Eviksaun no Sobu Uma: Hatudu Estadu nia “Inkonsisténsia Konsistente” no Lider Lakon Sentidu Umanidade

Ananliza badak husi : NGO Fundasaun Mahein.
8 Julhu 2024
Iha inísiu tinan 2024, Governu Timor-Leste hahú hasai ema no sobu edifísiu sira ne’ebé “okupa rai estadu ho ilegál.” Governu mos taka no sobu merkadu informál sira no foti sasán komersiál husi vendedor sira. Durante fulan balun nia laran, família barak lakon uma, negósiu no rendimentu. Ema sira ne’e sofre maka’as, no asuntu ne’e sai polemika bo’ot iha sosiedade. Fundasaun Mahein (FM) preokupa tebes kona-ba oinsá Governu implementa polítika eviksaun no sobu ne’e, no mos kona-ba objetivu kampaña eviksaun ida ne’e.
Kleur ona, estadu notifika komunidade barak hela iha área oi-oin iha Dili laran. Katak, sira tenke husik uma ka negósiu. Durante tinan barak, la iha implementasaun. Maibé, komesa iha inísiu tinan 2024, Governu komesa hasai ema no sobu edifísiu sira. “Ekipa konjunta” implementa politíka ne’e, ne’ebé lidera husi Sekretáriu Estadu Asuntu Toponímia no Organizasaun Urbana (SEATOU), iha Ministériu Administrasaun Estatal nia okos. Polítika ne’e konsidera nu’udár parte Ministériu nia papél atu “promove ijiéne urbana no orden públika.” Até agora, kampaña ne’e konsentradu iha Díli. Maibé iha ona notísia katak eviksaun mos akontese ona iha fatin seluk, hanesan iha munisípiu Baucau.
Sosiedade Timor-Leste debate tun-sa’e kona-ba Governu nia hahalok durante kampaña ne’e. Sidadaun barak apoia Governu sobu edifísiu ne’ebé konsidera ilegal no la seguru. Maibé, ema barak mos konsidera katak Governu hasai ema ho métodu ne’ebé brutál liu no la fó apoiu ka kompensasaun ba ema ne’ebé hetan eviksaun.
Fundasaun Mahein hakerek ona kona-ba oinsá maljestaun urbana ameasa saúde no seguransa públika iha rai ida ne’e. Ami husu bei-beik ba Governu atu foti asaun hodi implementa regra ligadu ho utilizasaun veíkulu (kareta no motór), konstrusaun, jestaun lixu, no kontrola barullu. Parte ida husi jestaun urbana maka identifika no sobu edifísiu ne’ebe la seguru, no prevene hahalok hanesan so’e lixu arbiru no taka dalan públiku.
Maibé, FM mos rekoñese katak problema sira ne’ebé kampaña eviksaun no sobu “tenta” atu rezolve rezulta husi fatór estrutural sira, hanesan pobreza, falta edukasaun no falta implementasaun regra formál iha sosiedade tomak. Kestaun hirak ne’e kompleksu, no la bele resolve de’it iha tempu badak ho asaun ne’ebé implementa de’it “husi leten mai kraik” (top-down). FM sempre rekomenda la bele uza métodu brutál hodi rezolve lalais problema sosiál sira hanesan ne’e ne’ebé kompleksu tebes. Estadu tenke foti meius ne’ebé sistemátiku, hanesan kria planu integradu ba tempu naruk, no la bele uza deit métodu fíziku no violénsia.
FM preokupa liu kona-ba SEATOU nia hahalok durante kampaña ida ne’e. SEATOU justifika dehan sira implementa deit lei, atu nune’e Díli bele sai sidade ne’ebé modernu no organizadu. Maibé, FM haree SEATOU kumpre-an hanesan sira iha lei nia leten. Vídio públika iha internet hatudu Sekretariu Estado SEATOU nian ameasa komunidade, ho ema seguransa hamriik iha nia sorin, no hatudu mos membru forsa seguransa baku sidadaun ne’ebé protesta kontra governu sobu, sein uza violénsia.
FM konkorda ho opiniaun sosiedade sivíl sira seluk katak SEATOU kumporta-an la’os hanesan orgaun estadu ne’ebé bazeia ba lei, maibé sai hanesan fali preman ka gen, ne’ebé uza buldozer no forsa seguransa sira hanesan kilat ida atu ameasa povu.
Maske Governu dehan ema okupa rai estadu ilegál, ema balun ne’ebé hetan eviksaun iha ona akordu ho Estadu atu aluga rai ne’e atu halo negósiu, maibé ikus liu estadu sobu fali sira nia negósiu. FM mos rona informasaun husi vítima balun ne’ebé esplika katak família halo uma no negósiu iha fatin ne’e uluk liu, iha tempu Indonézia no balun iha tempu Portugéz. Maibé tanba dokumentus barak lakon ka la-iha, susar atu verifíka reklamasaun sira ne’e.
Problema seluk maka Governu reklama katak eviksaun no sobu ne’e parte “programa inter-ministeriál” ne’ebé envolve mos Ministériu Solidariedade Sosiál no Inkluzaun, Edukasaun no Saúde. Tuir lolos, estadu fó apoiu integradu ba ema ne’ebé sofre eviksaun atu garante sira bele asesu ba apoiu sosiál no servisu báziku sira. Maibé, tuir testemuña sira ne’ebé FM rona direita, maiora la hetan apoiu hanesan estadu promete, no estadu husik sira hodi buka moris no hela fatin mesak. Tanba ne’e, família barak lakon uma no rendimentu tanba sofre eviksaun, inklui inan-feto ho labarik ki’ik, katuas-ferik sira, no ema ho moras todan.
FM preokupa mos kona-ba kestaun seluk: tanba saida mak Governu implementa kampaña ne’e agora? Fatór bo’ot ida maka Amu Papa Francisco sei mai vizita Timor-Leste tinan ida ne’e. Ne’e duni, membru Governu balun rekoñese ona katak governu halo eviksaun no sobu hodi prepara sidade Díli ba Amu Papa nia vizita. Tuir FM nia hanoin, ida ne’e la bele sai justifikasaun atu hasai ema barak husi sira nia uma. FM konkorda ho Amu Lulik ida ne’ebé koalia iha públiku katak Papa Franciso sei sente triste se karik nia rona katak ema barak lakon uma tanba Governu prepara ba nia atu mai Timor-Leste.
Fatór seluk ne’ebé FM deskonfia influénsia Governu nia desizaun maka investór husi rai li’ur barak interese atu investe iha merkadu imobiliáriu (rai no propriedade imóvel seluk) iha Díli. Karik Governu hasai populasaun husi rai estratéjiku, bele kria dalan ba investimentu privadu atu konstrui shopping Centre ka mall ka apartmentu luxu. Ema barak gosta ideia ne’e tanba bele estimula ekonomia, fornese fasilidade foun, no loke kampu traballu balun. Maibé, karik Governu nia objetivu mak atu atrai investimentu privadu ne’ebé bo’ot, realidade maka investimentu ne’e sei la fó benefísiu ba maioria povu Timor-Leste. Só Timor-oan ne’ebé riku no estranjeiru sira bele goza fasilidade foun ne’e, no polítiku sira bele hetan benefísiu polítiku no finanseiru tanba kapitál tama mai Timor-Leste.
Ikus liu, FM fiar katak kampaña eviksaun no sobu refleita estadu nia “Inkonsisténsia konsistente” ne’ebé eziste dezde Timor-Leste hetan independénsia. “Inkonsisténsia konsistente” ne’e iha ezemplu barak: hanesan FM hatete beibeik, iha administrasaun estadu no mos iha sosiedade, ema barak la tuir regra ka prosedimentu formal sira, no estadu de direitu sei fraku tebes. Ezemplu ida maka durante tinan barak estadu falla totál atu prevene ema halo konstrusaun informal iha kapitál. Maibé Governu deside derepente atu implementa “lei no orden”, tanba ema ki’ik barak tenke lakon uma no negósiu. Lidér sira sempre hakilar “estadu de direitu” no “lei no orden” bainhira kondena “ema ki’ik.” Maibé impunidade elite kontinua, no korrupsaun no nepotizmu buras no normalizadu iha administrasaun públika. Timor nia lidér sira sempre hatene katak sira hakarak diversifika ekonomia, halakon ki’ak no hasa’e povu nia rendimentu. Maibé, povu balun ne’ebé servisu no investe durante tinan barak atu bele moris ho dignu, derepente Governu mai sobu sira nia uma no negósiu, nune’e estadu deztrui fali ema nia investimentu no rikusoin.
Se estadu hakarak duni atinje kresimentu ekonómiku liu husi programa eviksaun no sobu ne’e, bele atinje objetivu ne’e. Maibé, evikasaun mos kria kustu sosial ne’ebé bo’ot, no ami duvida investimentu sira sei fó benefísiu ba maioria povu Timor-Leste. Nune’e mos, instituisaun estadu balun kontinua hatudu jeitu hanesan preman ne’ebé moris iha lei nia leten, maibé iha parte seluk hakilar kona-ba “estadu de direitu.” Bainhira Amu Papa mai, Governu manán vitoria propaganda ida; maibé ita la hatene saida mak bele akontese iha fulan balun tuir mai. Karik Governu nia prátika a’at sira kontinua, liu-liu nepotizmu, korrupasaun no inkompeténsia, no maioria povu la haree benefísiu iha sira nia moris, FM antesipa katak malkontente no instabilidade polítika sei kontinua aumenta. Ita besik ona “fiscal cliff”, korrupsaun, no nepotizmu kontinua buras maka’as. Ami hakarak husu – oinsá ita bele konvense lidér sira atu foti asaun ne’ebé nesesáriu atu asegura futuru nasaun? .(Asesu Youtube/Facebook https://www.facebook.com/Media1Timor Media ONE Timor)

No Result