) ba Jornalista sira hatete, Governu da IX sei fó sai rezultadu servisu dezempeñu nian iha tinan 2025. Tanba, sei halo hela auditória.
“Governu ida ne’e atu servisu loloos só iha tinan 2025. Tanba, buat sira ne’ebé agora ami hanoin barak loos. Nune’e maka sei halo auditoria hodi fahe kazu hirak ne’e, ba rua. Lae tinan ba tinan aumenta barak ba bei-beik”, PM Xanana dehan ho lian diplomasia.
Kona-ba remodelasaun katak PM Xanana, Governu da IX ne’ebé nia lidera sei mantein nafatin to’o mandatu remata iha tinan 2028 no Governu da IX la-iha Governu inkluzivu.
“Ami laos ai-tonka. Tanba ai-tonka ne’e mak agora hetan dólar husi ne’e, dólar husi ne’ebá. Falta-falta sira ne’e hotu, ne’ebé grande inkluzaun kuandu 2028, governu ne’e monu, povu hili fali sira, mak sira halo grande inkluzaun ba”, PM Xanana argumenta.
Katak PM Xanana, Governu kontinua halo auditoria tanba iha problema barak ne’ebé presiza atu hadia. Ida husi problema ne’e maka programa merenda escolar. Iha indikasaun, oknum balun uza osan konta bankaria, ba subsidiu merenda eskolar hodi sosa kareta.
Iha Governasaun da VIII fó espasu ba eskola tenke iha konta bankaria maka ba PR Horta, PM Xanana esplika, iha eskola balun labarik sira la simu merenda eskolar tanba osan uza tiha ba sosa kareta.
“Problema barak maka Governu identifika. Liu-liu programa merenda eskolar. Maske dau-daun ne’e iha fali ona ministériu estatal, maibé Governu halo hela estudu di’ak ida hodi bele haree kestaun hirak ne’e”, PM Xanana lamenta.
Hanesan públika tiha ona katak, PM Xanana promote hafoin loron 100 sei halo remodelasaun ba membru Governu ne’ebé laiha kapasidade. No iha fulan Fevereiru promote tan katak sei halo remodelasaun iha fulan Marsu tinan ne’e. Maibé hafoin remata hasoru malu ho PR Ramos Horta, PM Xanana deklara ona katak sei mantein to’o tinan 2028. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.